Read urhobo Matiu 7 Bible Online

Matiu 7 - urhobo bible

Matiu 7

¹Ovwan gu ẹdjọ rẹ ohwo-o, rere ohwo vwo jẹ ovwan eguo.

²Kidie oghẹre rẹ orhiẹn ru we bru kẹ ihwo, ọye e ji bru kẹ ovwan. Uchunu wọ vwọ vwavwe kẹ ihwo, ọye a je vwọ vwavwe kẹ ovwan.

³Die nẹrhẹ we nẹ ukueku rọ hẹ ẹro rẹ ọrivẹ wẹn, yi wo gbi roro ubrurhe rọ hẹ ẹro wẹ-ẹ?

⁴Komavọ wọ vwọ ta kẹ ọrivẹ nẹ, jẹ uvwe ririe iphughẹ rẹ ẹro wẹn, yẹ ọwẹ vọnre?

⁵Wẹ omeru na, ke ririẹ iphughẹ rẹ ẹro wẹ tavwe, ku wọ mrẹ orẹ fiotọ vwo si iphughẹ rẹ ẹro rẹ ọrivẹ wẹn nọ.

⁶Wọ vwẹ obo re fonro kẹ eranko-o, eyẹ wọ reyọ amwa vwo rhuo esi-i, ayen de chiyi ayen muotọ emwa na ke bẹre.

⁷Nọ, ka kẹ wẹ; guọnọ ke wọ mrẹ; hworo ẹchẹ kẹ rhie kẹ wẹ.

⁸Kidie ohwo kohwo rọ nọre kọ mrẹ, ọ rọ guọnọre ko vwo, ọ ro hworo ẹchẹ ke rhie kẹ.

⁹Ono vwẹ ohri rẹ ovwan na, rẹ ọmọ rọye da nọ ekpẹn rẹ ikara rọ da vwẹ ubioragha kẹ re?

¹⁰Eyẹ eri rọ da vwẹ ọrọdekọ kẹ?

¹¹Ovwan rẹ ihwo ebrabra, de se ru omamọ rẹ ẹse kẹ emọ rẹ ovwan, komavọ Ọsẹ rẹ ovwan rọ hẹ obo odjuvwu ru te kẹ ihwo re nọrọ?

¹²Kemu kemu ru wọ guọnọre nẹ ihwo ru kẹ wẹ, gbe ji ru ọtiọye kẹ ihwo rhe; Kidie eriyin urhi na kugbe emraro na yonori.

¹³Ovwan wan anurhoro ọhwahwa na: Kidie idjerhe rọ hẹhẹre kugbe anurhoro ọhẹhẹre ọye idjerhe rẹ oghwọrọ. Ihwo buebu yi nene idjerhe yena.

¹⁴Kidie idjerhe rẹ uyota na pha hwahwa phiọnphiọn, ọye ọ rẹ arhọ na; ihwo tutuno re sa guọnọ mrẹ.

¹⁵Kenoma kẹ emraro rẹ efian ri ku ewun rẹ ogegede phihọ, yẹ obo evun rayen pha brabra gbegbo kerẹ okpohrokpo.

¹⁶Emamọ rayen e vwo vughe ayen. Odjigbẹ sa mọ ọka, gbenẹ owe sa mọ otiẹ?

¹⁷Eriyin na urhe rẹ esiri, ọ mọ emamọ esiri, ẹkẹvuọvo urhe ọbrabra ọ me rha mọ emamọ ọbrabra.

¹⁸Urhe esiri sa mọ omamọ ọbrabra-a, urhe ọbrabra sa mọ emamọ esiri-i.

¹⁹Urhe kurhe rọ mọ emamọ esiri-i, ke she vwo mu erhanre.

²⁰Eriyin na, emamọ rayen e vwo vughe ayen.

²¹Ọ dia ihwo ejobi ri se vwe Ọrovwohwo, Ọrovwohwo eye se te uvie rẹ odjuvwu-u; jokpa rẹ ihwo ri ru ẹguọnọ rẹ Ọsẹ mẹ rọ hẹ obo odjuvwu.

²²Ihwo buebu ye cha ta kẹ vwẹ vwẹ ẹdẹ yena nẹ, Ọrovwohwo, Ọrovwohwo, mi yono ihwo vwẹ odẹ wẹ, me vwẹ odẹ wẹn djẹ idẹbono phia, me vwẹ odẹ wẹ ru iruo rẹ igbunu?.

²³Ki mi nyo kẹ ayen nẹ, mi vughe ovwa-an, we bi te oboyi, ovwan iruimwemwu na.

²⁴Kohwo kohwo ro nyo eta nana re me tare na, ro de ru ayen, ko họhọ ọvwẹghwanre rọ bọn uwevwi rọye vwọ hẹ enu rẹ oragha.

²⁵Ọke rẹ osio vwọ rhọ, rẹ ọkẹre vwọ fa, rẹ odju rhi vwo djuo, uwevwi na gbi she-e, fikiridie a bọnrọ vwọ hẹ enu rẹ oragha.

²⁶Kohwo kohwo ro nyo eta nana, ro ru aye-en, kọ họhọ ẹkpa rẹ ohwo, rọ bọn uwevwi rọye vwọ hẹ enu rẹ ubu.

²⁷Osio da rhe rhọ, ọkẹre da rhe fa, odju de rhi djuo, o de she: emu buebu re herọ da ghwọrọ kufia.

²⁸Ọke rhi vwo te ri Jesu vwo fue uyono rọye nu, o de gbe ayen unu.

²⁹Kidie o yono ayen kerẹ ohwo ro vwo ogangan, ọ rha họhọ uyono rẹ isiẹbe na-a.