Read urhobo Mak 15 Bible Online

Mak 15 - urhobo bible

Mak 15

¹Rẹ urhiọke ghwe vwo te ilori rẹ irherẹn kugbe ekpako vẹ isiẹbe kugbe ediaguare na da ghwa jẹ iroro kugbe, ayen da gba Jesu, ayen de suo yanran vwo rhe Pailet.

²Pailet da nọ, Wẹ ghine ovie ri Ju na? Ọ da kpahe kẹ, Wẹ re ta ọtiọye.

³Ilori rẹ irherẹn de mu emu buebu barọ.

⁴Pailet da rhoma nọ, Wọ mrẹ obo wọ kpahe-e? gbe nighe emu buebu rẹ ayen mu bare owẹ.

⁵Ẹkẹvuọvo Jesu je kpahe emuọvo-o, vwẹ ọtiọye na o de gbe Pailet unu.

⁶Asakiephana vwẹ asan orẹ na o siobọ nẹ ohwo ọvo vwẹ uwodi na kẹ ayen jovwo rẹ ayen nọ ekpẹn rọye.

⁷Vwẹ usun rẹ ihwo ri gbe ozighi re mu phihọ uwodi na, ozighẹ ọvo herọ rọ so ota, re se Barabas.

⁸Otu buebu na de tue rhe ayen da ta kẹ Pailet nẹ o ru obo ro ruẹ jovwo na kẹ ayen.

⁹Pailet da kpahe kẹ ayen, Ovwan guọnọre ni mi siobọ nẹ ovie ri Ju na kẹ ovwan?

¹⁰Kidie ọ riẹnre nẹ fiki rẹ omaẹriọ ọye ilori rẹ irherẹn na vwo muo rhe.

¹¹Ẹkẹvuọvo ilori rẹ irherẹn na da ha otu na phihọ, re o siobọ nẹ Barahas kẹ ayen.

¹²Pailet da rhoma kpahe ta kẹ ayen, Komavọ mi ru ọ rẹ ovwan se Ovie ri Ju na?

¹³Ayen da rhoma kperi, Kanrọ mu agbagba.

¹⁴Pailet da ta kẹ ayen, Didi emu omiomiovwi o ruru? Ayen da yan kperi gangan, Kanrọ mu agbagba.

¹⁵Ri Pailet, vwọ guọnọ nẹ ọye ru obo ri je ihwo na kẹ ayen; o de siobọ nẹ Barabas kẹ ayen, rọ vwọ fa Jesu nu, ọ da vwọ kẹ ayen ra kanre mu agbagba.

¹⁶Isodje na de suo yanran kpo ọguan, (re se Pritoriọm); ayen de se isodje na ejobi koko.

¹⁷Ayen de ku ewun ọvwavware phihọ oma, ayen de me erhu rẹ inwe vwo tughẹ;

¹⁸ayen ki yere, Do, Ovie ri Ju!

¹⁹ayen da vwẹ ọghọrọgbọdọ teyọ uyovwi, ayen de dje enya kuo ayen de diguẹ vwẹ obaro rọye ayen da ga.

²⁰Rẹ ayen vwọ vwọ jẹ ehwẹ nu, ayen de si ewun ọvwavware na no ma, ayen de ku ewun rọye phihọ oma. Ayen de suo yanran ra kanre mu agbagba.

²¹Ayen da gba ohwo ọvo rọ wan vrẹn, Saimọn ohwo ri Sairini, ọsẹ rẹ Alẹkzanda vẹ Rufọs, ro nẹ obo orho cha, re o nene ghwa agbagba royẹ.

²²Ayen da vwọ rhe asan re se Gọlgọta otọ rọye, Asan rẹ ekpehre uyovwi.

²³Ayen da vwẹ wain ra vwẹ adjija gua kẹ nẹ ọ da; ẹkẹvuọvo ọ darọ-ọ.

²⁴Ayen da kanrọ mu agbagba, ayen da ghare ewun rọye vwe ohri rẹ ayen, ayen da vwe ayen duvwu itẹ, re ayen vwọ riẹn uche ro te ohwo ọvuọvo.

²⁵o vwo te unọke rerha, ayen da kanrọ mu agbagba.

²⁶Ayen de si obo re vwo muo phihọ enu rọye nẹ, OVIE RI JU.

²⁷Ayen da kanre igbulegbu ivẹ mu agbagba kugbe; ọvo hẹ obọrhe rọye, ọrivẹ hẹ obọhwẹre rọye.

²⁸Ebẹ ọfuanfon re siri da gba nẹ, e kere kugbe iruimwemwu.

²⁹Otu re wan vrẹn da vwọ jẹ ehwẹ, kpogho uyovwi rayen, nẹ Eghwo! wẹ rọ guọghọ uwevwi rẹ ẹga na ọ me bọn ẹdẹ erha na,

³⁰gbe sivwi oma wẹn, rere wo wotọ nẹ agbagba na rhe.

³¹Eriyin na rhe ilori rẹ irherẹn kugbe isiẹbe na je vwọ jẹ ehwẹ vwẹ ohri rẹ ayen ta nẹ, Osivwi ihwo efa; yo se sivwi oma rọye-e.

³²Gbe jẹn Kristi na, Ovie rẹ Izrẹl na, wotọ nẹ agbagba na rhe, rere avwanre mrẹ vwo segbuyota. Otu ra kanre mu agbagba kugbe na je vwọ jẹ ehwẹ.

³³Re unọke esan rhi vwo te, ebri de rhi mu vwẹ otọ na ejobi rhiri ri te unọke irhiri.

³⁴Rẹ unọke irhiri vwo te. Jesu de kperi urhuru gangan, Eloi, Eloi lama sabaktani? ra fan otọ rọye nẹ, Ọghẹnẹ mẹ, Ọghẹnẹ mẹ, Die jabọ wọ vwọ sen vwẹ?

³⁵Inughe ri mudia vwẹ etiyin, vwo nyo, ayen da ta, Nighe, o se Ilaija.

³⁶Ọvo da djẹ, ra reyọ ahworhẹ orisẹ duvwu phihọ viniga, o de dje phihọ ọghọrọgbọdọ, ọ da vwọ kẹ nẹ ọ da tanẹ, Mudia, e jẹn avwanre ni sẹ Ilaija ghine rhe rhe reyọ rhe otọ.

³⁷Jesu de kperi urhuru gangan o de phi ẹnwẹn họ.

³⁸Amwa ra vwọ tan uwevwi rẹ ẹga na da bẹre ẹbẹre ivẹ nẹ enu re duvwu otọ.

³⁹Ọke rẹ Sẹnturiọn, ro mudia hirhe aro kuo, vwọ mrẹ ro phi ẹnwẹn họ nure, ọ da ta, uyota ohwo nana ghine Ọmọ rẹ Ọghẹnẹ.

⁴⁰Eya evo herọ vwẹ usun rayen ri no vwẹ ugboko; Meri ri Magdala kugbe Meri oni ri Jems rẹ orere vẹ Josis, kugbe Saiomi.

⁴¹I ri nenire vwẹ ọke rọ vwọ hẹ obi Galili, ri gbe odibo kẹ; te eya efa buebu re vẹ ọye gbe yeri kpo Jerusalẹm.

⁴²Ọke rẹ ovwọnvwọn vwo te re, rọ vwọ dia ẹdẹ rẹ Ọmaẹcha, kọye hẹ ẹdẹ rọ wan nẹ kẹ ẹdidjala.

⁴³Josẹf ohwo rẹ Arimatia, ọdjaguare re mu ọghọ kẹ o ji rhẹro rẹ uvie rẹ Ọghẹnẹ na, da yan rhe vẹ aroeyivwo bru Pailet, ra yare orivwi ri Jesu.

⁴⁴Ọ de gbe Pailet unu se o ghine ghwu nure; o de se Sẹnturiọn na, ọ da nọ so ghine ghwu nure.

⁴⁵Rọ vwọ riẹn vwẹ obo ri Sẹnturion na nu, ọ da vwẹ orivwi na kẹ Josẹf.

⁴⁶Ọ da dẹ ukpoyibo ro vwo muo te otọ, ọ da vwẹ ukpoyibo na pharọ, o de muo phihọ ushi ra tọnre phihọ evun rẹ oragha o de ghorie oragha nyẹ unu rẹ ushi na.

⁴⁷Meri ri Magdala kugbe Meri oni ri Josis da mrẹ asan re shiro phihọ.