Read urhobo Mak 5 Bible Online

Mak 5 - urhobo bible

Mak 5

¹Ayen da rhe esamuo rẹ abadi na, re te orho ri Gẹrasene.

²Ọke ro vwo nẹ evun rẹ okọ na rhe, ohwo ro vwo erhi ro jẹfuọn rọ dia evun rẹ ishi da rhe vwa,

³Ọ rọ dia ohri rẹ ishi na; ohwo rọ sa vwẹ ọjọnrọn gba hẹrọ-ọ;

⁴Kidie kẹsiẹ kẹsiẹ a vwọ vwẹ igoni vẹ ẹjọnrọn kanrọ, o mi vwirhi igoni na, ọ me sanvwe ẹjọnrọn na ibribro o vwo ohwo ọvuọvo ro se muo gba-a.

⁵Kọke kọke, te ason te uvo, ọ vwọ dia enu rẹ igbenu ride, kugbe evun rẹ ishi, o mi kperi, ọ mẹ vwẹ ẹlalọ bru oma.

⁶Ọke rọ vwọ mrẹ Jesu vwẹ ogboko, ọ da djẹ ra ga;

⁷ro vwo kperi urhuru gangan, ọ da ta, Die wọ vwẹ ovwẹ ru Jesu, Ọmọ rẹ Ọghẹnẹ ro me Kpenu? Me vwẹ Ọghẹnẹ rẹ wẹ, wọ lagha ovwẹ-ẹ.

⁸Kidiẹ ọ ta kẹ, Wan nẹ oma re ohwo na, wẹ erhi ro jẹfuọn.

⁹Jesu da nọ, Odẹ wẹn rhọ? Ọ da kpahe, Odẹ mẹ Lijọn: kidie avwanre pha buebu.

¹⁰Ọ da rẹ gangan nẹ ọ djẹ ayen nẹ evun rẹ orho na-a.

¹¹Asakiephana otuisi ẹvo herọ ria vwẹ vwẹ orhoma rẹ ugbenu na.

¹²Ayen da rẹ, Djẹ avwanre ro evun rẹ isi na rere avwanre ro evun rẹ ayen.

¹³Ọ da rhọvwe kẹ ayen. Irhi ri jẹfnọn na de no, ra ro evun rẹ otuisi na; otuisi ri bu te uriori ivẹ da djẹ nene ọghwrọrọ na ra ro evun rẹ abadi ayen de re divwi ghwu vwẹ evun rẹ abadi na.

¹⁴Ihwo re ghẹrẹ ayen da djẹ ra ta vwẹ obo orere na kugbe orho na. Ihwo da rhe mrẹ obo ri ruru na.

¹⁵Ayen de bru Jesu rhe, ayen da mrẹ ohwo ro vwo irhi rẹ idẹbono na kugbe Lijọn na ro tidia, o ku ewun phihọ ẹro rọye te otọ oshọ de mu ayen.

¹⁶Ayen ihwo re mrẹ emu na da ta kẹ ayen obo rẹ phia kẹ ọ ro vwo irhi rẹ idẹbono na, kugbe isi na.

¹⁷Ayen de muhọ ẹrẹ nẹ o nẹ ubrotọ rayen.

¹⁸Rọ vwọ ruẹ evun rẹ okọ na, ọ ro vwo irhi rẹ idẹbono na da rẹ ne ọye nene dia.

¹⁹Ẹkẹvuọvo ọ da sen, ọ da ta kẹ, Kpo uwevwi wẹn bru igbeyan wẹn, ra ta kẹ ayen emu rode rẹ Ọrovwohwo ru kẹ wẹ na, vẹ obo ro ni arodọvwẹ wẹ.

²⁰Ọ da yanran, o de re gbe ikun ride ri Jesu ru kẹ vwẹ obi Dikapolis, i de gbe ihwo ejobi unu.

²¹Ọke ri Jesu vwọ rhoma vwẹ okọ samu kpọ abọ rivẹ, otu buebu de si koko riariẹ yọ hẹ orhoma rẹ abadi na.

²²Eriyin ọvo vwẹ isun ri sinagọg na de bro rhe odẹ rọye Jairọs, rọ vwọ mrẹ, o de she diguẹ vwẹ otọ rẹ awọ rọye,

²³Ọ da rẹ gangan, nẹ, Ọmotẹ mẹ rẹ otete herọ muegbe rẹ ughwu. mẹ rẹ wẹ, re wọ yanrhe re ghwẹ obo kpahọ, re wo sivwo, rọ rhọ.

²⁴O de nene ra. Otu buebu de nene ayen ki keke.

²⁵Aye ọvo rọ diare ẹgbukpe ihwivẹ re,

²⁶rọ re oja buebu vwẹ abọ rẹ cho, ọ da ghwọrọ emu ro vwori ejobi yẹ oma rọye kpori-i, ẹkẹvuọvo kẹsiẹyẹ ọ kẹ rhoma miovwi phihọ.

²⁷ro vwo nyo usi ri Jesu, ọ da yan rhe obuko rẹ otu na, ọ da vwẹ obọ te ewun rọye.

²⁸Kidie ọ tare nẹ, Mẹ da sa vwẹ obọ te ewun rọye oma mẹ na kpo.

²⁹Siẹvuọvo na afe ro hwẹ na da ghwa ka; ọ da riẹn vwẹ oma rọye nẹ, esivwi ọye nẹ emiavwe rọye re.

³⁰Jesu ghwa vwọ riẹn nẹ ogangan nẹ ọye oma yanran, o de knoma rhẹriẹ vwẹ evun rẹ otu na ta nẹ, Ono vwẹ obọ te iwun mẹ?

³¹Idibo rọye da ta kẹ nẹ. Wọ mrẹ otu ri keke uwe na, mavọ wọ vwọ ta nẹ, Ono vwẹ obọ te vwe?

³²O de ni yariẹ sẹ ọ sa mrẹ ohwo ro ru emu na.

³³Ẹkẹvuọvo aye na, vwọ riẹn obo re ru kẹ, ọ da rhe ọ phariẹ vẹ oshọ, rhi diguẹ vwẹ obaro rọye ọ da ta uyota na ejobi kẹ.

³⁴Ọ da ta kẹ, Ọmọtẹ esegbuyota wẹn sivwi uwe, yanran vwẹ ufuoma, e sivwi uwe nẹ emiavwe wẹn re.

³⁵Ọke rọ jẹ vwọ ta ota na, ihwo ẹvo de nẹ uwevwi rẹ osun ri sinagọg na rhe, Ọmọtẹ wẹn ghwu nure kidie wo rhe vwo kpokpo Oyono ọfa?

³⁶Kọye ri Jesu vwo nyo ota ra tare na, ọ da ta kẹ osun ri sinagọg na, Wọ djẹ oshọ-ọ, takpi segbnyota.

³⁷Ọ rhọvwe nẹ ohwo ọvuọvo nene ọye-e, jokpa ri Pita, kugbe Jems vẹ Jọn rẹ oniọvo ri Jems.

³⁸Ayen da rhe uwevwi rẹ osun ri sinagọg na. ọ da mrẹ edo, vẹ otu re viẹ kpere urhuru rẹ oviẹ gangan.

³⁹Ọke rọ vwọ ro uwevwi, ọ da ta kẹ ayen Die ovwan vwo do, vwọ viẹ? Ọmọtẹ na ghwuru-u, ẹkẹvuọvo ọ vwerhẹ.

⁴⁰Ayen da hwẹ te oviẹ. Ẹkẹvuọvo rọ vwọ djẹ ayen ejobi ro uphẹphẹ, ọ da reyọ ọsẹ kugbe oni re ọmọtẹ na, kugbe otu re vẹ ọye gba herọ, ọ da ro asan rẹ ọmọtẹ na epha.

⁴¹Ọ da yọnrọn ọmọtẹ na obọ, ọ da ta kẹ Talita kumi; otọ rọye, Ọmọtẹ, me ta kẹ owẹ, vrẹn.

⁴²Ọmọtẹ na de ghwe vrẹn, ọ da yan; kidie ọmọtẹ na ọmọ rẹ ẹgbukpe ihwivẹ. O de gbe ayen unu gangan.

⁴³O de jiji kẹ ayen, ovwan jẹ ohwo ọvuọvo riẹn ọnana-a. ọ da ta nẹ ayen vwẹ emu kẹ ọmọtẹ na rere ọ re.