Read urhobo Zekaraya 14 Bible Online

Zekaraya 14 - urhobo bible

Zekaraya 14

¹Gbe nighe, ẹdẹ rẹ Ọrovwohwo cha re, ra cha vwọ ghare emu ra ghwẹ mie ovwan vwẹ ohri rẹ ovwan.

²Kidie Me cha ghwẹ ẹgborho na ejobi koko vwo phi Jerusalẹm ka reyọ orere na ka ghwẹ ekuakua rẹ uwevwi na reyọ ke gbe eya na ẹgua abọvo re orere na ko kpo imu, yẹ ẹkẹvuọvo e gbi si otu re ihwo ri chekọ nẹ orere na-a.

³Etiyin re Ọrovwohwo kọ yan phia vwọ so ẹgborho yena kirobo rọ họnre vwe ẹdẹ rẹ ofovwi na

⁴Vwẹ ẹdẹ yena awọ rọye ki che mudia enu rẹ Ugbenu rẹ Oliv rọ hẹ obaro ọnre vwi Jerusalẹm; Ugbenu rẹ Oliv kọ cha bẹre ẹbẹre ivẹ nẹ obaro ọnre re duvwu obuko ọnre ko vwo iyara rode na, eriyin re abọvo rẹ Ugbenu na ko bi kpo obọhwẹre ọnre, ẹbere rivẹ kẹ obọrhe ọnre.

⁵Iyara rẹ igbenu Mẹ ki gbe, kidie iyara rẹ igbenu ki te akakọ rọye, wa cha djẹ kirobo rẹ ovwan djẹre vwẹ ọke re otọ vwo kpogho vwẹ ọke rẹ Uzzaya vwọ he ovie ri Juda. Etiyin Ọrovwohwo Ọghẹnẹ kọ cha rhe, otu efuanfon na ejobi ki tue nene rhe.

⁶Vwẹ ẹdẹ yena ekpahe vẹ imicho gbe dia-a.

⁷Ọke rha fobọ she-e, Ọrovwohwo riẹnre ọ dia uvo-o, ọ je dia aso-on kidie urhukpẹ cha dia vwẹ ọke rẹ ovwọnvwọn.

⁸Ame ra arhọ cha djẹ nẹ Jerusalẹm rhe vwẹ edẹ yena, ubrọvo rayen da djẹ kpo urhie rọ he obaro ọnre ubrọvo rayen da djẹ kpo urhie rẹ obuko ọnre, ọ cha djẹ vwẹ ọkiuvo kerẹ ọke ohwahwa.

⁹Ọrovwohwo kọ dia ovie rẹ akpọ na ejobi, vwẹ ẹdẹ yena Ọrovwohwo kọ dia ọvo odẹ rọye kọ dia ọvo.

¹⁰Otọ na ejobi ko che shaton nẹ Ọrha re te Rimmọn vwẹ obọrhe ọnre vwi Jerusalẹm. Ẹkẹvuọvo Jerusalẹm ko che kpenu vwẹ ẹdia rọye nẹ Unurhoro re Bẹnjamin re te asan rẹ unurhoro rẹ awanre na epha, re te Unurhoro rẹ Akako, nẹ ohẹrhẹ ri Hananel re te okọ re de mie wain rẹ ovie.

¹¹Ka cha dia, kidie ekan gbe cha dia ọfa-a; Jerusalẹm cha dia vwẹ ofuvwegbe.

¹²Ọnana emiavwe rẹ Ọrovwohwo che vwo hwe ihwo re vwẹ ofovwi so Jerusalẹm oma rayen che gbo yẹ ayen vwẹ awọ rayen mudia, ẹro rayen che gbo phihọ evun ẹrevwe rayen ji gbo vwe unu rayen.

¹³Vwẹ ẹdẹ yena anegbe rode ko nẹ obọ re Ọrovwohwo rhe rhi she teye ayen, aye ohwohwo ke yọnrọn ohwohwo obọ, aye ohwohwo ke cha họnrọ ohwo.

¹⁴Juda dede cha họre Jerusalẹm. Ka cha ghwẹ efe rẹ ẹgborho re yariẹ rẹ phihọ na ejobi koko, iro, idọnọ efuanfon, vẹ emwa buebu.

¹⁵Emiavwe kerẹ emiavwe tiọnana ko mu iyesi, irhue, kamẹl, ekẹtẹkẹtẹ, kugbe eranvwe ke eranvwe re hẹ erhọn yena.

¹⁶Eriyin na ohwo kohwo rọ rhọre vwẹ ẹgborho re vwọ so Jerusalẹm ejobi me yanran kukpe kukpe ra ga Ovie na, Ọrovwohwo rẹ otuofovwi na, ọ me re orẹ rẹ egarivi na.

¹⁷Ọ da dianẹ ikru rẹ akpọ rha yanran kpo Jerusalẹm ra ga Ovie, Ọrovwohwo rẹ otuofovwi na-a, osio gbe rhọ kẹ aye-en.

¹⁸Ọ da je dianẹ ekru rẹ Ijipt gbe yanran ra vwẹ oma rayen nẹ-ẹ, emiavwe rẹ Ọrovwohwo vwo mu ẹgborho ri je orẹ rẹ egarivi na era ko ji mu ayen.

¹⁹Ọnana kọ dia ehwe rẹ Ijipt vẹ ehwe rẹ ẹgborho na ejobi ri je orẹ rẹ egarivi na ẹra.

²⁰Vwẹ ẹdẹ yena ke che si phihọ igogo rẹ iyesi na nẹ, Ọfuanfon ke Ọrovwohwo. Ẹchẹ rẹ uwevwi rẹ Ọrovwohwo ke họhọ idjokpo re hẹ obaro rẹ agbada na;

²¹ochẹ kochẹ ri Jerusalẹm vẹ Juda cha dia fuanfon kẹ Ọrovwohwo rẹ otuofovwi na, rere ihwo re cha gọ iye ejobi vwọ reyọ ayen vwo chere emu re iye. Ọneki gbe rha dia vwẹ uwevwi rẹ Ọrovwohwo rẹ otuofovwi na vwẹ ẹdẹ yena ọfa-a.