Read urhobo Zekaraya 3 Bible Online

Zekaraya 3 - urhobo bible

Zekaraya 3

¹Etiyin ọ ke vwẹ Joshua orherẹn ro kpenu na nẹ vwẹ ro mudia vwẹ obaro rẹ amakashe rẹ Ọrovwohwo na, Idẹbono mudia vwẹ obọrhe rọye ro vwo guo.

²Ọrovwohwo da ta kẹ Idẹbono, Ọrovwohwo ghwọ ku uwe, E Idẹbono! Ọrovwohwo rọ jẹ Jerusalẹm reyọ nure na ghwọ ku uwe! Ọnana dia utuerhanre re si nẹ erhanre rhe-e?

³Ọke yena Joshua mudia vwẹ obaro rẹ amakashe na, ọ vwẹ iwun igbegbe rhuo.

⁴Amakashe na da ta kẹ otu ri mudia vwẹ obaro rọye, Wa ghwiẹ iwun igbegbe na no oma. Ọ da ta kẹ, nighe, mi si orukuruku wẹn nẹ uwe oma, Me cha vwẹ omamọ rẹ amwa rhuo we.

⁵Me da ta, Jẹn ayen vwẹ ubierhu ọtantan tughẹ uyovwi rọye. Eriyin aycn da vwẹ ubierhu ọtantan tughẹ uyovwi rọye e de ku iwun rọye phihọ; ye amakashe rẹ Ọrovwohwo na mudia kẹrẹ.

⁶Amakashe rẹ Ọrovwohwo de ji urhi kẹ Joshua,

⁷E nẹ Ọrovwohwo re otuofovwi na tare. Wọ da yan vwẹ idjẹrhe Mẹ wọ da yọnrọn urhi Mẹ, ku wo sun uwevwi Mẹ ku wọ vwẹ ẹro te ọguan mẹ ke Me kẹ wẹ uphẹ vwẹ ohri rẹ otu ri mudia etinẹ na.

⁸Gbe nyo asakiephana, E Joshua orherẹn ro kpenu na, wọwẹ vẹ igbeyan wẹn ri tidia obaro wẹn, kidie ayen ihwo ri vwẹ oka esiri; nighe, Me Oghọn rọ dia odibo mẹ na rhe.

⁹Kidie gbe nighere, vwẹ enu rẹ oragha mi vwo mu vwẹ obaro ri Joshua na, vwe enu rẹ oragha ọvuọvo rọ vwẹ epharo ighwrẹ na, Me cha tọn odẹ rọye phihọ, Ọrovwohwo rẹ otuofovwi na tarọ, ki mi si abe rẹ otọ na no ẹdọke ọvo.

¹⁰Vwẹ ẹdẹ yena, Ọrovwohwo rẹ otuofovwi tare, dohwo dọrivẹ rọye ko che se kpo obotọ rẹ vain rọye vẹ obotọ rẹ owe rọye.