Read urhobo Matiu 17 Bible Online

Matiu 17 - urhobo bible

Matiu 17

¹Rẹ ẹdẹ esan vwọ wan nu, Jesu da reyọ Pita, kugbe Jems, kugbe Jọn rẹ oniọvo rọye, ọ da vwẹ ayen rhe enu rẹ ugbenu ọvo ro kpenu.

²O de wene oma vwẹ irharo rẹ ayen; opharo rọye ko lo wrowro kerẹ ọnre, iwun rọye da rhe fon kerẹ oze.

³Nighe, Mosis kugbe Ilaija da vwẹ oma phia kẹ, ayen ki gbe ikun.

⁴Pita da kpahe ọ da kẹ Jesu nẹ, Ọrovwohwo, Oyoma rere avwanre dia etinẹ; wọ da rhọvwe, gbe jẹn avwanre bọn itughẹ erha, ọvo ọ wẹ, ọvo ọ ri Mosis, ọvo ọ rẹ Ilaija.

⁵Rọ je vwọ ta ota na, egho de rhi rhurhn ayen; urhuru ọvo de nẹ evun rẹ egho na rhe ta nẹ, Ọnana hẹ ọmọ mẹ ro je vwe na, rẹ ivun rọye vwerha ovwẹ na; we nyo ota rọye.

⁶Rẹ idibo na vwo nyo, ayen de she bọnvwọn opharo rhuotọ, oshọ de mu ayen.

⁷Jesu da rhe vwẹ obọ te ayen ọ da ta nẹ, We vrẹn, wa djẹ oshọ-ọ.

⁸Rẹ ayen vwọ kpare opharo kpenu, ayen gbe mrẹ ohwo ọfa-a jokpa ri Jesu ọvo.

⁹Rẹ ayen vwo wotọ nẹ ugbenu na cha, Jesu de ji urhi kẹ ayen nẹ, We gbe ikun na kẹ ohwo ọvuọvo-o, bẹsiẹ rẹ ọmọ rẹ ohwo vwo vrẹn nẹ ughwu.

¹⁰Idibo rọye da nọ nẹ, die otu rẹ isiẹbe na vwọ ta nẹ, Ilaija re ka rhe?

¹¹Ọ da kpahe o da ta kẹ ayen nẹ, Ilaija re ghene ka rhe, kọ cha rhuẹrẹ imu na eje ruẹ.

¹²Ẹkẹvuọvo me ta kẹ ovwan nẹ, Ilaija rhe nure, ayen gbi vugbe-e; ayen de ruo obo ri je ayen, Ọtiọye Ọmọ rẹ ohwo je cha re oja te.

¹³Idibo na da rhe karohọ nẹ, ikun ri Jọn ri Baptist o gbe kẹ ayen na.

¹⁴Ọke rẹ ayen rhi vwo te asan rẹ ihwo buebu na epha, Ohwo ọvo da rhe rhi shiguẹ vwẹ obaro rọye ọ da rẹ nẹ,

¹⁵Ọrovwohwo ni aruẹdọn rẹ ọmọ mẹ; kidie o she enwẹnwẹ, oma na je da gangan; kidie ọke buebu o vwo muo phihọ erhanre kugbe ame.

¹⁶Mi de muo rhe idibo wẹn re ayen sivwo, ayen se ruo-o.

¹⁷Jesu da kpahe ọ da ta nẹ, Edje ri jẹ esegbuyota evwo, mavọ me vẹ ovwan dia kir te? Komavọ mi chirako rẹ ovwan te? muo rhe vwe.

¹⁸Jesu da ghwọ kuo, idẹbono na da wan no; oma rẹ ọmọ na de ghwe kpo vwẹ ọke yena.

¹⁹Idibo na de bru Jesu rhe vwẹ odjahọ, ayen da nọ nẹ; Die jabọ rẹ avwanre vwo jẹ sa djẹ no?

²⁰Ọ da ta kẹ ayen nẹ, fiki rẹ esegbuyota ọhanhanvwe rẹ ovwan na. Uyota me ta kẹ ovwan, We de segbuyota kerẹ emamọ rẹ uyerhie, kẹ ovwan ta kẹ ugbenu nana nẹ, Ghwie nẹ etinẹ kpo oboyi; ko ghwie; emu ọvuọvo gbe sa bẹn kẹ ovwa-an.

²¹Ẹkẹvuọvo oghẹre ọtiọna na se ruẹ-ẹ, jokpa rẹ ẹrhovwo kugbe owẹvwe echiro ọvo.

²²Ọke rẹ ayen vwọ hẹ Galili, Jesu da ta kẹ ayen nẹ, A cha vwẹ Ọmọ rẹ ohwo vwọ hẹ obọ rẹ ihwo.

²³Kẹ ayen che hwe, ẹdẹ rerha kọ rhoma vrẹn. Ọ da da ayen gangan.

²⁴Ọke rẹ ayen rhi vwo te Kepanọm, ihwo ri mie arhọghọ da ta kẹ Pita nẹ, Onini wẹn tobọ hwa osa rẹ arhọghọ rọye na?

²⁵Ọ da ta nẹ, E. O rhi vwo te uwevwi, Jesu da ta kẹ nẹ, Die wọ tobọ roro vwọ Saimọn? Ivie rẹ akpọ na, ono ayen toro arhọghọ mie? emotọ gbinẹ erhorha?

²⁶Pita da ta nẹ, Erhorha; Jesu da ta kẹ nẹ, emotọ na rha hwa?.

²⁷Ẹkẹvuọvo rere avwanre vwo jẹ ukọn ẹdia kẹ ihwo efa, gba yanran kpo obo abadi, re wo re si oghọre, eri wo ke si bẹre evun rọye ke wọ mrẹ igho vwẹ evun rọye, reyọ wọ vwọ hwa ẹkosa mẹ vẹ ọwẹ.