Read urhobo Zekaraya 1 Bible Online

Zekaraya 1 - urhobo bible

Zekaraya 1

¹Vwẹ emeranvwe, rẹ ẹrenre vwẹ ukpe rivẹ ri Dariọs, ota rẹ Ọrovwohwo de bru Zekaraya ọmọ rẹ Bẹrẹkaya rhe, ọmọ rẹ Iddo, ọmraro na, ta nẹ,

²Ọrovwohwo mu ophu rẹ ese rẹ ovwan gangan

³Ọtiọye na gba ta kẹ ayen, E nẹ Ọrovwohwo rẹ otuofovwi tare, We rhivwi bru uvwe rhe, Ọrovwohwo rẹ otuofovwi tare, ki mi che rhivwi bru ovwan rhe, Ọrovwohwo rẹ otuofovwi na tare.

⁴Wa họhọ esẹ rẹ ovwa-an, e rẹ emraro rẹsosuọ kperi phia kẹ, E nẹ Ọrovwohwo rẹ otuofovwi tare, We rhivwi nẹ idjerhe umwemwu rẹ ovwan vẹ uruemu ebrabra rhe. Ẹkẹvuọvo ayen nyo vwe-e, ayen je kerhọn mẹ-ẹ, Ọrovwohwo tare.

⁵Esẹ rẹ ovwan na, kẹ rho? Kugbe emraro na, kẹ ayen sa dia bẹdẹ?

⁶Ẹkẹvuọvo eta mẹ vẹ iji Me, ri mi ji kẹ idibo mẹ emraro na, o rhe mu ese re ovwan? Eriyin ayen de kurhẹriẹ ta, kirobo rẹ Ọrovwohwo rẹ otuofovwi rori nẹ ọye ru avwanre fiki rẹ idjerhe vẹ uruemu rẹ avwanre na, ọtiọye o ghine ru avwanre.

⁷Vwẹ ẹdẹ ruje gbẹ ẹne re emẹranvwe rẹ ruhwọvo rọ dia emeranvwe rẹ Ọrianre, vwẹ ẹgbukpe rivẹ ri Dariọs, ota rẹ Ọrovwohwo de bru Zekaraya ọmọ rẹ Bẹrẹkaya, ọmọ rẹ Iddọ, ọmraro na rhe; Zekaraya da ta,

⁸Me mrẹ ọshare ọvo vwẹ ason, nighe ọ gua iyesi ọvwavware ọvo! O mudia vwẹ ohri rẹ irhe vwẹ iyara ọhwahwa na; iyesi evwavware, iri mune-mune vẹ efuanfon he obuko rọye.

⁹Ọye Me da ta, Enana kidie vwo, Ọrovwohwo? Amakashe ro nene uwe ta ota na da ta kẹ vwẹ, mi che dje obo rẹ ayen epha kẹ wẹ.

¹⁰Eriyin ohwo ro mudia vwẹ ohri rẹ irhe na da kpahe, Enana otu rẹ Ọrovwohwo jiri nẹ iki akpọ na.

¹¹Ayen ke kpahe kẹ amakashe rẹ Ọrovwohwo ro mudia vwẹ ohri rẹ irhe na, Avwanre ki akpọ na nure, gbe nighe, akpọ na ejobi epha riẹi.

¹²Ọye amakashe re Ọrovwohwo da ta, E Ọrovwohwo rẹ otuofovwi mavọ okrite wo ki ni arodọvwẹ ri Jerusalem vẹ irere ri Juda ri wo mu ophu kpahe ikpe ujorha gbe ihwe re na?

¹³Ọrovwohwo da kpahe eta esiri vẹ uchebro kẹ amakashe ro nene uvwe ta ota na.

¹⁴Etiyin na amakashe ro nene uvwe ta ota na da ta kẹ vwẹ, kperi phia, E nẹ Ọrovwohwo rẹ otuofovwi tare. Me reoma kpahe Jerusalẹm vẹ Zayọn gangan.

¹⁵Ẹgborho re hẹ ofuvwegbe na ivun rayen miovwo uvwe gangan, kidie ọke re ivun de ghwe miovwo uvwe emerha ẹgborho efa ki di hwe ayen.

¹⁶Ọtiọye na, e nẹ Ọrovwohwo tare, mi rhivwi rhe Jerusalẹm vẹ arodọvwẹ; a cha bọn uwevwi Mẹ phihọ, Ọrovwohwo rẹ otuofovwi na tare, ka cha riẹn ufi rẹ ovwanvwọn wan Jerusalẹm vrẹn.

¹⁷Rhoma kperi, E nẹ Ọrovwohwo rẹ otuofovwi tare, irere mẹ cha rhoma vọn vẹ oyouvwe, Ọrovwohwo cha rhoma vwẹ uchebro kẹ Zayọn ọ je cha rhoma je Jerusalẹm reyọ.

¹⁸Me kparo me da mrẹ, gbe nighe ighoro ẹne!

¹⁹Me da ta ke amakashe ro nene uvwe ta ota na, Enana kidie vwo? Ọ da kpahe kẹ vwẹ, Enana ighoro re hra Juda, Izrẹl, kugbe Jerusalẹm na.

²⁰Ọye Ọrovwohwo de dje idjogu ẹne kẹ vwẹ.

²¹Me da ta, Die enana yan cha che ru? Ọ da kpahe, Enana ighoro re hra Juda na, rẹ ohwo jẹ uyovwi rọye ẹsa-kparọ, enana rhere rhe vwẹ oshọ mu ayen, rhi vwo mu ighoro rẹ ẹgborho na tehe otọ e re kpare ighoro rayen kpenu kpahe otọ ri Juda re hra na.