Read urhobo Hegae 2 Bible Online

Hegae 2 - urhobo bible

Hegae 2

¹Vwẹ ukpe rivẹ ri Dariọs ovie na, vwẹ emeranvwe righwrẹ na, vwẹ ẹdẹ uje gbẹ ọvo rẹ emeranvwe na, ota rẹ Ọrovwohwo da wan oma ri Hegae rẹ ọmraro na rhe.

²Ta ota asakiephana kẹ Zerubabẹl ọmọ ri Shealtiẹl, osun ri Juda, ji kugbe Joshua ọmọ ri Jehozadak, orherẹn rode na, ji kugbe umuku rẹ ihwo na ri chekọ, tanẹ,

³Onọ ri chekọ vwẹ ọhri re ovwan rọ mrẹ uwevwi nana vwẹ erhuvwu rọye rẹ awanre? Komavọ wa rha mrẹ phihọ vwẹ asakiephana? Ọ rha họhọ emu diọdi vwẹ obaro rẹ ovwan?

⁴Dede na vwẹ Asakiephana we gbe yivwaro, E Zerubabẹl, eriyin Ọrovwohwo tare, yivwaro, E Joshua, ọmọ ri Jehozadak, rẹ orherẹn rode na, yivwaro, ovwan ihwo rẹ otọ na ejobi eriyin Ọrovwohwo tare; ru iruo, kidie me vẹ owẹ herọ, eriyin Ọrovwohwo rẹ otuofovwi na tare.

⁵Kerẹ ive re me vẹ ovwan veri vwẹ ọke we vwo nẹ otọ rẹ Ijipt rhe. Erhi mẹ ọ hẹ ohri rẹ ovwan; wa djẹ oshọ-ọ.

⁶Kidie enẹ Ọrovwohwo rẹ otuofovwi na tare: Chekọ esiẹvo, vwẹ ọmọke krẹ emerha, ki mi che kpogho odjuvwu na kugbe akpọ na kugbe abadi na kugbe otọ ọyaya na;

⁷ki mi kpogho ẹgborho na ejobi, rere a vwọ ghwẹ efe rẹ ẹgborho na ejobi rhe, ke me cha ghwa urinrin vọn uwevwi nana, eriyin Ọrovwohwo rẹ otuofovwi na tare.

⁸Idọnọ efuanfon emẹ, oro je ghwa ọmẹ, eriyin Ọrovwohwo rẹ otuofovwi na tare.

⁹Erhuvwu rẹ uwevwi na vwẹ ukuko na ko che yovwi nọ ọ rẹsosuọ, eriyin Ọrovwohwo rẹ otuofovwi na tare; Vwẹ evun rẹ etinẹ na ke me kẹ ovwan oyovwe, eriyin Ọrovwohwo rẹ otuofovwi na tare.

¹⁰Vwe ẹdẹ uje gbẹ ẹne rẹ emeranvwe rirhiri na, vwẹ ukpe rivẹ ri Darios, ota rẹ Ọrovwohwo na da wan oma ri Hegae rẹ ọmraro rhe.

¹¹E nẹ Ọrovwohwo rẹ otuofovwi na tare. Nọ irherẹn na re ayen kpahe phihọ enanọ nana.

¹²Ọ da dianẹ ohwo ọvo vwẹ abọ rẹ ewu rọye phare uvwo rẹ eranvwe ọfuanfon, o da vwẹ ikara te orhọn rẹ ewu rọye, eyẹ ukodo, eyẹ iwani, eyẹ ọfigbo, eyẹ oka rẹ emuọre ọfa, ko je rhoma fon ọfa? Irherẹn na da kpahe nẹ, Ẹjo

¹³Etiyin Hegae da ta, Ọ da dianẹ ohwo ọvo gbe ẹgua fiki rẹ obo rọ vwọ vwẹ oma te orivwi ọ da rha vwẹ oma te enana, kọ rhoma gbe ẹgua? Irherẹn na da kpahe, E, ọ rhoma gbe ẹgua.

¹⁴Etiyin Hegae da ta, Ọtiọye ọ epha kẹ ihwo nana, vẹ ẹgborho nana vwẹ obaro me, eriyin Ọrovwohwo na tare: ọtiọye ọ je epha kẹ iruo kiruo rẹ abọ rayen, obọ rẹ ayen zeri vwẹ etiyin na emu rẹ ẹgua.

¹⁵Me rẹ wẹ, gbe roro obo re cha phia kẹ inonẹ yanran. Bẹsiẹ re che vwo mu oragha ohwohwo kpahe ohwo vwẹ uwevwi rẹ Ọrovwohwo na.

¹⁶Mavọ eyere rẹ ovwan epha? Siẹ rẹ ohwo ọvo da yan te asan rẹ ovwanvwọn uje epha jovwo, ihwe ọvo kọye herọ; siẹ rẹ ohwo ọvo de te okọ ri vain re ọ jẹ ovwanvwọn ujuvẹ gbe ihwe reyọ, uje ọvo kọye ọ cha mrẹ.

¹⁷Me vwẹ uvo ọgangan ve imicho vwọ ghwọrọ owẹ vẹ ekankọn ri nẹ otọ wẹn cha ejobi kugbe owian rẹ abọ wẹn, dede na wo rhivwi bru vwe rhe-e, eriyin Ọrovwohwo na tare.

¹⁸Roro kpahe ẹdẹ ri nonẹ na, nẹ ẹdẹ uje gbẹ ẹne rẹ emeranvwe rirhiri na yanran. Nẹ ẹdẹ ra vwọ vwẹ uchivwo rẹ uwevwi rẹ Ọrovwohwo na vi rhe, roro;

¹⁹Kẹ ibi rẹ emamọ na je hẹ erhu? Ki vain, vi fig, kugbe pomegranate, kugbe urhe rẹ oliv gbe je mọ emuọvo-o? Ki nonẹ yanran ki mi bruphihọ kẹ wẹ.

²⁰Ota re Ọrovwohwo na de bru Hegae rhe obọ rivẹ vwẹ ẹdẹ uje gbẹ ẹne rẹ emeranvwe na.

²¹Ta kẹ Zerubabẹl, osun ri Juda, tanẹ, Mi che rhi kpogho odjuvwu vẹ akpọ na,

²²ke kporo ekete rẹ uvie she, Me cha guọghọ ogangan rẹ uvie vẹ ẹgborho na, e mi geri ekpẹrẹ na vẹ otu re gua ayen she teye otọ, ọlọkọ rẹ ọrivẹ rayen kọye cha nyavwe ọrivẹ she.

²³Vwẹ ẹdẹ yena, eriyin Ọrovwohwo rẹ otuofovwi na tare, ke me reyọ owẹ, E Zerubabẹl odibo mẹ, ọmọ ri Shealtiẹl eriyin Ọrovwohwo tare, ki nu ru we kerẹ ubiosa, kidie Me jẹ wẹ reyọ nure, eriyin Ọrovwohwo rẹ otuofovwi na tare.