Read urhobo Mak 13 Bible Online

Mak 13 - urhobo bible

Mak 13

¹Ro vwo nẹ uwevwi rẹ ẹga na cha ọvo vwẹ idibo rọye da ta kẹ, Oyono, ni, egheghẹre rẹ eragha kugbe eghẹre re ẹdovwọ!

²Jesu da ta kẹ, Wọ mrẹ ẹdovwọ ride nana? Oragha ọvuọvo ro che chekọ vwẹ enu rẹ oragha ọfa, re che je kporo she teye otọ herọ-ọ.

³Ro vwo tidia enu rẹ ugbenu rẹ Oliv hirhe aro ku uwevwi rẹ ẹga na, Pita, kugbe Jems kugbe Jọn vẹ Andru da nọ vwẹ odjahọ,

⁴Ta kẹ avwanre ọke ọvo imu nana che vwo ruẹ? die re cha dia oka rẹ ọke rẹ imu nana ejobi cha vwọ gba?

⁵Jesu de mu ayen họ eta kẹ, Ovwan kẹnoma rere ohwo vwo jẹ ovwan esuo ghwro.

⁶Ihwo buebu cha rhe vwẹ odẹ mẹ, ta nẹ, Mẹvwẹ hẹ ọye, i mi sun otu buebu ghwru.

⁷Vwẹ ọke rẹ ovwan de che nyo ifovwi kugbe usi rẹ ifovwi, ovwan jẹ udu kpokpo ovwa-an; imu nana cha ka phia tavwe, ẹkẹvuọvo yẹ oba na ji te-e.

⁸Kidie ẹgborho che vrẹn vwọ so ẹgborho uvie cha vwọ so uvie, etọ che kpogho vwẹ asan buebu ewẹvwe che fi enana re cha dia ẹtuọhọ rẹ oja.

⁹Ẹkẹvuọvo ovwan kẹnoma rẹ ovwan. kidie ayen reyọ ovwan vwọ kẹ ediaguare, ayen che hwe ovwan vwẹ evun ri sinagọg; a cha vwẹ ovwan mudia vwẹ obaro rẹ ehọnvwọre kugbe ivie vwi fiki mẹ, re ọ dia iseri kẹ ayen.

¹⁰Iyẹnrẹ esiri na kọye e ke ghwoghwo kẹ akpọ na ejobi tavwe.

¹¹Ra da rhe vwẹ ovwan guẹdjọ, re de mu ovwan kẹ ayen, ovwan ro ẹnwan jẹ iroro rẹ obo rẹ ovwan ta-a; ẹkẹvuọvo obo ra vuẹ ovwan vwẹ ọke yena ọye wọ ta; kidie ọ dia ovwan re ta-a ẹkẹvuọvo Erhi Ọfuanfon na.

¹²Oniọvo cha vwẹ oniọvo re odọvwe ra vwọ mrasan hwe ghwu, ọsẹ cha vwẹ ọmọ re ọdọvwe; emọ che vrẹn vwọ so i ri vwiẹ ayen, rere evwo hwe ayen ghwu.

¹³Ihwo ejobi cha jẹ ovwan eghrẹ vwi fiki rẹ odẹ mẹ; ẹkẹvuọvo ohwo ro se chirako ri te oba, ọye re cha rhọ.

¹⁴Re ovwan da ghwa mrẹ emu rẹ ẹguaegbe rọ nẹrhẹ asan vẹn ro mudia vwẹ asan rọ foro-o je jẹn ọ ro se riẹn otọ rọye, gbe jẹn otu re dia obi Judia djẹ kpo enu rẹ igbenu;

¹⁵e jẹn ohwo rọ hẹ enu rẹ uwevwi wotọ-ọ, eyẹ ọ vwẹriẹ uwevwi rọye, ra reyọ emu no-o;

¹⁶e jẹn ọ rọ hẹ evun rẹ aghwa rhivwi cha cha reyọ ewun rọye-e.

¹⁷Ẹkẹvuọvo ekan kẹ otu re mrevun kugbe otu re vwẹ ivie kẹ emọ vwẹ ẹdẹ yena!

¹⁸Ovwan nẹ ẹrhovwo re o jẹ ọke ohwahwa ẹdia.

¹⁹kidie ukpokpogho ra je mrẹ dẹvo-o nẹ ẹtuọhọ rẹ ẹma rẹ Ọghẹnẹ rhe rhi te ọke nana cha phia vwẹ ẹdẹ yena, a gbe je mrẹ oghẹre ọtiọye ọfa bẹdẹ-ẹ.

²⁰Ọ dianẹ kẹ Ọrovwohwo gbi bru ẹdẹ na krẹ-ẹ, ohwo rọ rhọ gbe dia-a; ẹkẹvuọvo vwi fiki rẹ otu ra jẹreyọ na, ọye o vwo ru ẹdẹ na krẹ.

²¹Vwẹ ọtiọye na ohwo da ta kẹ ovwan, Nighe Kristi hẹ etinẹ, eyẹ, Nighe, Ọ hẹ oboyi, we segbuyota-a;

²²Kidie Kristi rẹ efian kugbe emraro rẹ efian che mu, e cha vwẹ eka kugbe imuighunu phia, o de se ru dede ayen phiẹn otu ra jẹreyọ na ghwru.

²³Ẹkẹvuọvo ovwan kẹnoma; nighe Me ta imu na ejobi kẹ ovwan nure.

²⁴Ẹkẹvuọvo vwẹ ẹdẹ yena, rẹ ukpokpogho na de re nu, ọnre ko che mu ebri, emeranvwe gbi se lo-o.

²⁵Isio ki che she nẹ enu rhe egangan re he obo odjuvwu ki che kpogho.

²⁶Kẹsiẹye etiyin ayen ke cha mrẹ Ọmọ rẹ ohwo rọ cha vwẹ evun rẹ egho vẹ ogangan rode kugbe urinrin.

²⁷Etiyin ko che ji emakashe na, re koko otu ra jẹreyọ na nẹ igogo ẹne rẹ akpọ na rhe nẹ oba rẹ akpọ na re rẹ oba rẹ odjuvwu.

²⁸Ovwan gbe yono itẹ rẹ urhe rẹ owe na; ọkẹ rẹ eghọn rọye da hẹ eboba, re e da ghwẹ ẹbe phihọ ovwan gba ghwa riẹn nẹ ọkeuvo sikẹre re.

²⁹Ọtiọye rhe, ọke rẹ ovwan da mrẹ imu nana re rhe phia ovwan gba riẹn nẹ o sikẹre unurhoro kpekpe re.

³⁰Uyota Me ta kẹ ovwan, orua nana sa wan bẹsiẹ rẹ imu nana ejobi vwo ru gba-a.

³¹Odjuvwu kugbe akpọ cha wan ẹkẹvuọvo ota mẹ sa wa-an.

³²Ẹkẹvuọvo ẹdẹ yena eyẹ ọke yena ohwo ọvuọvo riẹnrẹ-ẹ emakashe re hẹ obo odjuvwu dede sa riẹ-ẹn eyẹ Ọmọ-ọ, ẹkẹvuọvo Ọsẹ na ọvo.

³³Ovwan kẹnoma, a rhẹrẹ ra nẹ ẹrhovwo; kidie ovwan riẹn ọke ro vwo te-e.

³⁴Kẹrẹsiẹ rẹ ohwo e de kpo oyan, rọ da yan jẹ uwevwi rọye vwo, ọ da vwẹ ogangan kẹ idibo rọye, dohwo diruo rọye o de jiji kẹ ọrhẹrẹchẹ re ọ rhẹrẹ.

³⁵Vwẹ ọtiọye na ovwan rhẹrẹ; kidie ovwan riẹn ọke rẹ ọ ro vwo uwevwi na vwo rhe-e, sẹ ovwọnvwọn, gbenẹ uherevie ason, gbenẹ ọke rẹ ọhọ de bo, eyẹ urhiọke;

³⁶rẹ ọ da rhe orharhiri re o jẹ ovwan ẹvwa vwẹ ovwerhẹ.

³⁷obo me ta kẹ ovwan na, ihwo ejobi mẹ taro kẹ, A rhẹrẹ.