Read urhobo Matiu 23 Bible Online

Matiu 23 - urhobo bible

Matiu 23

¹Jesu da ta kẹ ihwo buebu na kugbe idibo rọye nẹ,

²Otu rẹ isiẹbe kugbe otu ri Farisi na mia tidia umukpe ri Mosis;

³Kemu kemu rẹ ayen tanẹ ovwan ru, we ru ayen, wa nabọ vwẹ ẹro te ayen; ẹkẹvuọvo wa vwẹ ẹro kere aye-en, kidie obo rẹ ayen ta san, yẹ ọ rẹ ayen ruẹ san.

⁴Nighe, ayen mi kru oghwa ọhọhọhọ kpahe igabọ rẹ ihwo efa, yẹ ayen cha vwẹ obọ te-e.

⁵Kidie ayen di ruẹ ọnana ghevweghe rere ihwo vwọ mrẹ ayen; kidie ayen ruẹ igbabọ hẹhẹre, ayen mi rhe ko iwun rẹ ayen reghereghe.

⁶Ayen mia guọnọ asan ro kpenu tidia, kugbe agbara ro yoma vwẹ evun rẹ Sinagọg,

⁷kugbe uyere vwẹ afieki, rere ihwo mrasan se ayen iyono.

⁸Ẹkẹvuọvo we jẹ ohwo se ovwan iyono-o; kidie ohwo ọvuọvo ọye hẹ oyono, otu ri chekọ kẹ imoni.

⁹Ovwan sẹ ohwo ọvuọvo ọsẹ vwẹ akpọ na-a; Kidie ohwo ọvo ọye ọsẹ rẹ ovwan rọ hẹ obo odjuvwu.

¹⁰We jẹ ohwo se ovwan onini-i; Kidie ohwo ọvo ọye hẹ onini rẹ ovwan, ohwo yena hẹ Kristi.

¹¹Ẹkẹvuọvo ohwo rọ rhoro vwẹ uherevie rẹ ovwan e gbe jo gbe odibo.

¹²Kohwo kohwo ro kpare oma kpenu, ke vwo kpotọ; ọ rọ vwẹ oma kpotọ ke vwo kpenu.

¹³Ẹkẹvuọvo ekan kẹ ovwan, isiẹbe kugbe Farisi, evworọn efian! kidie we huhu ẹchẹ rẹ uvie rẹ odjuvwu gbe ihwo; ovwan guọnọ ruọ-ọ, yẹ ihwo efa re guọnọ ruọ ovwan da ayen ji.

¹⁴Ekan kẹ ovwan, isiẹbe kugbe Farisi, evwọrọn efian! ovwan mia guọghọ uwevwi rẹ eyauku, ovwan me vwẹ omeru nẹ ẹrhovwo rẹ efian grogro, eriyin na ovwan cha reabe rode.

¹⁵Ekan kẹ ovwan isiẹbe kugbe Farisi, evwọrọn efian! kidie ovwan riẹriẹ ihwo vwo kugbe oma rere usun rẹ ovwan vwo bu phihọ.

¹⁶Ekan kẹ ovwan isun ihwo ri rhuẹro, re tanẹ, Ohwo da vwẹ odẹ rẹ ishọshi duvwu iyori, yo fi emuọvo-o, ẹkẹvuọvo ohwo rọ vwẹ oro rọ hẹ enu rẹ agbada duvwu iyori, yẹ ọ riosa o ruẹ.

¹⁷Ovwan ẹkpa kugbe irhuẹro na; ọrhọ re marho, oro gbinẹ ishọshi ra vwẹ oro na rhuẹre?

¹⁸Ohwo kohwo rọ vwẹ agbada na duvwu iyori, yẹ emu diodi; ẹkẹvuọvo ohwo rọ vwẹ izobo ro hẹ enu rọye duvwu iyori, yẹ ọ riosa o ruẹ.

¹⁹Ovwan irhuẹro na; ọrhọ re marho, izobo gbenẹ agbada na ra vwẹ izobo na rhuẹre?

²⁰Ohwo rọ vwẹ agbada duvwu iyori, yo vwiro duvwu iyori kugbe obo rọ hẹ enu rọye ejobi.

²¹Ohwo ro vwẹ ishoshi duvwu iyori, o ji vwo duvwu iyori kugbe obo re hẹ evun rọye ejobi.

²²Ohwo rọ vwẹ odjuvwu duvwu iyori, yọ vwẹ ekete rẹ Ọghẹnẹ duvwu iyori kugbe ohwo ro tidia vwẹ enu rọye.

²³Ekan kẹ ovwan otu rẹ isiẹbe kugbe Farisi, evwọrọn efian! ovwan nenesi rẹ emu fanfaurhiẹ, we mi gbobọnyẹ emu ro fori, eta re urhi, ẹdjeguo, aruẹdọn kugbe esegbuyota; enana fobo ru we ru jovwo, we de gbobọnyẹ ayen.

²⁴Ovwan isun rẹ irhuẹro ri phorho iyẹn nẹ ame da, je ro ọsoso rẹ erhuẹn.

²⁵Ekan kẹ ovwan, isiẹbe kugbe Farisi, evwọrọn efian! kidie ovwan hworhẹ obuko rẹ uko vẹ ọsete, ẹkẹvuọvo yẹ obo evun rọyen vọnre vẹ ọghware kugbe umwemwu.

²⁶Ovwan Farisi ri rhuẹro na, ovwan ka hworhẹ evun rẹ uko kugbe ọsete na tavwe, rere wa ke hworhẹ obuko rẹ ayen.

²⁷Ekan kẹ ovwan, isiẹbe kugbe Farisi, evwọrọn efian! kidie ovwan họhọ ushi ra vwẹ oda ọfuanfon ghworo, rọ pha yoyovwi vwẹ uphẹnphẹn, yẹ obo evun rayen vọnre vẹ ibeku kugbe inuhu.

²⁸Eriyin ovwan vwẹ oma phia yoyovwi kẹ ihwo vwẹ otafe, ẹkẹvuọvo obo evun rẹ ovwan vọnre vẹ efian kugbe umwemwu.

²⁹Ekan kẹ ovwan, isiẹbe kugbe Farisi, evwọrọn efian! kidie ovwan tọn ushi rẹ emraro na, ekpuyovwi rẹ ovwan da nabọ rhuẹrẹ ushi rẹ evwata na.

³⁰Ayen da ta nẹ, ọ diane avwanre herọ vwẹ ọke rẹ esẹ rẹ avwanre vwenẹ, avwanre e koko hwe emraro na-a.

³¹Fiki rẹ ọtiọye na, ovwan ọvo kọye ri se iseri hwe oma rẹ ovwan nẹ, esẹ rẹ avwanre ri hwe emraro na.

³²Ovwan gbe ru kirobo rẹ esẹ rẹ ovwan ruru.

³³Ovwan eredekọ na, uvwiẹ rẹ ọrobiebi na, komavọ ovwan ru se nabọ rẹ ẹdjeguo rọ cha na?

³⁴Fiki re eriyin na, mi de ji emraro mẹ kugbe evwaghwanre, kugbe isiẹbe, we hwe evo, wa kanre evo mu agbagba; we che ru evo oja vwẹ evun rẹ Sinagọg rẹ ovwan, we mi rhe mu ayen nẹ orere kpo orere.

³⁵Rere osa rẹ evwata rẹ ovwan hweri vwẹ akpọ na vwọ dia uyovwi rẹ ovwan, nẹ ọbara rẹ Ebẹl rẹ ọvwata, re te ọbara ri Zakaraya rẹ ọmọ ri Barakaya rẹ ovwan hweri vwẹ enu rẹ agbada.

³⁶Uyota me ta kẹ ovwan, osa rọye ọ hẹ enu rẹ uyovwi rẹ ovwan.

³⁷E Jerusalẹm, Jerusalẹm, ro hwe otu rẹ emraro na, rọ vwẹ elalọ phiẹ ihwo re ji bru ovwan rhe na! mavọ mi se ovwan koko te kerẹsiẹ rẹ ọhọ a da vwẹ ibekpe rhurhu emọ rọye, yẹ ovwan je rhọvwe-e.

³⁸Nighe me yan jẹ uwevwi rẹ ovwan vwo ofefe.

³⁹Kidie me ta kẹ ovwan nẹ, Ovwan gbe cha mrẹ vwẹ ọfa-a, bẹsiẹ rẹ ovwan vwọ ta nẹ, Ebruphihọ kẹ ọ rọ cha vwẹ odẹ rẹ Ọrovwohwo.