Read urhobo Matiu 16 Bible Online

Matiu 16 - urhobo bible

Matiu 16

¹Ihwo ri Farisi kugbe Sadiusi de bro rhe re nọ enanọ, rẹ ayen vwo davwọ ni sọ sa vwẹ oka nẹ obo odjuvwu rhe.

²Ẹkẹvuọvo ọ da kpahe ọ da ta kẹ ayen nẹ, ovwọnvwọn de te, ovwan me ta nẹ, ọke na che yovwi: kidie obenu na ọvwavware.

³Vwẹ irhiọke ovwan me ta nẹ, ọke na omiomiovwi, kidie enu na pha vwavware kpurhu kpurhu. Ovwan se vughe oka rẹ obo odjuvwu; ẹkẹvuọvo we gbi se vughe oka rẹ ọke nana-a.

⁴Orua brabra ri gbe igberadja na me a guọnọ oka; a sa vwẹ oka kẹ-ẹ, jokpa rẹ oka ri Jona. Ọ da yan jẹ ayen vwo yanran.

⁵Idibo rọye de rhi te ẹbẹre rivẹ, emuọre da chọrọ ayen ẹro.

⁶Jesu da ta kẹ ayen nẹ, Ovwan jomaotọ vwẹ oma rẹ emu ri Farisi kugbe Sadiusi.

⁷Ayen ki roro vwẹ omoma rẹ ayen nẹ, kẹ obo rẹ avwanre rha ghwa emuọre-e.

⁸Jesu vwọ riẹn obọ rẹ ayen roro, ọ da ta nẹ, Edje ri jẹ esegbuyota evwo na, Die ovwan roro vwẹ udu rẹ ovwan nẹ, avwanre vwo emuọre-e?

⁹Ovwan rhe roro, ghinẹ ovwan karohọ ikara iyori vẹ ihwo uriori iyori-i, bro ibere ovwan sanọ reyọ?

¹⁰Yẹrẹ ọ rẹ ikara ighwrẹ vẹ ihwo uriori ẹne na, bro ibere ovwan sanọ no?

¹¹Kidie ovwan vwo roro nẹ me ta ota kpahe emu diodi ra ria? Ẹkẹvuọvo ovwan jomaotọ kpahe emu ri Farisi kugbe Sadiusi.

¹²Kẹsiẹye ayen ke rhe riẹn nẹ, ọ dia emuọre ghevweghe ọ ta na-a, ẹkẹvuọvo vwọ kpahe uyono ri Farisi kugbe Sadiusi.

¹³Ọke ri Jesu rhi vwo te Sizaria Filipae, ọ da nọ idibo rọye nẹ, Ono ihwo na ta nẹ me epha?

¹⁴Ayen da ta nẹ, evo nẹ Jọn ri Baptist, evo nẹ Ilaija; evo nẹ Jẹrimaya, eyẹ ọvo vwẹ emraro na.

¹⁵Ọ da ta kẹ ayen nẹ, kono ovwan ta ne me epha?

¹⁶Saimọn Pita da kpahe ọ da ta nẹ, Wẹ hẹ Kristi na, Ọmọ rẹ Ọghẹnẹ ri bẹdẹ na.

¹⁷Jesu da kpahe ta kẹ nẹ, Ebruba kẹ wẹ Saimọn omo ri Jona; kidie ugboma eyẹ ọbara djere kẹ wẹ-ẹ, jokpa rẹ ọsẹ mẹ rọ hẹ obo odjuvwu.

¹⁸Me ta kẹ wẹ nẹ, wọwẹ hẹ Pita, enu rẹ oragha nana me bọn ishọshi mẹ phihọ; ukpokpoma ọvuọvo se gere she-e.

¹⁹Ke me je vwẹ usiaphrẹ rẹ uvie rẹ odjuvwu kẹ wẹ, rere kemu kemu wọ gbare vwẹ akpọ ya gbarọ vwẹ odjuvwu: kemu kemu re wọ rhanre vwẹ akpọ na ya rhanrọ vwẹ odjuvwu.

²⁰Ọ de ji urhi kẹ idibo rọye nẹ, a ta kẹ ohwo ọvuọvo nẹ ọye hẹ Kristi na-a.

²¹Nẹ ọke yena yanran Jesu de muhọ edje kẹ idibo rọye, obo ro che kpo Jerusalẹm rọ da re oja rẹ emu buebu vwẹ obọ rẹ ekpako kugbe irherẹn kugbe isiẹbe, ke che hwe, ẹdẹ rerha ko vrẹn.

²²Pita de nene phro nẹ, Ọrovwohwo gbobọnyẹ eta yena, emuọvo che ru we-e.

²³Ẹkẹvuọvo o de kuoma rhẹriẹ, ọ da ta kẹ Pita nẹ, Wan nẹ obuko mẹ wẹ Ẹdjọ na; Wẹ oshegberi kẹ vwẹ, kidie wọ guọnọ emu rẹ Ọghẹnẹ-ẹ, ẹkẹvuọvo ọ rẹ ihwo rẹ akpọ.

²⁴Jesu da ta kẹ idibo rọye nẹ, ohwo da guọnọ nẹ ọye nene uvwe, e jọ siẹn oma rọye re o mu agbagba rọye re o nene uvwe.

²⁵Kohwo kohwo ro sivwi arhọ rọye o kuọfia; ọ ro ku arhọ rọye fia kọ mrẹ reyọ.

²⁶Didi erere ri te ohwo, ro de vwo emu rẹ akpọ na ejobi, ro de ku arhọ rọye fia? eyẹ kidie ohwo se vwo wene arhọ rọye?

²⁷Kidie ọmọ rẹ ohwo cha rhe vwẹ urinrin rẹ Ọsẹ rọye kugbe emakashe rọye; kọ cha hwa osa kẹ ohwo ọvuọvo kirobo rẹ iruo rọye teri.

²⁸Uyota me ta kẹ wẹ, evo herọ ri mudia vwẹ etinẹ na, re cha davwe ughwu phiephie-e, bẹsiẹ rẹ ayen cha vwọ mrẹ Ọmọ rẹ ohwo rọ cha vwẹ uvie rọye.