Read urhobo Mak 2 Bible Online

Mak 2 - urhobo bible

Mak 2

¹Ẹdẹ evọ vwọ wan nu ọ da rhoma rhe Kẹpanọm, o de do nẹ ọ hẹ evun rẹ uwevwi.

²Otu buebu de rhi koko ọtiọye na asan gbe gba aye-en; kaka anurhoro dede; ọ da ta ota kẹ ayen.

³Ayen da ghwa ohwo ro ghwoma ọvo bro rhe ihwo ẹne re ghwarọ.

⁴Rẹ ayen gbi se sikẹrẹ-ẹ vwi fiki rẹ ihwo buebu na, ayen da kpare ebọn rẹ uwevwi na vwẹ asan rọ epha rẹ ayen vwo rhie nu, ayen da lọrọ eruẹ rẹ ọ ro ghwoma na shevwerhẹ rhe otọ.

⁵Ọke ri Jesu vwọ mrẹ esegbuyota rayen, ọ da ta kẹ ọ ro ghwoma na, Ọmọ mẹ, a vwẹ imwemwu wẹn ghovwo uwe.

⁶Ẹkẹvuọvo isiẹbe ẹvo ri tidia vwẹ etiyin, ra jẹ iroro vwẹ udu rayen,

⁷Die sorọ rẹ ọshare nana vwọ ta ota ọtiọye? Ọ ta ota rẹ ẹgha. Ono sa vwẹ imwemwu ghovwo jokpa rẹ Ọghẹnẹ ọvo?

⁸Ri Jesu ghwa vwọ riẹn vwẹ erhi rọye nẹ ayen jẹ iroro nana vwẹ udu rẹ ayen, Ọ da ta kẹ ayen nẹ, Die sorọ rẹ ovwan vwo roro emu nana vwẹ udu rẹ ovwan?

⁹Ọvo lọhọre, ra vwọ ta kẹ ọ ro ghwoma na nẹ, A vwẹ imwemwu wẹn ghovwo uwe; eyẹ, ra vwọ ta kẹ nẹ, Vrẹn, tọrọ eruẹ wẹn, rere wọ yan?

¹⁰Ẹkẹvuọvo rere ovwan vwọ riẹn nẹ Ọmọ rẹ ohwo vwo ogangan vwẹ akpọ na rọ vwẹ imwemwu ghovwo ọ da ta kẹ ọ ro ghwoma na nẹ —

¹¹Me ta kẹ wẹ, vrẹn, wọ tọrọ eruẹ wẹn, rere wo kpo uwevwi wẹn.

¹²O de ghwe vrẹn, siẹvuọvo na ọ da tọrọ eruẹ na, ọ da yanran vwẹ irharo rẹ ayen na ejobi; ọtiọye na o de gbe ayen ejobi unu, ayen de jiri Ọghẹnẹ, nẹ, Avwanre jẹ mrẹ oghẹre tiọna dẹvo-o.

¹³Ọ da rhoma yan vwẹ orhoma rẹ abadi na urogho na ejobi da ghwiẹ bro ra, o de yono ayen.

¹⁴Rọ vwọ wan vrẹn ọ da mrẹ Livae rẹ ọmọ rẹ Aifiọs ro tidia vwẹ asan re de toro arhọghọ, ọ da ta kẹ, Nene uvwe. O vrẹnre o de nene.

¹⁵Ro vwo tidia udoemu vwẹ uwevwi rọye itoro arhọghọ kugbe iruimwemwu buebu de nene vẹ idibo rọye tidia. kidie ayen buebu ri nenire.

¹⁶Isiẹbe ri Farisi na, ọke rẹ ayen vwọ mrẹ rọ vẹ iruimwemwu kugbe itoro arhọghọ vwo ria emu, ayen da ta kẹ idibo rọye, Die o vẹ itoro arhọghọ kugbe iruimwemwu vwọ ria emu?

¹⁷Ri Jesu vwo nyo, ọ da ta kẹ ayen, otu rẹ oma rẹ ayen ganre, guọnọ ọbo-o, jokpa rẹ otu rẹ oma da. mi rhi se evwata-a, jokpa rẹ iruimwemwu.

¹⁸Idibo ri Jọn kugbe e re Farisi ki chirẹ owẹvwe; ayen da rhe nọ, Die jabọ rẹ idibo ri Jọn vẹ e re Farisi vwo chirẹ owẹvwe yẹ idibo wẹn gbi chirẹ owẹvwe-e?

¹⁹Jesu da ta kẹ ayen, Kẹ ikọpha se chirẹ owẹvwe rẹ ọshare rẹ ọpha vẹ ayen da herọ? rẹ ayen vẹ ọshare rẹ ọpha vwọ herọ na, ayen gbi se chirẹ owẹvwe-e.

²⁰Ẹkẹvuọvo ẹdẹ cha vwẹ obọ, ra vwọ reyọ ọshare rẹ ọpha nẹ obọ rẹ ayen, kẹsiẹye ayen ki che chirẹ owẹvwe vwẹ ẹdẹ yena.

²¹Ohwo se ko ẹbẹre rẹ amwa ọkpokpọ phihọ ewun rẹ awanre-e, ọ da dia ọtiọye ọkpokpọ na ko si ọ rẹ awanre na bẹre uphrophro na ko miovwi phihọ.

²²Ohwo se ku wain ọkpokpọ phihọ ephiẹn rẹ awanree; ọ da dia ọtiọye wain ọkpokpọ na kọ bẹre ephiẹn na, wain na ko hwẹ, ephiẹn na ke bẹre; ẹkẹvuọvo e ku wain ọkpokpọ phihọ ephiẹn ekpokpọ.

²³Vwẹ ẹdidjala ọvo kọ wan ugbeka vrẹn, rẹ ayen vwọ wanvrẹn na idibo rọye ke kọrọ eka eboban na.

²⁴Farisi na da ta kẹ, Nughe, die idibo wẹn vwo ruẹ obo ri jefo vwẹ ẹdidjala na?

²⁵Ọ da ta kẹ ayen, Ovwan ji se obo ri Devid ruru-u, rẹ ọke rẹ emu vwọ kanrọ rẹ owẹvwe vwo hwe, te ọye vẹ otu re vẹ ọye gba herọ;

²⁶obo rọ vwọ ro uwevwi rẹ Ọghẹnẹ vwẹ ọke rẹ Abiata vwọ hẹ orherẹn rode rọ vwọ re ikara re vwo ze izobo rẹ ohwo ọfa ria-a jokpa rẹ orherẹn ọvo, rọ da je vwọ kẹ otu re vẹ ọye gba herọ?

²⁷Ọ da ta kẹ ayen, A ma ẹdidjala fiki rẹ ohwo, a ma ohwo fiki rẹ edidjala-a.

²⁸Ọtiọye na Ọmọ rẹ ohwo hẹ olori rẹ ẹdidjala ji rhe.