Read urhobo Zekaraya 10 Bible Online

Zekaraya 10 - urhobo bible

Zekaraya 10

¹Nọ ekpẹn rẹ osio mie Ọrovwohwo vwẹ ọke-evwru, mie Ọrovwohwo rọ ru ogiribo vẹ egho rọ vwẹ eghwẹghwẹ re osio kẹ ihwo, rọ nẹrhẹ ẹbe djẹ vwẹ udju ri kohwo kohwo,

²Kidie ama ta ogbeta, emraro je mrẹ efian rhe, evwerhẹewerhẹ ta evwerhẹ re efian ọ me kẹ uchebro ofefe. Ọtiọye na ihwo na da hra kerẹ igegede; a wan ayen oma kidie ayen vwo osuigegede-e.

³Ophu mẹ tua kpahe isuigegede na, mi che ru isun na gangan; kidie Ọrovwohwo rẹ otuofovwi vwẹ ẹro rẹ igegede rẹ uwevwi ri Juda, re dia igodẹ rọye na, ọ cha vwẹ ayen yoma vwẹ evun rẹ ofovwi

⁴Oma rayen oragha rẹ ubienyẹ che nu rhe, oma rayen ichivwo rẹ utughẹ che nu rhe, oma rayen umurhabọ rẹ ofovwi che nẹ cha, oma rayen osun kosun che nẹ cha.

⁵Ayen che kuomagbe dia kerẹ egba vwẹ ofovwi, de chihi ivwighrẹ na phihọ ibehre rẹ irhuvwu na ayen cha họnre fikiridie Ọrovwohwo vẹ ayen herọ, kẹ ayen che kpogho otu re djẹ iyesi na.

⁶Me cha kẹ uwevwi ri Juda ogangan, mi ji che sivwi uwevwi ri Josẹf. Me cha ghwẹ ayen hirhe rhe fikiridie mi ni aruẹdọn rayen, ayen ke cha dia kerẹsiẹ rẹ a mrẹ nẹ Me je sen ayen dẹvo-o; kidie mẹvwẹ hẹ Ọrovwohwo Ọghẹnẹ rayen mi che nyo kẹ ayen.

⁷Etiyin re Ifrem kọ cha họhọ ọgbọfovwi rode, udu rayen cha ghọghọ kerẹsiẹ ra mrẹ nẹ ayen da wain. Emọ rayen da mrẹ, oma kọ vwerhe ayen, udu rayen ke ghọghọ vwẹ evun rẹ Ọrovwohwo na .

⁸Me riẹn obọ kẹ ayen mi de koko ayen hẹ uwevwi, kidie Me tan ayen hirhe nure, ayen ki bu kirobo rẹ ayen buru jovwo.

⁹Owenẹ Me hra ayen phihọ ohri rẹ ẹgborho na, yẹn ayen cha karohọ ovwẹ vwẹ orho shesheri na, ayen vẹ emọ gba dia ji rhivwi rhe.

¹⁰Mi che si ayen nẹ otọ rẹ Ijipt rhe uwevwi, koko ayen ne Asiria rhe, Me Me vwẹ ayen rhe otọ rẹ Giliad vẹ otọ ri Lebanọn, bẹsiẹ re asan vwo jẹ ayen ẹgba.

¹¹Ayen cha wan urhie rẹ Ijipt vrẹn, ka teye ọgbogho rẹ urhie na, ru ikokodo rẹ Nile ejobi yamu. A vwẹ eheri rẹ Asiria totọ, ọkpọ rẹ uvie rẹ Ijipt gbe dia-a.

¹²Mi ru ayen goma vwẹ evun rẹ Ọrovwohwo ayen che vwo urinrin vwẹ ode rọye, Ọrovwohwo tare.