Read urhobo Matiu 28 Bible Online

Matiu 28 - urhobo bible

Matiu 28

¹Vwẹ irhiọke ride, rẹ ẹdẹ rẹsosuọ rẹ ẹdidjala na, Meri ri Magdala kugbe Meri rivẹ na da rhẹ asan ushi na.

²Nighe otọ de rhi kpogho; kidie amakashe rẹ Ọrovwohwo de wotọ nẹ odjuvwu rhe, o de ghorie oragha na nẹ unu rẹ ushi na, o de tidia enu rẹ oragha na.

³Oma rọye ko lo kerẹsiẹ rẹ enu a nyavwaro, ewun rọye kọ fuan toto kerẹ iphughẹ rẹ odja.

⁴Ihwo re rhẹrẹ ushi na da ghwumu vẹ oshọ, ke phariẹ guegue.

⁵Amakashe na da ta kẹ eya na, Ovwan djẹ oshọ-ọ. Me riẹnre nẹ Jesu ra kare mu agbagba na ovwan guọnọ.

⁶Ọ gbe hẹ etinẹ-ẹ; kidie o vrẹnre, kirobo ro tare jovwo. Wa yanrhe rhe mrẹ asan rẹ Ọrovwohwo shevwerhẹ jovwo.

⁷Wa yanran okpokpakpa, ra vuẹ idibo rọye nẹ, o vrẹn nẹ ughwu re; ọ karo kẹ ovwan kpo Galili; oboyi kọye ovwan da mrẹ. Nighere, me ta kẹ ovwan nure.

⁸Ayen de ghine yanran okpokpakpa nẹ asan ushi na vẹ oshọ kugbe aghọghọ, ra vuẹ idibo na.

⁹Siẹvuọvo na Jesu da ghwa vwa ayen, ọ da ta kẹ ayen nẹ, Wa do. Ayen da djẹ ra gbanọ awọ, ayen de yere vẹ omavwerhovwẹ.

¹⁰Jesu da ta kẹ ayen nẹ, Wa djẹ oshọ-ọ; ovwan ra vuẹ imoni mẹ ri chekọ nẹ, ayen wan fi Galili, kẹ oboyi ayen da mrẹ vwẹ.

¹¹Ọke rẹ ayen vwọ yanran rẹ, ihwo re rhẹrẹ otọ na da djẹ kpo obo orere, ra vuẹ ilori rẹ irherẹn na obo re phiare.

¹²Ayen vẹ ekpako na de rhi sioma koko, ayen da jẹ iroro nẹ, a jẹ udi kẹ isodje na,

¹³rere ayen ta nẹ, Idibo rọye rhe bẹbẹ muo reyọ vwẹ ason, ọke rẹ avwanre vwọ vwerhẹ.

¹⁴Pailet de rhi nyo re, avwanre ke vwẹ ota ghwọroma, ọ gbe davwerhọn rẹ ovwa-an.

¹⁵Ayen da reyọ igho na, ayen de ru kirobo re yono ayen na. Usi nana de ghwe kperi ro uherevie rẹ ihwo ri Ju rhi te nonẹ na.

¹⁶Ẹkẹvuọvo uhwọvo ri chekọ da yanran kpo Galili, kpo enu rẹ ugbenu ri Jesu dje kẹ ayen na.

¹⁷Ọke rẹ ayen vwọ mrẹ nu ayen da ga, ẹkẹvuọvo evo vẹ iroro ivivẹ.

¹⁸Jesu vwo bru ayen rhe ọ da ta kẹ ayen nẹ, Ogangan ejobi re hẹ odjuvwu vẹ akpọ, a vwe ayen kẹ vwẹ.

¹⁹Ovwan gba yanran re we re yono ihwo rẹ akpọ na ejobi, wa vwẹ ame kẹ ayen vwẹ odẹ rẹ Ọsẹ vẹ ọ rẹ Ọmọ kugbe Erhi Ọfuanfon.

²⁰Wẹ yono ayen vwọ riẹn otọ rẹ imu na ejobi re dje kẹ ovwan na. Nighe, me vẹ ovwan herọ vwẹ ọke ejobi, rhiri rhi te oba rẹ akpọ na.