Read urhobo Mak 16 Bible Online

Mak 16 - urhobo bible

Mak 16

¹Ọke rẹ ẹdidjala vwọ wan nu, Meri ri Magdala, vẹ Meri oni ri Jems kugbe Saiomi, da dẹ erọvwọ ri gbo ọnrhe ororo, rere ayen ra vwẹ ayen ghworo.

²Irhiọke rhirhi vwẹ ẹdẹ rẹsosuọ rẹ ẹdidjala na ayen da yanran kpo obo ushi na rẹ ọnre vwọ varhe nu.

³Ayen ke ta kẹ ohwohwo, Kono ri che ghorie oragha na nẹ unu rẹ ushi na kẹ avwanre?

⁴Rẹ ayen vwo ni enu ayen da mrẹ oragha na re e ghorie no nure. kidie ọ rhoro gangan.

⁵Rẹ ayen vwọ ro evun rẹ ushi na, ayen da mrẹ emeghene ọvo ro tidia vwẹ obọrhe, o ku ewun ọfuanfọn phihọ; o de gbe ayen unu.

⁶Ọ da ta kẹ ayen, E jo gbe ovwan unu-u Jesu ri Nazarẹt, ra kanre mu agbagba na ovwan guọnọ. O vrẹnre ọ hẹ etinẹ-ẹ. ni asan re muro phihọ!

⁷Ẹkẹvuọvo wa yanran, ra ta kẹ idibo rọye kugbe Pita nẹ, Ọ karo kẹ ovwan kpo obi Galili re. oboyi ovwan da cha mrẹ, kirobo rọ ta kẹ ovwan jovwo.

⁸Ayen da yan phia ayen da djẹ nẹ asan ushi na; kidie uguegue ve igbevwunu mu ayen, ayen ta ota kẹ ohwo ọvuọvo-o; kidie oshọ mu ayen.

⁹Asakiephana ri Jesu vwo vrẹn vwẹ urhiọke rhirhi vwẹ ẹdẹ rẹsosuọ rẹ ẹdidjala na; ọ da ka vwẹ oma phia ke Meri ri Magdala rọ djẹ idẹbono ighwrẹ nu na.

¹⁰Ọ da yanran ra ta kẹ ayen otu re vẹ ọye gba dia vẹrhe, rẹ ayen vwo muomahọ je viẹ.

¹¹Ẹkẹvuọvo ọke rẹ ayen vwo nyo nẹ ọ jẹ hẹ akpọ nẹ ọye mrẹrẹ, ayen seregbuyota-a.

¹²Re ọna vwo wan nu. Ọ da vwẹ oma phia vwẹ oghẹre ọfa kẹ ivẹ vwẹ usun rẹ ayen rẹ ayen vwọ yan, kpo obo orho na.

¹³Ayen de rhivwi ra ta kẹ otu ri chekọ. dede na ayen ji segbuyota-a.

¹⁴Ukuko rọye ọ da vwẹ oma phia kẹ uhwọvo na rẹ ayen vwo tidia vwẹ udoemu; ọ da ghwọ ku ayen fiki ri jesegbuyota rayen kugbe udu ọgangan rayen, kidie ayen se otu re mrẹrẹ ro vwo vrẹn nu na gbuyota-a.

¹⁵Ọ da ta kẹ ayen, Ovwan yanran ro akpọ na ejobi, re ghwoghwo iyẹnrẹ esiri na ke ema na ejobi.

¹⁶Ohwo ro seregbuyota ọ da reyọ ame ọ cha rhọ; ẹkẹvuọvo ọ ro seregbuyota-a cha reabe.

¹⁷Eka nana ki nene otu ri segbuyota. ayen vwẹ odẹ mẹ djẹ idẹbono phia; ẹrenvwe ekpokpọ e cha vwọ ta ota;

¹⁸ayen mu eredekọ, ayen da da obi kobi dede, i che se ru ayen emu ọvo-o; ayen ghwẹ abọ kpahe otu re hovwan, oma rẹ ayen ki kpo.

¹⁹Eriyin rẹ Ọrovwori Jesu, vwọ ta ota kẹ ayen nu, a da reyọ kpenu kpo odjuvwu, o de tidia vwẹ obọrhe rẹ Ọghẹnẹ.

²⁰Ayen da yanran, re ghwoghwo ota na vwẹ asan ejobi, Ọrovwohwo de nene ayen ru iruo, ọ da vwẹ eka nene ota na re o vwo ruo gan. Isẹ.