Read urhobo Matiu 12 Bible Online

Matiu 12 - urhobo bible

Matiu 12

¹Vwẹ ọke yena Jesu kọ wan ugbeka vrẹn vwẹ edidjala; owẹvwe ko hwe idibo rọye, ayen ke kọrọ eka eboba na ria.

²Ẹkẹvuọvo ọke rẹ otu ri Farisi vwọ mrẹ, ayen da ta kẹ nẹ, Nighe idibo wẹn ruẹ obo ri jefo vwẹ edidjala.

³Ẹkẹvuọvo ọ da ta kẹ ayen nẹ, Ovwan ji se-e, obo ri Devid ruru vwẹ ọke rẹ owevwe vwo hwe kugbe ikru rọye-e;

⁴Obo rọ ro uwevwi rẹ Ọghẹnẹ, ọ da re ikara re vwo ze izobo, ro fori kẹ rọ re-e, eyẹ ikru rọye-e, jokpa rẹ orherẹn ọvo?

⁵Eyẹ we ji se vwẹ ẹbe rẹ urhi na, nẹ orherẹn de ru iruo rẹ ẹga vwẹ evun rẹ uwevwi rẹ ẹga vwẹ ẹdidjala yọ chọ urhi?

⁶Ẹkẹvuọvọ me ta kẹ ovwan nẹ, ohwo ọvo rọ rho nọ uwẹvwi rẹ ẹga na hẹ etinẹ.

⁷Ọ da dianẹ ovwan riẹ otọ rẹ ota nana, me guọnọ aruẹdọn ọ dia izobo-o, mane ovwan gbi se brorhiẹ hwe ọ rọ re ase-e.

⁸Kidie Ọmọ rẹ ohwo ọye olori rẹ ẹdidjala.

⁹O de vrẹn nẹ etiyin, o de kpo Sinagọg rẹ ayen;

¹⁰Nighe ohwo ọvo ro ghwobo hẹ etiyin. Ayen da nọ nẹ, ofori re vwo sivwi ohwo vwẹ edidjala? rere ayen vwọ mrasan muo.

¹¹Ọ da ta kẹ ayen nẹ, Ono vwẹ usun rẹ ovwan na, ro vwo ogegede ọvo, rọ da vabo she phihọ ọgọdọ vwẹ ẹdidjala, ro de je siono?

¹²Kẹ ohwo rẹ akpọ rọ ghare nọ ogodẹ; Eriyin ofori re e ru obo ri yoma vwẹ ẹdidjala.

¹³O da ta kẹ ọ ro ghwobọ na nẹ, Riẹn obọ wẹn. Ọ da ghine riẹn, ọ da ghwa riẹn kerẹ ọrivẹ na.

¹⁴Ẹkẹvuọvo otu ri Farisi na da yanran ra jẹ iroro rẹ obo rẹ ayen vwo hwe.

¹⁵Jesu vwọ riẹn ọna re, o de si oma te uko; ihwo buebu de nene, o de sivwi ayen ejobi.

¹⁶O de ji urhi kẹ ayen nẹ e tue ọye phia-a.

¹⁷Rẹ obo rẹ Aizaya mraro na vwọ mrasan gba rọ tare nẹ,

¹⁸Nighe, odibo mẹ re me jẹreyọ, Ọ ro je vwe rẹ ivun rọye vwerhe ovwẹ; Ki mi phi Erhi mẹ phihọ evun roye. Kọye brorhiẹ rẹ Ikeferi.

¹⁹Ọ cha pharhe-e, siẹvo kẹ ekpẹre-e; Eyẹ ohwo che nyo urhuru rọye vwẹ otafe-e.

²⁰O che vwirhi ugbẹn rẹ eyareya-a, Eyẹ o che se fu umwerhanre-e, Bẹsiẹ ro che vwo brorhiẹ na ejobi kparobọ.

²¹Odẹ rọye Ikeferi na ejobi cha vwẹ ẹro so.

²²Etiyin e de mu ohwo ọvo ro vwo erhi rẹ idẹbono vwo rhe, orhuẹro kugbe odiunu, o de sivwo, o de nyo ẹme ọ da ta ota.

²³O de gbe ihwo na ejobi unu, ayen da ta nẹ, Ọnana dia ọmọ ri Devid na?

²⁴Ẹkẹvuọvo otu ri Farisi vwo nyo, ayen da ta nẹ, Ohwo nana di gheghe djẹ idẹbono-o ẹkẹvuọvo vwẹ ogangan ri Bẹlzibọl onotu rẹ idẹbono.

²⁵Ọ vwọ riẹn iroro rayen, ọ da ta kẹ ayen nẹ, uvie da ghare omobọ rọye, kọ hra, orere da vwọ so omobọ rọye ko she.

²⁶Ọ da dianẹ Idẹbono da djẹ Idẹbono phia, yọ ghare oma; komavọ uvie rọye se vwo mudia?

²⁷Ọ da dia ogangan ri Bẹlzibọl me vwọ dje idẹbono phia, kẹ ogangan rẹ ono emọ rẹ ovwan rha vwọ djẹ? Ovwan ọvo gbe brorhiẹ yena.

²⁸Ẹkẹvuọvo o da dia Erhi rẹ Ọghẹnẹ me vwọ djẹ idẹbono, yẹ uvie rẹ odjuvwu te ovwan oma re.

²⁹Mavọ ohwo vwọ sa ro uwevwi rẹ ọgba ro de miovwi emu rọye? Kọ ka gba ọgba na tavwe rẹ obọ rọye ki te emu rọye miovwi.

³⁰Ohwo rọ vẹ ovwẹ hẹ obọ-ọ yọ vwo so vwẹ; ohwo rọ vẹ ovwẹ gbeje koko-o yọ hra kufia.

³¹Eriyin na me ta kẹ ovwan nẹ, kumwemwu kumwemwu rẹ ihwo ruru ejobi e vwo ghovwo, ẹkẹvuọvo ọ ro ru umwemwu kpahe Erhi Ọfuanfon na e se vwo ghovwo-o.

³²Kohwo kohwo rọ ta ota omiomiovwi kpahe ọmọ rẹ ohwo e vwo ghovwo, ẹkẹvuọvo ọ rọ ta ota omiomiovwi kpahe Erhi Ọfuanfon na e se vwo ghovwo-o.

³³Ru urhe yovwi rere emamọ rọye vwerhe; eyẹ gbe ru urhe na miovwi rere emamọ rọye miovwi; Kidie emamọ rẹ urhe ọye e vwo vughe.

³⁴Ovwan uvwiẹ rẹ erọdekọ na, re pha brabra miomiovwi na, sa vwọ ta ota rẹ esiri, kidie obo rẹ ohwo rori vwẹ evun ọye ọ ta phia vwẹ unu rọye.

³⁵Ohwo esiri vwenẹ, emu esiri ro vwori ọ vwọ kẹ ihwo; ohwo ọbrabra vwenẹ, emu obrabra rọ vwori ọye ọ je vwọ kẹ Ihwo rhe.

³⁶Me ta kẹ ovwan nẹ, omota rẹ ọdẹ rẹ ovwan tare ejobi e vwo gu ẹdjọ rẹ ovwan.

³⁷Ota re wọ tare e vwo brorhiẹ hwe we, ọye e ji vwo bru kẹ wẹ.

³⁸Evo vwẹ isiẹbe na kugbe Farisi na da ta kẹ nẹ, Oyono, avwanre guọnọ oka nẹ obọ wẹn rhe.

³⁹Ẹkẹvuọvo ọ da ta kẹ ayen nẹ orua umwemwu na kugbe evwọnrọn efian na, ovwan guọnọ ọka, a sa vwẹ oka kẹ ovwan, jokpa rẹ oka ri Jona rẹ ọmraro na.

⁴⁰Kirobo ri Jona dia evun rẹ eri ẹdẹ erha na, ọtiọye Ọmọ rẹ ohwo cha dia ẹdẹ erha vwẹ evun rẹ otọ.

⁴¹Ihwo ri Ninive cha vwẹ orua nana guẹdjọ rẹ ayen de bru hwe. Kidie ayen kurhẹriẹ vwẹ oma rẹ eyono ri Jona; Gbe nighe, ọ rọ rho nọ Jona hẹ etinẹ.

⁴²Ovie rẹ aye, Sheba cha vwẹ orua nana guẹdjọ ro de bru hwe; Kidie o nẹ oba rẹ akpọ rhe ri yono ẹghwanre ri Solomọn; gbe nighe, ọ rọ rho nọ Solomọn hẹ etinẹ.

⁴³Ẹkẹvuọvo erhi ri jẹfuọn, de nẹ evun rẹ ohwo nu, ọ me yanrhẹ yankpo ra guọnọ asan rọ dia, ọ gbe mrẹ-ẹ.

⁴⁴Kọ ta kẹ oma rọye nẹ, mi rhivwi kpo uwevwi ri mi nurhe jovwo; ọke ro vwo te etiyin, ọ da mrẹ ofefe e hwerhire, a rhuẹrero fia.

⁴⁵Ko rhivwi yanran, ọ me ra reyọ erhi ighwrẹ efa re bra nọ ekpuyovwi rọye, ayen me ro evun rọye rhe dia. Eyenre rẹ ohwo na vwẹ ukuko na mi rhi miovwi nọ ọ rẹsosuọ. Ọtiọye orua nana cha dia.

⁴⁶Rọ ghwa vwọ ta ota na kẹ ihwo na, oni rọye kugbe imoni rọye de mudia vwẹ otafe re guọnọ ta ota kẹ.

⁴⁷Ohwo ọvo da ta kẹ nẹ, Nighe oni wẹn kugbe imoni wẹn i mudia vwẹ obo otafe re guọnọ owẹ mrẹ.

⁴⁸Ẹkẹvuọvo ọ da ta nẹ, Ono hẹ oni mẹ kugbe imoni mẹ?

⁴⁹Ọ da riẹn obọ phihọ idibo rọye, ọ da ta nẹ, Nighe oni mẹ kugbe imoni mẹ!

⁵⁰Kidie ohwo kohwo ro ru ẹguọnọ rẹ Ọsẹ mẹ rọ hẹ obo odjuvwu, ọye hẹ oniọvo mẹ rẹ oshare kugbe ọ rọ ọmọtẹ kugbe oni mẹ.