Read urhobo Matiu 14 Bible Online

Matiu 14 - urhobo bible

Matiu 14

¹Vwẹ ọke yena Hẹrọd ovie na de nyo usi ri Jesu.

²Ọ da ta kẹ idibo rọye nẹ, Ọnana Jọn ri Baptist ri vrẹn nẹ ughwu na, kọye o vwo ru iruo rẹ igbunu na.

³Kidie Hẹrọd mu Jọn, ọ da gba, o de muo phihọ uwodi, fiki ri Hẹrodias aye ri Filip oniọvo rọye.

⁴Fikiridie Jọn sen kẹ nẹ, o fori wọ vwọ reyọ aye rẹ oniọvo wẹ vwọ rọvwọ-ọ.

⁵Ọ da guọnọ hwe, oshọ ko muo, fikiridie ihwo na ejobi rhọvwere nẹ ọmraro o ruẹ.

⁶Ọke rẹ ẹdevwiẹ ri Hẹrọd vwo te, ọmọtẹ ri Hẹrọdias de rhi gbe eha, eha na da vwerhe Hẹrọd gangan.

⁷Etiyin o de ve, o de ji duvwu iyori nẹ, kemu kemu wọ nọre ejobi me vwọ kẹ wẹ.

⁸Rẹ oni rọye vwo nyo, ọ de yono, ọ da rhe nẹ, kẹ vwẹ uyovwi ri Jọn ri Baptist vwẹ ọsete.

⁹Ivun de miovwi ovie na; ẹkẹvuọvo fiki rẹ iyori ro duvwuru kugbe omaẹvuọ rẹ ihwo re vẹ ọye gbe tidia udemu na, ọ gbe sa sen kẹ-ẹ.

¹⁰O de ji ikọn kpo obo uwodi re bru ohọre ri Jọn ri Baptist.

¹¹E de mu uyovwi rọye rhe vwẹ evun rẹ ọsete, e de muo kẹ ọmọ na, o de re muo kẹ oni rọye.

¹²Idibo rọye da rhe ri mu orivwi rọye re shi; ayen da rhe vuẹ Jesu.

¹³Ọke ri Jesu vwo nyo, ọ da ro okọ; ọ da reyọ oma kpo evun rẹ aton; rẹ ihwo buebu na vwo nyo, ayen da vwẹ owọ yan nẹ irere na bro rhe.

¹⁴Rọ vwo rhe, ọ da mrẹ ihwo buebu, aro da dọn, o de sivwi ayen.

¹⁵Rẹ ovwọnvwọn vwo te, idibo rọye de bro ra ta kẹ nẹ, Ọnana aton, yẹ ọke na ji kpo re gbe jẹn ihwo na yanran kpo obo ọko na ra guọnọ emu dẹ rẹ.

¹⁶Jesu da ta kẹ ayen nẹ, o gbi fo re ayen kpo-o; ovwan vwẹ emu kẹ ayen re.

¹⁷Ayen da ta kẹ nẹ, avwanre vwo ikara iyori kugbe imiyeri ivẹ.

¹⁸Ọ da ta nẹ, ovwan vwẹ ayen rhe vwe.

¹⁹Ọ da ta kẹ ihwo na nẹ, ovwan tidia te otọ vwẹ enu rẹ odi; ọ da reyọ ikara iyori na kugbe imiyeri ivẹ na, ro vwo ni odjuvwu, ọ da nẹ ẹrhovwo, o de bru ikara na vwọ kẹ idibo rọye nẹ a vwọ kẹ ayen.

²⁰Ayen ejobi da re evun da vọn ayen, ayen de gbeje ivwuvwu na koko, e da vọn ibere ihwivẹ.

²¹Ihwo re re emu na da dia uriori iyori, eya vẹ imitete kugbe aye-en.

²²Siẹvuọvo na o da ta nẹ idibo rọye rọ okọ rere ayen bi kpo ẹbẹre rivẹ, re ọye ọvo siobọ nẹ ihwo na kpo.

²³Rẹ ihwo na vwo kpo nu, ọye ọvo de kpenu rẹ ugbenu ra nẹ ẹrhovwo; ovwọnvwọn rhi vwo te, kọye ọvo ri chekọ.

²⁴Ẹkẹvuọvo yẹ okọ na hẹ obọ uherevie rẹ abadi, abadi na kọ họnra ayen gangan, fiki rẹ odju ro djuẹ na.

²⁵Rẹ ọke vwo muegbe rhie, o de bru ayen rhe, ọ rọ yan vwẹ enu rẹ abadi.

²⁶Idibo rọye vwọ mrẹ rọ vwọ yan vwẹ enu rẹ abadi, oshọ de mu ayen, ayen de kperi nẹ ayen mrẹ erivwi.

²⁷Siẹvuọvo na Jesu da ta kẹ ayen nẹ, udu rẹ ovwan fọ, Mẹvwẹ e jẹn udu bru ovwa-an.

²⁸Pita da ta kẹ nẹ, Ọrovwohwo, ọ da dia owẹ, gbe jẹn uvwe yan bru we rhe vwẹ enu rẹ ame na.

²⁹Jesu da ta kẹ nẹ, Mo. Pita de nẹ evun rẹ okọ rhe, ko yanran vwẹ enu rẹ ame na, kpo asan ri Jesu epha.

³⁰Ẹkẹvuọvo ọke rọ vwọ mrẹ abadi rọ họnra kugbe odju ro djuẹ, oshọ de muo; ko divwẹ, o de bunu nẹ, Ọrovwohwo sivwi uvwe.

³¹Siẹvuọvo na ọ da yọnrọn, ọ da kparọ, ọ da ta kẹ nẹ, esegbuyota wẹn hanvwe nọ, die nẹrhẹ owẹ vwo iroro ivẹ?

³²Ayen vwọ ro evun rẹ okọ nu, odju na de fue.

³³Ihwo re hẹ evun rẹ okọ na da vwarọ, ayen da ta nẹ, Uyota, ọmọ rẹ Ọghẹnẹ wo ghine ruẹ.

³⁴Rẹ ayen vwọ samu nu, ayen de rhi te orere ri Gẹnẹsarẹt.

³⁵Ọke rẹ ihwo na vwo vughe, ayen de ji ihwo ro orere na ejobi, ayen de mu ihwo re mwa ọga bro rhe;

³⁶ayen da rẹ rere ayen vwẹ obọ te ewun rọye; uche ihwo re vwẹ obọ te ejobi, oma rẹ ayen de ghwe kpo.