Read urhobo Mak 10 Bible Online

Mak 10 - urhobo bible

Mak 10

¹Ọ de vrẹn nẹ etiyin, o de kpo ubrakpọ ri Judia vwẹ ẹbẹre oboyi ri Jọdan; o otu buebu rhoma rhi koko kẹ kirobo ro ruẹ jovwo, o de yono ayen.

²Farisi de bro rhe, ayen da davwọ ni, o fori rere ohwo siobọ nẹ aye rọye?

³Ọ da kpahọ ọ da ta kẹ ayen, Die Mosis ta kẹ ovwan?

⁴Ayen da ta, Mosis rhọvwere nẹ e si ọbe rẹ obọesiono, re e siobọ no,

⁵Ẹkẹvuọvo Jesu da ta kẹ ayen, Fiki rẹ udu ọgangan rẹ ovwan o vwo ji urhi nana kẹ ovwan.

⁶Ẹkẹvuọvo nẹ ẹtuọhọ re ẹma rhe, Ọshare vẹ aye Ọghẹnẹ ma ayen.

⁷Fiki rẹ ọna ọshare vwọ yan jẹ ọsẹ vẹ oni rọye vwo, ọ Me ra gbanọ aye rọye.

⁸ayen ivẹ me rhe dia oma ọvo; fiki re ọtiọye na ayen gbe dia ivẹ-ẹ, ẹkẹvuọvo kẹ oma ọvo.

⁹Fiki rẹ ọtiọye na emu rẹ Ọghẹnẹ ta kugbe nu, e jẹn ohwo hẹriẹ-ẹ.

¹⁰Vwẹ evun rẹ uwevwi idibo rọye da rhoma nọ otọ rẹ ota nana.

¹¹Ọ da ta kẹ ayen, ohwo kohwo ro siobọ nẹ aye rọye ọ da reyọ ọfa, yo gbe igberadja rhurho;

¹²ekpuyovwi rẹ aye ro siobọ nẹ ọshare rọye ọ da reyọ ọfa, yo gbe igberadja.

¹³Ayen da vwẹ imitete vwo rhe, rere ọ vwẹ obọ te ayen; idibo rọye da ghwọ ku ayen.

¹⁴Ẹkẹvuọvo ri Jesu vwọ mrẹ, ivun de miovwo gangan, Ọ da ta kẹ ayen, Ovwan jẹ imitete na bru uvwe rhe, ovwan da ayen jẹ-ẹ; kidie oghẹre nana hẹ uvie rẹ Ọghẹnẹ.

¹⁵Uyota mẹ ta kẹ ovwan, ohwo kohwo rọ reyọ uvie rẹ Ọghẹnẹ kerẹ omotete-e, ọ sa ruo-o.

¹⁶O de mu ayen phihọ obọ rọye ọ ghwẹ obọ kpahe ayen, ọ da vwẹ ẹrhovwo kẹ ayen.

¹⁷Rọ vwọ yanran vwẹ idjerhe na, ohwo ọvo da djẹ bro ra, rhi diguẹ kẹ, ọ da nọ, Oyono, rẹ esiri, die mi ru mi vwo vwo arhọ ri bẹdẹ na?

¹⁸Jesu da ta kẹ, Die wo vwo se vwe ọ rẹ esiri? ọ rẹ esiri herọ-ọ, jokpa rẹ Ọghẹnẹ ọvo.

¹⁹Wọ riẹn irhi na, Wo hwe ohwo-o, Wo gbe igberadja-a Wo cho uji-i, Wo se oseri rẹ ofia-an, Wo ghwa ohwo ria-a, Vwẹ ọghọ kẹ ọsẹ vẹ oni wẹn.

²⁰Ọ da ta kẹ, Oyono, enana ejobi na me yọnrọn ayen nẹ ọkiemọ rhe.

²¹Ri Jesu vwo no ọ de je, ọ da ta kẹ Emu ọvo kanre owẹ; kpo, ra shẹ emu kemu ri wo vwori, re wọ vwo ayen kẹ igbere ku wo che vwo efe vwẹ obo odjuvwu; wọ rhe rhi nene uvwe.

²²Ẹkẹvuọvo o de mu opharo phihọ o de mu oma phihọ kpo, kidie o vwo emu buebu.

²³Ri Jesu vwo ni oma yariẹ, ọ da ta kẹ idibo rọye, mavọ ọ bẹ te re otu ri vwọ efe vwọ ro uvie rẹ Ọghẹnẹ!

²⁴Ota rọye de gbe ayen unu, Ẹkẹvuọvo Jesu da rhoma kpahe, ọ da ta kẹ ayen, Emọ na, mavọ ọ bẹ te kẹ otu re vwẹ ẹro so efe rẹ ayen vwo ro uvie rẹ Ọghẹnẹ!

²⁵Ọ lọhọ kẹ kamẹl rọ vwọ wan unu rẹ ukoti vrẹn, nọ, ọdafe re ọ vwọ ruẹ uvie rẹ Ọghẹnẹ.

²⁶O dẹ gbẹ ayen unu gangan, ayen da ta kẹ, ọ da dia ọtiọye kẹ ono rẹ sa rhọ?

²⁷Jesu de ni ayen ọ da ta, Ihwo ọyẹ ọ bẹn kẹ, ẹkẹvuọvo ọ bẹn kẹ Ọghẹnẹ-ẹ.

²⁸Pita de muohọ eta kẹ, Nighe, avwanre yan jẹn emu ejobi vwo, vwo nene uwe re.

²⁹Jesu da ta, Uyota mẹ ta ke ovwan, o vwo ohwo ọvuọvo re jẹn uwevwi rọye vwo, eyẹ iniọvo re eshare, eyẹ ẹ rẹ eya, eyẹ ọsẹ, eyẹ oni, eyẹ aye, eyẹ emọ, eyẹ otọ, vwi fiki mẹ, kugbe iyẹnrẹ esiri, na.

³⁰rẹ ọvuọvo je vwo ujori kpahe ujori vwẹ asakiephana iwevwi, eyẹ iniọvo rẹ eshare vẹ eya, kugbe ini, kugbe emọ, kugbe etọ, vẹ imu, kugbe arhọ ri bẹdẹ vwẹ akpọ rọ cha.

³¹Ẹkẹvuọvo buebu rẹ karo cha ka uko; e rẹ ka uko cha karo.

³²Ayen ke yan vwẹ idjerhe kpo Jerusalẹm; Jesu da karo kẹ ayen; o de gbẹ ayen unu; oshọ de mu ayen ihwo ri nenire. Ọ da rhoma reyọ ihwivẹ na, o de mu ayen họ eta kẹ emu ri che ruo,

³³nẹ, Nighe, avwanre yanran kpo Jerusalẹm re; a cha reyọ Ọmọ rẹ ohwo vwọ ke ilori rẹ irherẹn kugbe isiẹbe; ayen che bru orhiẹn hwe rere o ghwu, a cha reyọ vwọ kẹ Keferi.

³⁴Ayen cha vwo jehwẹ, e che dje enyan kuo, a cha vwẹ ugbudia fa, e che hwe; ẹdẹ erha da wan nu ko vrẹn.

³⁵Kọye Jems vẹ Jọn emọ ri Zẹbidi, i de bro rhe rhe ta kẹ, Oyono, avwanre guọnọre rere wo ru obo rẹ avwanre yare owẹ ejobi kẹ avwanre.

³⁶Ọ da ta kẹ ayen nẹ, Die ovwan guọnọre nẹ mi ru kẹ ovwan?

³⁷Ayen da ta kẹ, Rhọvwe re avwanre ọvo vwo tidia vwẹ obọrhẹ wẹn, ọ rivẹ obọhwẹre wẹn vwẹ evun rẹ urinrin wẹn.

³⁸Ẹkẹvuọvo Jesu da ta kẹ ayen, Ovwan riẹn obo rẹ ovwan yare na-a. Ovwan sa da uko rẹ mẹ da? gbenẹ ovwan sa reyọ amẹ-ẹvwọkẹ ra vwọ kẹ vwẹ?

³⁹Ayen da ta kẹ, avwanre se ruo. Jesu da ta kẹ ayen, ovwan cha da uko re me da; ovwan je sa reyọ amẹ-ẹvwọkẹ ra vwọ kẹ vwẹ;

⁴⁰ẹkẹvuọvo re vwo tidia obọrhe mẹ eyẹ obọhwẹre mẹ ọ dia omẹvwẹ rẹ vwọ kẹ-ẹ; ẹkẹvuọvo ọ rẹ otu ra rhuẹrẹ phihọ otọ kẹ.

⁴¹Ẹkẹvuọvo rẹ ihwe na vwo nyo, ivun dẹ miovwi ayen gangan kpahe Jems vẹ Jọn.

⁴²Jesu de se ayen bro rhe ọ da ta kẹ ayen, Ovwan riẹnre nẹ ihwo re vwo mu ni sun Ikeferi na vwẹ ọrho nyẹ ayen, ihwo ride vwẹ ohri rayen vwẹ ogangan sun ayen.

⁴³Ẹkẹvuọvo ọ sa dia ọtiọye vwẹ ohri rẹ ovwa-an; ẹkẹvuọvo ohwo kohwo rọ rhoro vwẹ ohri rẹ ovwan, Ọye cha dia odibo rẹ ovwan;

⁴⁴ohwo kohwo rọ guọnọ nẹ ọye karo, ọye cha dia odibo rẹ ovwan ejobi.

⁴⁵Ghine uyota ọmọ rẹ ohwo rhere re vwo gbe odibo kẹ-ẹ, ẹkẹvuọvo re o vwo gbe odibo, rọ vwọ vwẹ arhọ rọye tan ihwo buebu.

⁴⁶Ayen da rhe Jeriko; kirobo rọ vwọ yan nẹ Jeriko, ọ vẹ idibo rọye kugbe otu buebu, Batimiọs rẹ ọmọ ri Timiọs, orhuẹro rọ yare emu ria, o tidia orhoma rẹ idjerhe.

⁴⁷Ro vwo nyo, nẹ Jesu ri Nazarẹt, o de muhọ ekpere, nẹ, Jesu, Ọmọ ri Devid, ni aruẹdọn mẹ.

⁴⁸Ayen buebu da van kuo nẹ, o rhurhu unu rọye ẹkẹvuọvo ọ da rhoma kperi gangan, vrẹn eriyin, Wọwẹ Ọmọ ri Devid, ni aruẹdọn mẹ.

⁴⁹Jesu de mudia, ọ da ta nẹ, ovwan se. Ayen de se orhuẹro na, ayen da ta kẹ, Ghọghọ, vrẹn, o se we.

⁵⁰Ro vwo do iwun rọye kufia nu, o de pho kpo enu, o de bru Jesu rhe.

⁵¹Jesu da kpahe kẹ, Die wọ guọnọre ni mi ru kẹ wẹ? Orhuẹro na da ta kẹ, Rabbi, me guọnọre rere me mrẹ orẹ.

⁵²Jesu da ta kẹ, yanran kpo, esegbuyota wẹn sivwi uwe nure. Ọ da ghwa mrẹ orẹ, o de nene vwẹ idjerhe na.