Read urhobo Mak 11 Bible Online

Mak 11 - urhobo bible

Mak 11

¹Ọke re ayen rhi vwo sikẹre Jerusalẹm, rhi te Bẹtfagi vẹ Betani, vwẹ ugbenu rẹ Ọlivi o de ji idibo rọye ivẹ,

²Ọ da ta kẹ ayen, ovwan yanran kpo ighwre rọ hẹ obaro rẹ ovwan na; rẹ ovwan da ghwa ro ighwre na, ovwan cha mrẹ ọmọ rẹ ekẹtẹkẹtẹ re churu, rẹ ohwo ọvuọvo ji tidia dẹvo-o, a rhan, ra reyọ rhe.

³Ọ da dianẹ ohwo ọvo nọ ovwan, Die ovwan vwo ruẹ ọnana? Ovwan ta nẹ, Ọrovwori re guọnerọ, kọ ghwa vwọ rhe etinẹ.

⁴Ayen da yanran, ayen da mrẹ ọmọ rẹ ekẹtẹkẹtẹ na re churu phihọ uphẹphẹ rẹ urhuvwu ayen da rhan.

⁵Ẹvo ri mudia vwẹ etiyin da ta kẹ ayen, Die ovwan ruẹ, re ovwan vwọ rhan ọmọ rẹ ekẹtẹkẹtẹ na?

⁶Ayen da ta ọtiobo ri Jesu ta kẹ ayen; ayen de jẹn ayen vwọ yanran.

⁷Ayen da vwẹ ọmọ rẹ ekẹtẹkẹtẹ na rhe Jesu, ayen da vwẹ emwa rayen vwọ hwa enu rọye; Jesu de tidia enu rọye.

⁸Ayen buebu da vwẹ emwa rayen hwa idjerhe; efa da nyavwe eghọn rẹ irhe, vwọ hwa idjerhe.

⁹Otu re yan ka obaro, kugbe i ri nene vwẹ obuko, de kperi Hozanna; Ebruphihọ kẹ ohwo rọ cha vwẹ odẹ rẹ Ọrovwohwo.

¹⁰Ebruphihọ kẹ uvie rọ cha na, uvie ri Devid ọsẹ rẹ avwanre; Hozanna vwẹ asan ro kpenu.

¹¹Ọ da ro Jerusalẹm, kpo evun rẹ uwevwi rẹ ẹga; ọke ro vwo ni emu na ejobi yariẹ nu, ro vwo te ovwọnvwọn re, ọ vẹ ihwivẹ na de nẹ etiyin kpo Bẹtani.

¹²Ẹdẹ rivẹ, rẹ ayen vwo nẹ Bẹtani cha, owẹvwe de hwe.

¹³Rọ vwọ mrẹ owe ro vwo ẹbe vwẹ ogboko, ọ da rhe sọ sa mrẹ emu vwọ; ọke ro rhi vwo te, ọ gbe mrẹ emu ọvo-o; jokpa rẹ ẹbe ọvo kidie o ji te ọke rẹ iwe-e.

¹⁴Ọ da ta kẹ urhe na nẹ, nẹ ọke nana yanran ohwo gbe sa re emamọ vwẹ enu wẹn ọfa bẹdẹ-ẹ. Idibo rọye de nyo.

¹⁵Ayen da rhe Jerusalẹm; ọ da ro uwevwi rẹ ẹga na, o de mu ayen ejobi re shẹ vẹ otu re dẹ vwẹ uwevwi rẹ ẹga na họ ẹdjẹ, o de gere imẹjẹ rẹ iwenigho she, kugbe egbara rẹ otu re shẹ ilekuku;

¹⁶Ọ gbe rhọvwe nẹ ohwo ọvuọvo wan uwevwi rẹ ẹga na vrẹ-ẹn.

¹⁷O de yono, ọ da ta kẹ ayen, E siro jovwo, uwevwi mẹ e se nẹ uwevwi rẹ ẹrhovwo kẹ ẹgborho na ejobi? ẹkẹvuọvo ovwan vwi ro ru uwevwi rẹ iji.

¹⁸Ilori rẹ irherẹn kugbe isiẹbe vwo nyo, ayen da guọnọ obo rẹ ayen ru hwe; kidie ayen djẹ oshọ rọye, fiki rẹ eyono rọye ro gbe ayen ejobi unu.

¹⁹Rẹ ovwọnvwọn vwo te ayen da yan nẹ orere na.

²⁰Rẹ ayen vwọ wan vrẹn vwẹ irhiọke na, ayen da mrẹ urhe rẹ owe na ro lori nẹ otọ re duvwu enu.

²¹Pita rhe vwọ karohọ ọ da ta kẹ, Rabbi, nigbe, urhe rẹ owe na re wọ harhere na o lo re.

²²Jesu da kpahe ọ da ta kẹ ayen, ovwan vwo esegbuyota kpahe Ọghẹnẹ.

²³Uyota Me ta kẹ ovwan kohwo kohwo rọ ta kẹ ugbenu nana, Ghwie re she phihọ urhie, ro gbi vwo evun ivẹ-ẹ, ẹkẹvuọvo o de segbuyota nẹ obo rọ tare na cha phia, kọ ghene dia ọtiọye.

²⁴Fiki rẹ ọtiọye na Me ta kẹ ovwan, kemu kemu rẹ ovwan nọre vwẹ ẹrhovwo ovwan de segbuyota nẹ o te ovwan obọ nure ovwan ki vwo.

²⁵Kẹsiẹ kẹsiẹ rẹ ovwan de mudia nẹ ẹrhovwo, rẹ ovwan vẹ ohwo de vwo ẹghwọ, vwo ghovwo; rere Ọsẹ rẹ ovwan rọ hẹ obo odjuvwu vwo ghovwo ogbeku rẹ ovwan.

²⁶Ẹkẹvuọvo ovwan vwo ghovwo-o Ọsẹ rẹ ovwan rọ hẹ obo odjuvwu ji se vwo ghovwo ovwa-an.

²⁷Ayen da rhoma rhe Jerusalẹm; rọ vwọ yan vwẹ evun rẹ uwevwi rẹ ẹga na, ilori re irherẹn, kugbe isiẹbe, kugbe ekpako na de bro rhe;

²⁸ayen da nọ, didi ogangan wo vwo ruẹ imu nana? gbenẹ ono vwẹ ogangan nana kẹ wẹ wo vwo ruẹ imu nana?

²⁹Jesu da ta kẹ ayen, mẹ je nọ ovwan onọ ọvo, re ovwan jẹ kpahọ kẹ vwẹ, re Me ke ta ogangan ri mi vwo ruẹ imu nana kẹ ovwan.

³⁰Amẹ-ereyọ ri Jọn, odjuvwu o nurhe, gbenẹ obọ rẹ ihwo? A kpahọ kẹ vwẹ.

³¹Ayen de nene omoma rẹ ayen phro aphro, nẹ, Avwanre da ta, Odjuvwu o nurhe, kọ ta kidie jabọ ovwan gbi segbuyota-a?

³²Ẹkẹvuọvo avwanre da ta obọ rẹ ihwo avwanre jẹ djẹ oshọ rẹ ihwo; kidie ihwo na ejobi riẹnre nẹ Jọn ghine ọmraro rẹ uyota.

³³Ayen da kpahe ta kẹ Jesu, Avwanre riẹnre-e. Jesu da ta kẹ ayen, Ẹriyin na Me gbe je sa fan ogangan ri mi vwo ruẹ imu nana kẹ ovwa-an.