Read urhobo Matiu 9 Bible Online

Matiu 9 - urhobo bible

Matiu 9

¹Rọ vwọ ro evun rẹ okọ, ọ da samu kpo abọ rivẹ, ra ro orere rẹ obọ rọye.

²E de mu ohwo ọvo ro ghwoma bro rhe, o shevwerhẹ ehwa; ri Jesu vwọ mrẹ esegbuyota rayen, ọ da ta kẹ ọ ro ghwoma na, ọmọ mẹ, jẹ oma wẹn sasa, a vwẹ imwemwu wẹn ghovwo uwe.

³Evo vwẹ isiẹbe na da ta kẹ omoma rẹ ayen nẹ, Ohwo nana ta ota rẹ ẹgua.

⁴Jesu vwọ riẹn iroro rayen, ọ da ta nẹ, Die ovwan vwo roro iroro omiomiovwi vwẹ udu rẹ ovwan?

⁵Kẹ ọrhọ lọhọre ra vwọ ta nẹ, A vwẹ imwemwu wẹn ghovwo uwe: eyẹ ra vwọ ta nẹ, Vrẹn wọ yan?

⁶Ẹkẹvuọvo re ovwan vwọ riẹn nẹ Ọmọ rẹ ohwo vwo ogangan vwẹ akpọ ro vwo ghovwo ihwo, ọ da ta kẹ ọ ro ghwoma na, Vrẹn mu ehwa wẹn, rere wọ kpo uwevwi wẹn.

⁷O de vrẹn ọ da yan kpo uwevwi rọye.

⁸Ẹkẹvuọvo ọke rẹ otu buebu na vwọ mrẹ, oshọ de mu ayen, ayen de jiri Ọghẹnẹ, rọ vwẹ ogangan tiọna kẹ ihwo.

⁹Ri Jesu vwọ yan nẹ etiyin, ọ da mrẹ ọshare ọvo re se Matiu, ro tidia vwẹ ọguan re de toro arhọghọ. Ọ da ta kẹ nẹ, Nene uvwe. O de vrẹn, o de nene.

¹⁰Ọke rhi vwo te, ro vwo tidia udemu vwẹ uwevwi rọye, nighe imiarhọghọ buebu kugbe iruimwemwu vẹ ọye de tidia kugbe idibo rọye.

¹¹Ọke ri Farisi na vwọ mrẹ, ayen da ta kẹ idibo rọye nẹ, Die jabọ ọ vẹ imiarhọghọ kugbe iruimwemwu vwọ ria emu kuẹgbe?

¹²Ẹkẹvuọvo ro vwo nyo, ọ da ta nẹ, Ihwo rẹ oma rẹ ayen ganre guọnọ ọbo-o, jokpa rẹ otu rẹ oma da.

¹³Ẹkẹvuọvo gba ra guọnọ otọ rẹ ota nana, me guọnọ arodọvwẹ, ọ dia izobo-o; mi rhi se evwata-a, ẹkẹvuọvo iruimwemwu.

¹⁴Idibo ri Jọn de bro rhe ayen da ta nẹ, Die sorọ rẹ avwanre kugbe otu ri Farisi vwo chirẹ owẹvwe kọke kọke, ẹkẹvuọvo ewẹn gbi chirẹ owẹvwe-e.

¹⁵Jesu da ta kẹ ayen nẹ, Kẹ ikopha se chiri owẹvwe vwẹ ọke rẹ ọpha na vẹ ayen da herọ? Ẹkẹvuọvo ọke cha ra da vwẹ opha na yanran kẹsiẹye owẹvwe ki rhi hwe ayen.

¹⁶Ohwo se ko amwa ọkpokpọ phihọ ọ rẹ awanre-e, ọkpokpọ na ko si ọ rẹ awanre na bẹre, uphrophro na ko miovwi phihọ.

¹⁷Ohwo se ku udi ọkpokpọ phihọ oghwara rẹ awanre-e, oghwara na ko ghwu, udi na kọ hwẹ kufia, oghwara na ko miovwi. Ẹkẹvuọvo udi ọkpokpọ ke kuo phihọ oghwara ọkpokpọ ayen ivẹ ke tọn kugbe.

¹⁸Ọke rọ vwọ je ta ota na kẹ ayen na, Siẹvuọvo na onotu ọvo de bro rhe, o de yere ọ da ta kẹ nẹ, Ọmọtẹ mẹ o muegbe rẹ ughwu, biko yanrhe re wọ rhe ghwẹ obọ kpahọ rere wo sivwo.

¹⁹Jesu de vrẹn o de nene, kugbe idibo rọye.

²⁰Nighe aye ọvo ro diare ẹgbukpe ihwivẹ re, ọ da rhẹrẹ rhe obuko rọye, ọ da bẹbẹ vwẹ obọ te akakọ rẹ ewun rọye.

²¹Kidie ọ bẹbẹ ta vwẹ udu rọye nẹ, me da sa vwẹ obo te ewun rọye, oma me na kpo.

²²Ẹkẹvuọvo ri Jesu vwo kuoma rhẹriẹ ọ da mrẹ; ọ da ta kẹ nẹ, Ọmọte jẹn oma wẹn vworo uwe; esegbuyota wẹn o sivwi uwe. Oma rẹ aye na de ghwe kpo nẹ ọke yena yanran.

²³Ọke ri Jesu rhi vwo te uwevwi rẹ onotu na, rọ rhe vwọ mrẹ ihwo ri kuenu rẹ oviẹ kugbe otu ri do,

²⁴ọ da ta nẹ, We bioma; ọmọte na ghwuru-u, ẹkẹvuọvo ọ vwerhe; ayen ke vwọ jevwẹ.

²⁵Ẹkẹvuọvo ọke rọ vwọ djẹ ayen ro otafe nu, ọ da ro uwevwi, ọ da yọnrọn obọ, ọmọte na de ghwe vrẹn.

²⁶Usi rọye de kperi ro asan ejobi.

²⁷Ri Jesu vwo nẹ etiyin yanran, irhuẹro ivẹ de nene, ayen de kperi ta nẹ, Ni arodọvwẹ rẹ avwanre, Wẹ ọmọ ri Devid.

²⁸O rhi vwo te uwevwi, irhuẹro na de bro rhe; Jesu da nọ ayen nẹ, We segbuyota ni mi se ru ọnana? Ayen da kpahe nẹ, E Ọrovwohwo.

²⁹Ọ da vwẹ obọ te ẹro rayen, ọ da ta nẹ, ọ dia kẹ ovwan kirobo rẹ esegbuyota rẹ ovwan epha.

³⁰Ẹro rayen de rhie. Jesu de ji urhi kẹ ayen nẹ, ovwan ta kẹ ohwo ọvuọvo-o.

³¹Ẹkẹvuọvo ayen da yanran re tue ota na phia.

³²Rẹ ayen vwọ yanran nu, nighe e de mu ohwo ọvo ro diunu, ro ji vwo erhi re idẹbono vwo rhe.

³³Ọke rọ vwọ djẹ erhi rẹ idẹbono na no nu, odiunu na da ta ota phia. O de gbe ihwo na ejobi unu, ayen da ta nẹ, a je mrẹ ọtiọna vwẹ Izrẹl na dẹvo-o.

³⁴Ẹkẹvuọvo otu ri Farisi na da ta nẹ, Ogangan ri osun rẹ idẹbono ọ vwo djẹ idẹbono phia na.

³⁵Etiyin Jesu da yan ro irere na, vẹ eko na ejobi, o de yono vwi Sinagọg, ọ da ta ota rẹ iyẹnrẹ esiri rẹ uvie rẹ odjuvwu, o de sivwi ihwo buebu re mwa ọga dohwo doghẹre rẹ emiavwe rọye.

³⁶Ẹkẹvuọvo ọke rọ vwọ mrẹ otu buebu na, ẹro da dọn, fikiridie ayen da hra ke ro ẹnwan kerẹ igegede ri vwo osu-un.

³⁷Ọ da ta kẹ idibo rọye nẹ, orhọ na buru gangan, ẹkẹvuọvo otu rẹ owian rhe bu-u.

³⁸Gba rẹ Ọghẹnẹ ro vwo orhọ rere a mrẹ ihwo vwo vun orhọ na.