Read urhobo Matiu 2 Bible Online

Matiu 2 - urhobo bible

Matiu 2

¹Ọke re vwo vwiẹ Jesu vwi Bẹtlẹhẹm ri Judia vwẹ ọke ri Herọd vwọ hẹ ovie, nighere, evwaghwanre rẹ eshare erha de nẹ obaro ọnre rhe Jerusalẹm,

²tanẹ, Tivọ e de vwiẹ ovie ri Ju na? Kidie avwanre mrẹ isio rọye vwẹ obaro ọnre, kọye avwanre vwọ rhe re ga na.

³Ọke ri Herọd ovie vwo nyo, ivun de miovwo, kugbe ihwo ri Jerusalẹm ejobi

⁴O de se ilori rẹ irherẹn kugbe isiẹbe na ejobi koko, ọ da nọ ayen asan re de vwiẹ Kristi na.

⁵Ayen da ta kẹ nẹ, Bẹtlẹhẹm ri Judia; kidie ọtiọye otu rẹ emraro na siro nẹ;

⁶Wẹ Bẹtlẹhẹm, vwẹ otọ ri Juda Ọ dia owẹ re ma hanvwe vwẹ isun ri Juda ejobi; Kidie ohri wẹn osun che nurhe ro che sun ihwo mẹ Izrẹl.

⁷Herọd da bẹbẹ se evwaghwanre erha na, ọ da nọ ayen nẹ ọkevọ isio na vwọ phia;

⁸Ọ de ji ayen kpo Bẹtlẹhẹm, tanẹ, Yanran ra nabọ guọnọ ọmọ na, ovwan da mrẹ wa gba rhe vuẹ vwẹ, rere okpuyovwi mẹ je ra ga rhe.

⁹Ovie na vwọ vuẹ ayen nu, ayen da yanran; nighe isio rẹ ayen mrẹre jovwo na, ọ da karo kẹ ayen, o de rhi mudia enu rẹ asan rẹ ọmọ na epha.

¹⁰Ọke rẹ ayen vwọ mrẹ isio na ro mudia, ayen da ghọghọ gangan.

¹¹Ayen da ro uwevwi na, ayen da mrẹ ọmọ na kugbe Meri rẹ oni rọye, ayen de diguẹ ayen da vwarọ, ayen de rhie ekpo rayen, ayen de ru ẹse kẹ, ọvo kẹrẹ oro, ọrivẹ adjija ọrerha ugboduma.

¹²Rẹ Ọghẹnẹ vwọ kpokpa kẹ ayen vwẹ evwerhẹ nẹ ayen rhivwi bru Herọd ra-a, ayen da wan idjerhe ọfa kpo.

¹³Rẹ ayen vwo kpo nu nighe amakashe da vwẹ oma phia kẹ Josẹf vwẹ evwerhẹ ọ da ta, Vrẹn wo mu ọmọ na re wọ djẹ kpo Ijipt, kugbe oni rọye, wọ dia oboyi bẹsiẹ me vwọ vuẹ ovuẹ rhe wẹ, kidie Herọd guọnọ ọmọ na hwe.

¹⁴O de ghine vrẹn ọ da reyọ Meri kugbe ọmọ na ayen da djẹ kpo Ijipt.

¹⁵Oboyi kọye ayen diare rhiri bẹsiẹ ri Hẹrọd vwo ghwu; rere ota rẹ omrarọ na tare vwọ gba, ra tare nẹ, Evun rẹ Ijipt mi de se ọmọ mẹ.

¹⁶Ri Herọd vwọ riẹn nẹ ihwo na phiẹ ọye phihọ, ivun de miovwo gangan, o de ji ikọn nẹ e rẹ hwe emọboba rẹ eshare re hẹ Bẹtlẹhẹm ejobi, kugbe eko rọye ejobi, emọ rẹ ikpe ive rhe otọ, nẹ okẹ re vwo vwiẹ ọmọ na rhe na.

¹⁷Kọye aroẹmrẹ ri Jerimaya vwọ sẹ nẹ,

¹⁸Enyo urhuru vwi Rama, Edo rẹ oviẹ kugbe omemuohọ, Reshẹl ra viẹ kẹ emọ rọye; O gbe rhọvwe nẹ e bru ọye uche-e, kidie emọ na gbe herọ-ọ.

¹⁹Ẹkẹvuọvo ọke ri Herọd rhi vwo ghwu nu, amakashe rẹ Ọghẹnẹ da vwẹ oma phia kẹ Josẹf vwẹ evwerhẹ vwẹ Ijipt nẹ,

²⁰Vrẹn wo mu ọmọ na kugbe oni rọye, ri we rhivwi kpo otọ rẹ Izrẹl, kidie ọvweghrẹ rẹ ọmọ na ghwu nure.

²¹O de vrẹn o de mu ọmọ na kugbe oni rọye, ọ da rhe otọ rẹ Izrẹl.

²²Ẹkẹvuọvo ro vwo nyo nẹ Akiẹlus ọ ria vwẹ ẹdia ri Herọd ọsẹ rọye, osho ro vwo kpo oboyi de muo; vwẹ oka rẹ Ọghẹnẹ vwọ phia kẹ vwẹ evwerhẹ, o de kpo Galili.

²³Ọ da ra dia Nazarẹt, rere ota rẹ ọmraro na tare vwọ mrasan sẹ nẹ, e che se ohwo ri Nazarẹt.