Read urhobo Zẹfanaya 2 Bible Online

Zẹfanaya 2 - urhobo bible

Zẹfanaya 2

¹We rhi ku oma gbe re wa gba ẹguare, E ẹgborho ro jẹ omaẹvuọ evwo na,

²Tavwe ra ke rhe djẹ ovwan yanran kerẹ iphopho rẹ odju muẹ, tavwe rẹ ophu ọgangan rẹ Ọrovwohwo, ki rhi vwrẹ she teye owẹ ẹdẹ rẹ ophu rẹ Ọrovwohwo na.

³Guọnọ Ọrovwohwo na, ovwan ihwo dẹndẹn re dia otọ na, re yọnrọ irhi rọye, guọnọ ovwata, guọnọ omaevwokpotọ; ọkeọvo se se si we nu vwẹ ẹdẹ rẹ ophu rẹ Ọrovwohwo na.

⁴Kidie a cha kua nẹ Gaza, Ashkẹlọn ko che hirhe phihọ otọ ofefe Ka djẹ ihwo rẹ Ashdọd kufia vwẹ oghẹruvo ke che ghwie Ekrọn nẹ otọ.

⁵Ekan kẹ ovwan re dia obo erhuru rẹ abadi na, ovwan ẹgborho rẹ ihwo ri Kẹrẹt. Ota rẹ Ọrovwohwo na wẹ a tarọ kpahe, E Kenan, otọ rẹ ihwo ri Filistia; ke me guọghọ owẹ bẹsiẹ rẹ a vwọ mrẹ nẹ ohwo ọvuọvo gbi chekọ-ọ.

⁶Ji te owẹ rhe, E erhuru na, egbri kọye cha djẹ vwẹ enu wẹ odi phiẹphiẹphiẹ kẹ otu ri suigodẹ kugbe ogba kẹ ekru rẹ igegede.

⁷Obo erhuru na ko che hirhe phihọ ẹkẹn rẹ umuku rẹ ihwo ri chekọ vwẹ uwevwi ri Juda, kẹ etiyin ayen da cha ghẹrẹ ichuru, vwẹ uwevwi rẹ Ashkẹlọn kẹ etiyin ayen che shevwerhẹ vwẹ ovwọnvwọn. Kidie Ọrovwohwo Ọghẹnẹ rayen kọ davwerhọ rẹ ayen kọ vwẹ ughwẹ rayen rhivwi rhe ayen.

⁸Mi nyọ ehwẹjẹ ri Moab kugbe ẹghwọ rẹ ihwo rẹ Ammon, obo rẹ ayen vwẹ ihwo mẹ jehwẹ rẹ ayen da yeyan kpahe ubrotọ rayen.

⁹Vwẹ ọtiọye na, kirobo re me herọ na, Eriyin Ọrovwohwo rẹ otuofovwi na tare, Ọghẹnẹ rẹ Izrẹl na, Moab kọ cha họhọ Sodọm, ihwo rẹ Ammọn kerẹ Gomora, otọ rọ vọnre vẹ avwrọgbo kugbe esokpọ ra kua fiotọ bẹdẹ. Umuku rẹ ihwo mẹ ri chekọ ki gborho ayen, ihwo ri ghwu cheko vwo ẹgborho mẹ na ki che vwo ayen.

¹⁰Ọna kọye cha dia obọ ri te ayen fiki rẹ eheri rayen, fikiridie ayen mienu ayen yeyan kpahe ihwo rẹ Ọrovwohwo rẹ otuofovwi na.

¹¹Ọrovwohwo na cha vwẹ oshọ mu ayen, eriyin ọ cha vwẹ owẹvwe hwe edjọ rẹ otọ na, kọye ayen che shiguẹ kẹ, dohwo dasan rọye, etọ rẹ ẹgbọrho na ejobi.

¹²Ji te owẹ rhe, E ihwo rẹ Itiopia, odan mẹ kọye mi vwo hwe we.

¹³Kọ riẹn obọ rọye kpahe ubrakpọ rẹ obenu na, kọ guọghọ Asiria; kọ ru Ninive phihọ ọfefe phrẹnphrẹn kerẹ atọn

¹⁴Ekru rẹ eranvwe ki rhuẹn te otọ vwẹ uherevie rọyẹ, ẹranvwe rẹ aghwa na ejobi; Ye udele kugbe ọrigbẹn okukughu kọ che bo vwẹ evakpo na, okpemu ko che kpẹri vwẹ ibara; kidie ke che rhie omamọ rẹ igẹdu rọye na phihọ.

¹⁵Ọnana orerẹ ro muẹ oma kpenu na rọ herọ vwẹ ofuvwegbe, rọ ta kẹ oma rọyẹ, Mi herọ ohwo ọfa gbe herọ chọ vwẹ ra-a. Gbe nighe kọmavọ a rha vwọ kua fiọtọ, urhuẹn rẹ eranvwẹ re djoma! Kohwo kohwo rọ wanvrẹn kọ fiọn unu kpogho obọ.