Read urhobo Mak 14 Bible Online

Mak 14 - urhobo bible

Mak 14

¹Asakiephana o chekọ ẹdẹ ivẹ ro ki rhi te orẹ Ẹwanvrẹn kugbe orẹ rẹ ikara ro Jephuo, ilori rẹ irherẹn kugbe isiẹbe ke guọnọ obo rẹ ayen vwọ vwẹ ona vwo muo, rere e hwe;

²Kidie ayen tare, Ọ dia ọke orẹ na-a, ihwo na de rhe do.

³Ọke rọ vwọ hẹ Bẹtani vwẹ uwevwi ri Saimọn ọhonvwoti na, ro vwo tidia udoemu aye ọvo da reyọ ọgọ rẹ udẹ re se spikenard rọ ghare gangan ọ da rhe; o de rhie ọgọ na, o de ku ude na ku uyovwi ri Jesu.

⁴Ẹkẹvuọvo ẹvo he rọ rẹ ophu muru vwẹ omoma rẹ ayen, ta nẹ, Die vwọ rhaphiẹ nde nana kẹ na?

⁵Manẹ a shẹ udẹ nana vrẹn ikoba ujori erha ra vwọ kẹ igbere. Ayen ke ghwọ kuo.

⁶Ẹkẹvuọvo Jesu da ta, E jo vwo; Die ovwan vwo kpokpo? o ru iruo esiri kẹ vwẹ.

⁷Kidie ovwan vẹ igbere na re gba herọ vwẹ ọke ejobi ọke ro je ovwan we ru obo ri yoma ke ayen: ẹkẹvuọvo mẹ vẹ ovwan sa dia vwẹ ọke ejobi-i.

⁸O ru ọ ro se ru nure. ọ vwẹ udẹ ghworo uvwe bẹsiẹ ro vwo te ọke rẹ esho mẹ.

⁹Uyota Me ta kẹ ovwan, asan kasan re de gbe iyẹnrẹ esiri na vwẹ akpọ na ejobi ọ rẹ aye nana ruru na e ji gbe rhe rere a vwọ karo phihọ.

¹⁰Judas Iskariọt, ọvo vwẹ ihwivẹ na, da yanran bru ilori rẹ irherẹn re ọ vwọ re odọvwe kẹ ayen.

¹¹Ọke rẹ ayen vwo nyo, ayen da ghọghọ, ayen de ve kẹ nẹ ayen kẹ igho. Ọ da guọnọ rọ sa vwọ ọke ro shephihọ rọ vwọ shẹ kẹ ayen.

¹²Vwẹ ẹdẹ rẹsosuọ rẹ Ikara rọ Jephno na, rẹ ayen vwo ze izobo rẹ Ewanvrẹn nu, idibo rọye da ta kẹ, Tivọ wọ guọnọre nẹ avwanre rhuẹrẹ kpahe kẹ wẹ re wọ da re Ewanvrẹn na?

¹³O de ji idibo rọye ivẹ, ọ da ta kẹ ayen, ovwan yanran kpo orere na, ohwo rọ ghwa ochẹ rẹ ame cha vwa ovwan: ovwan nene;

¹⁴asan kasan rọ cha vwẹriẹ, ovwan ta kẹ ohwo ro vwo evwruwevwi na nẹ, Oyono na tare, Tivọ uvun rẹ erhorha na epha, re Me vẹ idibo mẹ da cha re orẹ rẹ Ewanvrẹn na?

¹⁵Ko dje ubruwevwi rẹ enu rode ra rhuẹrẹ fia kẹ ovwan; etiyin ovwan rhuẹtẹ phihọ otọ kẹ avwanre.

¹⁶Idibo rọye da yanran, ra ro orere na, ayen da mrẹ kirobo rọ ta kẹ ayen na ayen da thuẹrẹ Ewanvrẹn na kpahe.

¹⁷Rẹ ovwọnvwọn vwo te re ọ vẹ ihwivẹ na da yan rhe.

¹⁸Rẹ ayen vwo tidia rẹ ayen vwọ ria emu na, Jesu da ta, Uyota mẹ ta kẹ ovwan, ọvo vwẹ usun rẹ ovwan re vẹ ovwẹ gba ria emu na cha shẹ vwẹ.

¹⁹Ayen de vwerhe oma ayen ọvuọvo da ta kẹ, kẹ omẹvwẹ?

²⁰Ọ da ta kẹ ayen, ọvo vwẹ ihwivẹ na, rọ vẹ ovwẹ gbe duvwu obọ pbihọ ẹvwẹrẹ ọvo na.

²¹Kidie Ọmọ rẹ ohwo cha yanran kirobo re siro kpahọ: ẹkẹvuọvo ekan kẹ ohwo yena, ra wan oma rọye she Ọmọ rẹ ohwo! mane e rhe vwiẹ ohwo yena jovwo-o.

²²Rẹ ayen vwọ ria emu na, ọ da reyọ ikara o de bro ọ da vwọ kẹ ayen, ọ da ta, ovwan reyọ; Ọnana oma mẹ.

²³Ọ da reyọ uko, rọ vwọ kpẹvwẹ nu, ọ da vwọ kẹ ayen; ayen ejobi ke da.

²⁴Ọ da ta kẹ ayen, Ọnana ọbara mẹ rẹ ọphọ na, ro hwẹ kẹ otu buebu.

²⁵Uyota, mẹ ta kẹ ovwan, mẹ gbe cha da omamọ rẹ vain ọfa-a, bẹsiẹ ro vwo te ẹdẹ yena re me vwọ da ọkpokpọ vwẹ uvie rẹ Ọghẹnẹ na.

²⁶Ọke rẹ ayen vwọ so une nu, ayen da yanran kpo obo ugbenu rẹ Oliv.

²⁷Jesu da ta kẹ ayen, Ovwan ejobi che she; kidie e siro Me cha fa osuigegede na, igegede na ke cha hra.

²⁸Ẹkẹvuọvo, a da kpare ovwẹ vrẹn nu, kẹ Me karo kẹ ovwan kpo obi Galili.

²⁹Ẹkẹvuọvo Pita da ta kẹ, Owenẹ Ayen ejobi she dede, yi mi she-e.

³⁰Jesu da ta kẹ, Uyota Me ta kẹ wẹ, nẹ nonẹ na, vwẹ ason nana, tavwe rẹ ọhọ ki bo asiava, wọ cha sen vwẹ asiarha.

³¹Ẹkẹvuọvo ọ da ta kokoroko, Ọ da dianẹ obo re me vẹ owẹ de ghwu dede mẹ sa sen wẹ-ẹ. Ota ọvo na ayen ejobi je ta rhe.

³²Ayen de kpo asan re se Gẹtsimani; ọ da ta kẹ idibo rọye, Ovwan tidia etinẹ, rẹ me ra nẹ ẹrhovwo.

³³Ọ da reyọ Pita vẹ Jọn kugbe Jems vwọ ba oma, o de gbe unu, O de vwerhi gangan,

³⁴Ọ da ta kẹ ayen, Enwẹn mẹ vwerhiri gangan kẹ ughwu na; ovwan tidia etinẹ, ovwan rhẹrẹ.

³⁵Ọ vwọ yan hẹ obaro emerha, o de she ghwiẹ otọ, ọ da nẹ ẹrhovwo nẹ, o de se ru manẹ uko nana wan vrẹn ọye.

³⁶Ọ da ta, Baba, Ọsẹ, emu na ejobi phẹre kẹ wẹ; si uko nana nẹ uvwe oma; ọ dia obo re me guọnọre-e ẹkẹvuọvo obo wọ guọnọre.

³⁷Ọ da rhe, ọ da mrẹ ayen re vwerhẹ, ọ da ta kẹ Pita, Saimọn, wọ vwerhẹ? wọ sa rhẹrẹ unọke ọvo-o?

³⁸Ovwan rhẹrẹ re wa rẹ, re ovwan vwọ jẹ ọdavwini ẹruọ; uyota o ghine we erhi, ẹkẹvuọvo ugboma vwiẹre.

³⁹O da rhoma yanran ọ da nẹ ẹrhovwo, ta eta ọvuọvo na.

⁴⁰O vwo rhivwi rhe, ọ da jẹ vwa ayen re vwerhẹ, kidie ẹro rayen họhọre gangan; ayen gbe riẹn obo rẹ ayen kpahe kẹ-ẹ.

⁴¹Ọ da rhe obọ rerha, ọ da ta kẹ ayen, Ovwan gba vwerhẹ, ovwan gbe rovwo oma, o tere; ọke na tere; nighe, a vwẹ Ọmọ rẹ ohwo re odọvwe kẹ iruimwemwu nure.

⁴²Evrẹn ra yanran; nighe, ohwo rọ vwerọ re odọvwe na sikẹre re.

⁴³Siẹvuọvo ua, rọ ghwa vwọ ta ota na, Judas, ọvo vwẹ ihwivẹ na da rhe, ọ ghwẹ otu buebu nene oma vẹ elọkọ kugbe ekọnọ, ri nẹ obọ rẹ ilori rẹ irherẹn vẹ isiẹbe kugbe ekpako na rhe.

⁴⁴Asakiepbana ọ rọ vwẹrọ rẹ odọvwe na vwẹ oka kẹ ayen, tanẹ, Ohwo kohwo re me cha fiọnfiọn unu, yẹ ọye, ovwan muo, re e suo yanran dẹndẹn.

⁴⁵ọke ro vwo rhire ọ da ghwa yan bro rhe, ọ da ta, Rabbi, ọ da fiọnfiọn unu.

⁴⁶Ayen de shabọ phihọ ayen de muo.

⁴⁷Ẹkẹvuọvo ọvo rẹ ayen ro mudia kẹrẹ de yoro ọlọkọ rọye, ọ da nyavwe odibo rẹ orherẹn rode na, ọ da fian orhọn rọye no.

⁴⁸Jesu da ta kẹ ayen, ovwan bru uvwe rhe vẹ elọkọ vẹ ekọnọ kerẹsiẹ re bru oji vẹ igbuiegbu?

⁴⁹Me vẹ ovwan gba dia evun rẹ uwevwi rẹ ẹga kẹdẹ kẹdẹ vwo yono, ovwan shabọ phihọ ovwẹ-ẹ ẹkẹvuọvo e ru ọna rere ẹbe ọfuanfọn na vwọ mrasan gba.

⁵⁰Ayen ejobi da yan jovwo, ayen da djẹ.

⁵¹Emeghene ọvo de nene, ọ ghwa emuọvo-o jokpa rẹ amwua ro vwo phopho oma ihwo na da yọnrọn;

⁵²ẹkẹvuọvo o de siobọ nẹ amwua na, ọ da djẹ yanran ẹbẹban.

⁵³Ayen de sun Jesu yanran kpo obo rẹ orherẹn rode, ilori rẹ irherẹn ejobi kugbe ekpako vẹ isiẹbe na de koko brọ.

⁵⁴Pita de nene shesheri, re te egodo rẹ orherẹn rode na; o de tidia kẹrẹ inotu rẹ ohẹrhẹ.

⁵⁵Ilori rẹ irherẹn kugbe ediaguare ejobi da guọnọ oseri se hwe Jesu, re ayen vwo hwe, ayen mrẹre-e.

⁵⁶Kidie otu buebu se oseri rẹ eku hwe, ẹkẹvuọvo unu rẹ iseri rayen shẹhọ ọvo-o.

⁵⁷Evo de mudia, vwo se oseri hwe, nẹ,

⁵⁸Avwanre nyori rọ tarẹ nẹ, Mẹ cha guọghọ uwevwi rẹ ẹga na ra vwẹ abọ bọn na, ẹdẹ erha ke Me bọn ọfa ra vwẹ obọ bọ-ọn.

⁵⁹Dede yẹ unu rẹ iseri rayen ji shehọ ọvo-o.

⁶⁰Orherẹn rode na de mudia vwẹ uherevie, ọ da nọ Jesu, nẹ, Wo mrẹ obo wọ kpahe-e? Didi emu ihwo nana se oseri rọye kpahe owẹ na?

⁶¹Ẹkẹvuọvo ọ da fotovwi, ọ kpahe emuọvo-o. Orherẹn rode na da rhoma nọ, Wọwẹ hẹ Kristi na, Ọmọ rẹ o ro vwo Ebruphihọ na?

⁶²Jesu da ta, Mẹvwẹ hẹ ọye ovwan cha mrẹ Ọmọ rẹ ohwo ro tidia vwe obọrhe rẹ Ogangan, ro nẹ ikoro rẹ obenu na cha.

⁶³Orherẹn rode na de si emwa rọye bẹre ọ da ta, Iseri ọfa vọ avwanre guọnọ?

⁶⁴Ovwan nyo eta rẹ ẹguaegbe rọye; mavọ we roro orhiẹn na te? Ayen ejobi de bru hwe nẹ o fo ughwu.

⁶⁵Ẹvo ki dje enya kuo, ayen de rhurho opharo rọye, ayen da teyọ, ayen da ta kẹ nẹ, Mraro; Otu rẹ ohẹrhẹ na da vwẹ ubi dede.

⁶⁶Ri Pita je vwọ hẹ otegodo na, ọvo vwẹ emetẹ rẹ Orherẹn rode na da rhe;

⁶⁷rọ vwọ mrẹ Pita rọ dia erhanre ọ da nọ, ọ da ta, Wọwẹ je vwẹ ọvo rọ vẹ ohwo ri Nazarẹt na gba dia, ọ re se Jesu na?

⁶⁸Ẹkẹvuọvo ọ da phrọ, tanẹ, Me riẹnrẹ-ẹ, mi ji vughe obo re wọ ta na-a; o de vrẹn yanran kpo obo unu rẹ egodo na, ọhọ de bo.

⁶⁹Ọmọtẹ ọvo na da rhoma mrẹ, ọ da ta kẹ otu ri mudia kẹrẹ, Ọna ọvo vwẹ usun rẹ ayen.

⁷⁰Ẹkẹvuọvo ọ da rhoma phrọ. Ọ vwọ dia emerha i ri mudia vwẹ etiyin da rhoma ta kẹ Pita, nẹ, Ghine uyota wọwẹ je vwẹ ọvo vwẹ usun rẹ ayen; kidie wọwẹ ohwo ri Galili.

⁷¹Ẹkẹvuọvo o de duvwu iyori hwe oma rọye, Me riẹn ohwo nana re ovwan ta ota rọye na-a.

⁷²Siẹvuọvo na ọhọ de ghwe bo obọ rivẹ. Pita da karọhọ ota ri Jesu ta kẹ, nẹ, Tavwẹ rẹ ọhọ ki bo asiava, wọ sen vwẹ asiarha. Ro rhi vwo roro, ọ da viẹ.