Read urhobo Hegae 1 Bible Online

Hegae 1 - urhobo bible

Hegae 1

¹Vwẹ ukpe rivẹ ri Dariọs ovie na, vwẹ emeranvwe resan rọye vwẹ ẹdẹ rẹsosuọ rẹ emeranvwe na, ota rẹ Ọrovwohwo na da wan oma ri Hegae rẹ ọmraro na bru Zerubabẹl rhe ọmọ ri Shealtiẹl, osun ri Juda, kugbe Joshua rẹ ọmọ ri Jehozadak, rẹ orherẹn rode na,

²E nẹ Ọrovwohwo rẹ otuofovwi na tare: Ihwo nana tare nẹ o ji te ọke ra vwọ rhoma bọn uwevwi rẹ Ọrovwohwo na-a.

³Etiyin ota rẹ Ọrovwohwo da wan oma ri Hegae rẹ ọmraro na rhe.

⁴O te ọke rẹ ovwan vwọ bọn iwevwi ra nabọ rhuẹrẹ kẹ oma rẹ ovwan, yẹ uwevwi nana je hẹ erhurhu?

⁵Asakiephana kenẹ Ọrovwohwo rẹ otuofovwi na tare: Gbe roro obo ri wo yeri te.

⁶Wọ kọnre buebu, emerha tutunọ kọye wo vunru; wo ria, ẹkẹvuọvo yu wọ mrẹ obọ ri te we ria-a, wọ da, ẹkẹvuọvo yẹ evun vọn wẹ-ẹ, wo rhuo oma wẹn, ẹkẹvuọvo yẹ oma rẹ ohwo ọvuọvo tuabọ-ọ; ohwo rọ reyọ osa ọ ghwa reyọ nẹ yo phiophihọ ekpo vẹ iphrophro.

⁷Enẹ Ọrovwohwo rẹ otuofovwi na tare: Roro obo ri wo yenri te.

⁸Yanran kpo obo imigbenu na re wọ ra ghwẹ irhe rhe rere wọ rhe bọn uwevwi na, rere oma vwerhe ovwẹ vwọ, rere me vwẹ oma phia vwẹ evun rẹ urinrin mẹ, eriyin Ọrovwohwo na tare.

⁹Wọ guọnọ emu buebu, gbe nọ, emerha tutuno wọ mrẹre, ọke wọ rha vwọ ghwa te uwevwi nu, mi de djuọ kufia. Die sorọ? eriyin Ọrovwohwo rẹ otuofovwi na tare. Fiki rẹ uwevwi mẹ ro hirhe phihọ erhurhu na, yẹ ovwan dohwo duvwevwi rọye ra bọn.

¹⁰Fiki rẹ ọtiọye na odjuvwu rọ obenu wẹ kọ yọnre evwru na, otọ na kọ rha yọnre ogangan ro vwo yovwẹ emu.

¹¹Ke me vwẹ ọkarovwẹ rẹ ame rhe otọ na vẹ igbenu na, ọkarovwẹ rẹ ọka, ọ rẹ udi ọboba, ọ rẹ ọfigbo, ọ rẹ obo rẹ djẹ nẹ otọ cha, ọ rẹ enu rẹ ohwo vẹ eranvwe, ji kugbe owian rẹ obọ rayen ejobi.

¹²Etiyin Zerubabẹl rẹ ọmọ ri Sealtiẹl, kugbe Joshua rẹ ọmọ ri Jehozadak, rẹ orherẹn na, vẹ umuku rẹ ihwo ri chekọ na ejobi, de mu ọghọ kẹ urhuru rẹ Ọrovwohwo Ọghẹnẹ rayen, kugbe eta ri Hegae rẹ ọmraro na, kirobo rẹ Ọrovwohwo Ọghẹnẹ rayen jiro, oshọ rẹ Ọrovwohwo na de mu ihwo na.

¹³Etiyin Hegae, ọyinkọ rẹ Ọrovwohwo na da vuẹ ihwo na ovuẹ rẹ Ọrovwohwo na nẹ, Me vẹ owẹ herọ, eriyin Ọrovwohwo na tare.

¹⁴Ọrovwohwo da kpare erhi ri Zerubabẹl rẹ ọmọ ri Shealtiẹl, osun ri Juda, kugbe erhi ri Joshua rẹ ọmọ ri Jehozadak, rẹ ọrherẹn rode na, kugbe erhi rẹ umuku rẹ ihwo na ejobi ri chekọ ayen da rhe rhi ru iruo vwẹ uwevwi rẹ Ọrovwohwo rẹ ọtuọfọvwi na, Ọghẹnẹ rayen.

¹⁵Vwẹ ẹdẹ uje gbẹ enẹ rẹ emeranvwe na, vwẹ emeranvwe resan.