Read urhobo Mak 1 Bible Online

Mak 1 - urhobo bible

Mak 1

¹Ẹtuọhọ rẹ iyẹnrẹ esiri ri Jesu Kristi, Ọmọ rẹ Ọghẹnẹ na;

²Ọtiobo re siro phihọ ọbe rẹ ọmraro Aizaya, Nighe, Mi ji ikọn mẹ karo kẹ wẹ, Ọ rọ cha rhuẹrẹ idjerhe wẹn kpahe kẹ wẹ;

³Urhuru rẹ ohwo ovọ herọ kperẹ vwẹ evun rẹ aghwa nẹ Rhuẹrẹ idjerhe rẹ Ọrovwohwo na, ru ada rọye kpọvi;

⁴Jọn ghine vwẹ ame kẹ vwẹ evun rẹ aghwa o de ghwoghwo ame ẹvwọkẹ rẹ ekuorhẹriẹ re evwoghovwo rẹ imwemwu.

⁵Ihwo rẹ ubrakpọ ri Judia, kugbe ihwo ri Jerusalẹm ejobi de bro ra; ọ da vwẹ ame kẹ ayen ejobi vwẹ evun rẹ urhie ri Jọdan ayen da rhọvwe imwemwu rayen.

⁶Asakiephana Jọn ku ewun rẹ ẹtọn ri kamẹl phihọ Ọ da vwẹ umuehun rẹ ophiẹn vwo mu ehun rọye ebaka kugbe enyọn re je chere kẹ eye ọ re re.

⁷O de ghwoghwo ta nẹ, Ohwo rọ gan nọ ovwẹ cha vwẹ obuko mẹ, mi fo ohwo rọ rhuẹn ra rhan ifi rẹ isabato rọye-e.

⁸Ame me vwọ kẹ wẹ na; ẹkẹvuọvo ọye cha vwẹ Erhi Ọfuanfon na baptaizi rẹ ovwan.

⁹Vwẹ ẹdẹ yena rẹ Jesu de nẹ Nazarẹt ri Galili rhe, Jọn da vwẹ ame kẹ vwẹ evun ri Jọdan.

¹⁰Ro ghwe vwo nẹ evun rẹ ame na rhe siẹvuọvo na ọ da mrẹ odjuvwu ro rhie phihọ, Erhi kerẹ inekuku de rhi she muo;

¹¹Urhuru ọvo de nẹ odjuvwu na rhe, Wọwẹ hẹ Ọmọ Mẹ ro jevwe rẹ ivun rọye vwerhe ovwẹ na.

¹²Siẹvuọvo na Erhi na da djẹ ro evun rẹ aghwa.

¹³Ọ da dia evun rẹ aghwa na ẹdẹ ujuvẹ, Idẹbono da davwọ ni; ọ vẹ eranvwe rẹ djoma keye gba dia, emakashe de rhi gbe odibo kẹ.

¹⁴Asakiephana re vwo mu Jọn nu, Jesu da rhe Galili, ro ghwoghwo iyẹnrẹ esiri rẹ Ọghẹnẹ,

¹⁵tanẹ, ọke na tere, uvie rẹ Ọghẹnẹ na sikẹre re, kurhẹriẹ we se iyẹnrẹ esiri na gbuyota.

¹⁶Rọ vwọ yan nene orhoma rẹ Abadi ri Galili, o da mrẹ Saimọn vẹ Andru rẹ oniọvo rọye ri phiẹ ughugha vwẹ evun rẹ abadi na, kidie ayen ihwiyeri.

¹⁷Jesu da ta kẹ ayen, Nene uvwe, kimi su ovwan phihọ ihwiyeri rẹ ihwo.

¹⁸Siẹvuọvo na ayen da ghwa yan jẹ ighugha rayẹn vwo ayen de nene.

¹⁹Rọ vwọ yan hẹ obaro emerha, ọ da mrẹ Jems ọmọ ri Zẹbidi kugbe Jọn oniọvo rọye re hẹ evun rẹ okọ re rhuẹrẹ ighugha rayen.

²⁰Siẹvuọvo na o de ghwe se ayen; ayen da yan jẹ Zẹbidi ọsẹ rayẹn vwo vwẹ evun rẹ okọ kugbe otu ro durhieri na ayen de nene.

²¹Ayen de kpo Kepanọm; siẹvuọvo na vwẹ ẹdidjala na ọ da ghwa ro sinagọg o de yono.

²²Eyono rọye de gbe ayen unu kidie o yono ayen kerẹ ohwo ro vwo ogangan, ọ gbe họhọ Isiẹbe na-a.

²³Siẹvuọvo na ohwo ọvo herọ vwẹ evun ri Sinagọg rayen na ro vwo erhi ro jẹfuọn;

²⁴O de kperi phia, die wọ cha vwẹ avwanre ru, wẹ Jesu ri Nazarẹt? Wọ rhere rhe ghwọrọ avwanre? Me riẹn ohwo ru wọ epha Ọfuanfon ọvuọvo rẹ Ọghẹnẹ.

²⁵Ẹkẹvuọvo Jesu da ghwo kuo tanẹ; Rhurhu unu wẹn, re wọ wan no.

²⁶Erhi ro jẹfuọn na vwo sio, jo kperẹ urhuru ọgangan, ọ da wan no.

²⁷O de gbe ayen unu, ọtiọye na ayen ke nọ omoma rẹ ayen enanọ, tanẹ,. Ọna kidie? Uyono ọkpokpọ Ọ vwẹ ogangan jiji kẹ irhi ri jẹfuọn, ayen de mu ọghọ kẹ.

²⁸Siẹvuọvo na usi rọye de ghwe mu ro asan kasan re yariẹ ubrakpọ ri Galili ejobi phihọ.

²⁹Siẹvuọvo na o de vrẹn nẹ Sinagọg na, ọ da vwẹriẹ uwevwi ri Saimọn vẹ Andru kugbe Jems vẹ Jọn.

³⁰Asakiephana oniaye ri Saimọn shevwerhẹ vwẹ ọga rẹ ekpahe; siẹvuọvo na ayen da vuẹ.

³¹Ọ da rhe ọ da yọnrọn obọ, ọ da kparọ vrẹn mudia; ẹkpahẹ na de ghwe no oma; o de gbe odibo kẹ ayen.

³²Vwẹ ovwọnvwọn yena, rẹ ọnre vwo she nu, ayen da vwẹ otu rẹ họvwan kugbe otu ri vwo idẹbono ejobi vwọ rhe.

³³Orere na ejobi de rhi si koko vwẹ anurhoro.

³⁴O de sivwi ihwo buebu re họvwan oghoghẹre rẹ emiavwe ọ da djẹ idẹbono buebu phia; ọ gbe rhọvwe nẹ idẹbono na ta ota-a, fikiridie ayen riẹnrẹ.

³⁵Vwẹ irhiọke ride, tavwe rẹ ọke ki ri rhie o de vrẹn kpo asan ofuefu ofuefu, kẹ etiyin ọ da ra nẹ ẹrhovwo.

³⁶Saimọn vẹ otu re vẹ ọye gba hẹrọ de nene.

³⁷ayen da mrẹ ayen da ta kẹ kohwo kohwo ra guọnọ owẹ.

³⁸Ọ da ta kẹ ayen, E je kpo irere ẹfa, rere mi re ghwoghwo ota na vwẹ etiyin rhe; kidie fiki rẹ ọna mẹ vwọ rhe.

³⁹ọ da yan ro Galili ejobi, ghwoghwo vwi Sinagọg rayen jọ djẹ idẹbono phia.

⁴⁰Ọhọnvwoti ọvo de bro rhe kọ rẹ o de diguẹ kẹ, Wọ da rhọvwe wo se ru vwe fon.

⁴¹Aro da dọn, ọ da riẹn obọ vwo te, ọ da ta kẹ nẹ, mẹ rhọvwere; gba fon.

⁴²Siẹvuọvo na oti na de ghwe no, ọ da ghwa fon.

⁴³O da kpa okpa kẹ gangan, o de siobọ no kpo ugege yena.

⁴⁴Ọ da ta kẹ nighe wọ vuẹ ohwo ọvuọvo-o; ẹkẹvuọvo yanran kpo ra vwẹ oma wẹn nẹ orherẹn, re wo zẹ izobo fiki rẹ ẹfuọn wẹn, obo ri Mosis ji urhi kẹ wẹ, rọ dia oka kẹ ihwo na.

⁴⁵Ẹkẹvuọvo ọ yanran ko re ghwoghwo ota na, o de gbe ikun na wan asan ejobi, ọtiọye re Jesu gbe gbavwe udu yan ro orho-o, ẹkẹvuọvo kẹ uphẹphẹ rẹ aghwa ọ dia, kasan kasan ejobi de bro rhe.