Read urhobo Mak 3 Bible Online

Mak 3 - urhobo bible

Mak 3

¹Ọ da rhoma ro sinagọg, ohwo ọvo rẹ obọ rọye ghwuru hẹ etiyin.

²Ayen kẹ rhẹrẹ, sẹ o sivwo vwẹ ẹdidjala na, rere ayen vwọ mrẹ asan vwo gbeje.

³Ọ da ta kẹ ohwo rẹ obọ rọye ghwuru na, Vrẹn mudia vwẹ uherevie.

⁴Ọ da ta kẹ ayen, o fori re ru emu esiri vwẹ ẹdidjala, gbenẹ ọ ro mioma? Re vwo sivwi rhọ gbenẹ re vwo hwe? Ẹkẹvuọvo ayen de fotovwi.

⁵Ọke rọ vwọ vwẹ ophu ni ayen yariẹ ivun de miovwo fiki rẹ udu ọgangan rayen, ọ da ta kẹ ọshare na, Riẹn obọ wẹn. Ọ da riẹn obọ rọye obọ rọye de shehọ kerẹ ọ ro chekọ na.

⁶Siẹvuọvo na otu ri Farisi vẹ Herodian da ghwa yanran ra gba ẹguare obo rẹ ayen ru vwo hwe.

⁷Jesu kugbe idibo rọye de si oma reyọ nẹ etiyin kpo obo abadi otu buebu ri nẹ Galili rhe de nene: i ri ji nẹ Judia rhe;

⁸nẹ Jerusalẹm rhe nẹ Idumia rhe, ji nẹ esamuo ri Jọdan, vẹ oma ri Taya vẹ Saidọn urogho rode ri vwo nyo emu ro ruru i de bro rhe.

⁹Ọ da ta kẹ idibo rọye nẹ, e jẹn omokọ otete vwọ kẹ ọye vwi fiki rẹ otu buebu na, ayen de rhe keke.

¹⁰Kidie o sivwi ihwo buebu ọtiọye na otu ri vwo emiavwe ejobi ki keke re ayen mrẹ asan vwẹ obọ te.

¹¹Ọke rẹ irhi ri jẹfuọn vwọ mrẹ ayen de she vwọ hẹ obaro rọye kperi ta nẹ, wọwẹ hẹ ọmọ rẹ Ọghẹnẹ na.

¹²O da phẹphẹ ayen unu nẹ ayen tue ọye phia-a.

¹³O de yeri kpo enu rẹ ugbenu o de se otu rọ guọnọre; ayen de bro ra.

¹⁴Ọ da vwẹ ihwivẹ mu, rere ayen vẹ ọye dia, rere o vwo ji ayen re ghwoghwo ota na,

¹⁵rere ayen vwo vwo ogangan vwọ djẹ idẹbono phia;

¹⁶ihwivẹ na kẹ ẹna Saimọn ro seri Pita;

¹⁷Kugbe Jems ọmọ ri Zẹbidi, vẹ Jọn oniọvo ri Jems ọ de se ayen Boanajis otọ rọye, Emọ rẹ agbraran;

¹⁸kugbe Andru, kugbe Filip, kugbe Batalomiu, kugbe Matiu, kugbe Tọmọs, kugbe Jems ọmọ rẹ Aifiọs, kugbe Tadiọs, kugbe Saimọn ohwo ri Kenan,

¹⁹kugbe Judas Iskariọt, rọ shẹrẹ na. Ọ de kpo uwevwi;

²⁰Otu buebu na da rhoma bro rhe ọtiọye na ayen gbe mrẹ asan da re emu-u.

²¹Ọke rẹ igbeyan rọye vwo nyo, ayen da yanran re shabọ phihọ; kidie ayen tare nẹ, ọ gbe riẹn oma rọye-e.

²²Isiẹbe ri nẹ Jerusalẹm rhe da ta nẹ, o vwo Bẹlzibọb, kugbe ogagan rẹ ọmọ rẹ ovie rẹ idẹbono ọ vwọ djẹ idẹbono phia na.

²³o de se ayen bro rhe, ọ da ta kẹ ayen vwẹ itẹ, Mavọ idẹbono sa vwo djẹ idẹbono phia?

²⁴Ọ da dianẹ Uvie da ghare omaobọ rọye, uvie yena se mudia-a.

²⁵Uwevwi da ghare omaobọ rọye uwevwi yena se mudia-a.

²⁶Idẹbono de vrẹn họnrẹ omaobọ rọye ọ da ghare yẹ o vwo oba.

²⁷Ohwo sa ro uwevwi rẹ ọgba ro de miovwo uwevwi rọye-e jokpa nẹ ọ ka gba ọgba na tavwe; kẹsiẹye o ki miovwo uwevwi rọye.

²⁸Uyota Me ta kẹ ovwan, A vwẹ imwemwu ejobi ghovwo emọ rẹ ihwo kugbe ota rẹ ophọphọvwe rẹ ayen tare ejobi.

²⁹Ẹkẹvuọvo kohwo kohwo rọ ta ota rẹ ophọphọvwe kpahe Erhi Ọfuanfon vwo evwoghovwo bẹdẹ-ẹ, ẹkẹvuọvo ayen reabe rẹ imwemwu ri bẹdẹ;

³⁰Kidie ayen tare, O vwo erhi ro jẹfuọn.

³¹Kọye oni rọye kugbe iniọvo rọye da rhe; rẹ ayen vwo mudia otafe, ayen de ji ikọn re se.

³²Otu buebu tidia yariẹ phihọ; ayen da ta kẹ, Oni wẹn kugbe iniọvo wẹn mudia vwẹ obo otafe re guọnọ owẹ.

³³Ọ da kpahe kẹ ayen nẹ, Ono hẹ oni mẹ kugbe iniọvo mẹ?

³⁴Ro vwo ni ayen ri tidia yariẹ phihọ, ọ da ta, Oni mẹ kugbe iniọvo mẹ ena!

³⁵Kohwo kohwo ro ru ọhọre rẹ Ọghẹnẹ ọye oniọvo mẹ rẹ ọshare kugbe ọ rẹ aye, kugbe oni mẹ.