Read urhobo Mak 4 Bible Online

Mak 4 - urhobo bible

Mak 4

¹Kọ rhoma yono vwẹ orhoma rẹ abadi, ihwo buebu gangan de koko bro rhe, ọtiọye re ọ da ro evun rẹ okọ, o de tidia etiyin; yẹ ihwo na ejobi hẹ otọ vwẹ orhoma rẹ abadi.

²Ọ de yono ayen emu buebu vwẹ itẹ, ọ da ta kẹ ayen vwẹ evun rẹ eyono rọye.

³Wa kerhọn Nighe, ọkekankọn ọvo yanran ra kọn;

⁴rọ vwọ kọn ekankọn re, ẹvo de she phihọ orhoma rẹ idjerhe, ephran da rhe e da sohrọ ayen re.

⁵Ẹvo de she phihọ otọ rẹ elalọ, asan ro vwo ekpẹn buebu-u; siẹvuọvo ọ da djẹ phia, kidie o vwo ekpẹn kokodo-o;

⁶ẹkẹvuọvo ọke re ọnre vwọ varhẹ, o de vwioro; kidie o vwo owọ-ọ; ọ da ya.

⁷Ẹvo de she phihọ ohri rẹ inwe, rẹ inwe na vwọ rho i de keke ayen, e gbe mọ emamọ-ọ.

⁸Efa de she phihọ otọ rẹ esiri, e da djẹ phia, ẹ da mọ, ẹvo ọgban, ẹvo ujorha, ẹvo ujori.

⁹Ọ da ta kẹ ayen, o ro vwo erhọn ro vwo nyo, e jo nyo.

¹⁰Ọke rẹ ọye ọvo vwo chekọ otu re yarierẹ họ kugbe ihwivẹ na da nọ otọ rẹ itẹ na.

¹¹Ọ da ta kẹ ayen, ovwan a vwẹ rọ kẹ rere e vwọ riẹn imu re djahere vwẹ uvie rẹ Ọghẹnẹ na; ẹkẹvuọvo otu re hẹ obo otafe itẹ kọye e vwo kpe kẹ ayen,

¹²re emrẹ ayen mrẹ yẹ ayen se vughe-e, enyo ayen nyo, yẹ ayen sa riẹn otọ rọye-e; ayen de rhe kurhẹriẹ e de rhe vwo ghovwo ayen.

¹³Ọ da ta kẹ ayen, ovwan riẹn otọ re itẹ nana-a? Kẹ mavọ ovwan se ru riẹn itẹ na ejobi?

¹⁴Ọkẹkankọn kọn ota na.

¹⁵Ena e re hẹ orhoma rẹ idjerhe asan ra kọn ota na phihọ; ọke re ayen vwo nyo, Idẹbono da ghwa rhe, ọ da reyọ ota ra kọn phihọ udu rẹ ayen na no.

¹⁶Ena re je họhọ e ra kọn phihọ otọ rẹ elalọ, ayen, ọke rẹ ayen vwo nyo ota na nu, ayen da ghwa vwẹ aghọghọ reyọ;

¹⁷yẹ o vwo owọ kẹ omaobọ rọye-e, ẹkẹvuọvo rẹ ayen vwọ dia emerha; ukuko rọye re, re ukpokpogho eyẹ imu vwọ rhe vwi fiki rẹ ota na, ayen de ghwe she.

¹⁸Efa ra kọn phihọ ohri rẹ inwe ena otu ri nyo ota na,

¹⁹Rẹ ẹnwan rẹ akpọ, kugbe ophiẹvwe rẹ efe, vẹ urhuru sivwe rẹ emuefa rhe vwọ ruọ, rhi keke ota na, ọ gbe rha mọ emamọ-ọ.

²⁰Ena e ra kọn phihọ otọ esiri na i ri nyo ota na, ayen da reyọ, ọ da mọ emamọ, ẹvo ọgban ẹvo ujorha, ẹvo ujori.

²¹Ọ da ta kẹ ayen, A vwẹ urhukpẹ rhu rere e phio phihọ otọ rẹ ikuru, eyẹ otọ rẹ ehwa, ọ gbe dia enu rẹ ogburhukpẹ?

²²Kidie o vwo obo re sinu, ro jẹphia-a, ọtiọye na emu kemu re ru djahe ro je phia vwẹ uphẹphẹ herọ-ọ,

²³Kohwo Kohwo ro vwo erhọn ro vwo nyo e jo nyo.

²⁴Ọ da ta kẹ ayen, kẹnoma rẹ obo ru we nyo; ovwanvwọn rẹ ovwan vwọ vwanvwe ọye a je vwọ vwanvwe kẹ ovwan rhe. a jẹ vwọ kpahọ kẹ ovwan.

²⁵Kidie ọ ro vwori ọye a je vwọ kẹ, o ro vwori-i, omobo ro rhere ka je karhiẹ mie.

²⁶Ọ da ta, Eriyin uvie rẹ Ọghẹnẹ epha, kerẹsiẹ rẹ ohwo a da hahe emamọ phihọ otọ;

²⁷o mi shevwerhẹ o mi vrẹn te ason te uvo, emamọ na me djẹ phia e Me rho kpenu ọ gbe riẹn obo re epha-a.

²⁸Otọ na Me mọ emamọ rẹ obọ rọye ẹsosuọ uvwere, kẹsiẹye o ki te ẹbe, ukuko rọye uvi rẹ ọka kọ phia vwe enu rẹ ẹbe na.

²⁹Ẹkẹvuọvo rẹ emamọ na da ghwo nu, koọ vwẹ oda cha kidie ọke rẹ evuo tere.

³⁰Ọ da ta kidie e vwo dje uvie rẹ Ọghẹnẹ eyẹrẹ didi itẹ e vwo kpe?

³¹Ọ họhọ ubi rẹ uyerhie ọke ra vwọ kọn phihọ otọ; ọ havwe nọ emamọ na ejobi ra kọn hẹ otọ na,

³²ẹkẹvuọvo ra vwọ kọn nu, o de gro kpenu, ọ da rhoma rho nọ ẹbe ejobi, ọ da tan eghọn ride, eriyin re ephran rẹ obenu da rhe dia otọ rẹ uhoho rọye.

³³Kugbe oghẹre rẹ itẹ ẹtiẹye buebu ọ vwọ ta ota na kẹ ayen tiobo rẹ ayen se nyo;

³⁴Ọ gbe dia ite-e ọ ta ota kẹ aye-en; o de rhie imu na ejobi phẹphẹ kẹ idibo rọye vwẹ odjahọ.

³⁵Vwẹ ẹdẹ yena, rẹ ovwọnvwọn vwo te, ọ da ta kẹ ayen, E jẹn e bi kpo obo esamuo.

³⁶Rọ vwọ yan jẹ ukoko re ihwo na vwo nu, ayen da reyọ, kirobo rọ epha phihọ evun rẹ oko. Ekpo efa vẹ ọye je herọ.

³⁷Aphopho rode na de dju, ọgbogho de rhi mu ame ro evun rẹ okọ, ọtiọye na okọ na da rhe vọn.

³⁸Yẹn ọ vwerhẹ vwẹ enu rẹ ọchuyovwi vwẹ obo eghuvwu rẹ okọ, ayen da rhọvwọ, ta kẹ nẹ, Oyono, wọ rha kerhọn nẹ avwanre ghwẹ?

³⁹O de vrẹn ọ da van ku aphopho na, ọ da ta kẹ abadi na, Fọ, wọ dia riei Aphopho na da fọ, ẹfọ ri riei rode da rhe.

⁴⁰Ọ da ta kẹ ayen, Die jabọ oshọ vwo mu ovwan? ovwan ji vwo esegbuyota-a?

⁴¹Oshọ de mu ayen gangan, ayen da ta ke omoma rẹ ayen, Ọna didi ohwo rẹ aphopho kugbe urhie nyo ota rọye?