Read urhobo Mak 6 Bible Online

Mak 6 - urhobo bible

Mak 6

¹Ọ vwọ yan nẹ etiyin ọ da rhe orho rẹ obọ rọye; idibo rọye de nene.

²Ro rhi vwo te ẹdidjala re, o de muhọ eyono vwẹ evun ri sinagọg: otu buebu ri nyoro o de gbe ayen unu, ta nẹ; Bovọ ohwo nana de vwo enana ejobi? Didi iruo egangan a vwọ kẹ ohwo nana,

³Ọna dia ọ wẹna na-a, ọmọ ri Meri; oniọvo ri Jems, kugbe Josis, kugbe Juda, vẹ Saimọn, rẹ iniọvo rọye rẹ emetẹ vẹ avwanre gba herọ na? Ophu de mu ayen vwi fiki rọye.

⁴Jesu da ta kẹ ayen, Ọmraro vwo ọghọ vwẹ orho rẹ obọ rọye-e kugbe vwẹ ohri rẹ evwruwevwi rọye-e.

⁵O gbi se ru iruo ẹgangan vwẹ etiyi-in, jokpa rẹ obọ rọ ghwẹ kpahe uche ihwo re hovwan ọvo, o de sivwi ayen.

⁶Jesegbuyota rayẹn de gbe unu. Ọ da yan vwẹ ighwre na ejobi lll.yariẹ re yono.

⁷O de se ihwivẹ na bro rhe o de mu ayen họ ejo yanran ivivẹ; ọ da vwẹ ogangan kẹ ayen vwẹ enu rẹ irhi ri jẹfuọn;

⁸o de jiji kẹ ayen nẹ ayen ghwa emuọvo kpo oyan rayen na-a, jokpa rẹ ọkpọ ọvo ayen ghwa ikara-a eyẹ ẹkpo, eyẹ igho vwẹ evun rẹ ekpoo;

⁹ẹkẹvuọvo ayen ku isahato phihọ; ovwan kuẹ iwun ivẹ phihọ-ọ.

¹⁰Ọ da ta kẹ ayen, kasan kasan re ovwan da ro evun rẹ uwevwi, ovwan Me dia etiyin bẹsiẹ rẹ ovwan vwo no.

¹¹Kasan kasan rọ reyọ ovwa-an, re ayen gbi nyo ọ rẹ ovwa-an, ọke rẹ ovwan de nẹ etiyin na, ovwan mi phorho ekpẹn rẹ awọ rẹ ovwan phihọ otọ rere ọ dia iseri kẹ ayen.

¹²Ayen da yanran, re ghwoghwo ota na rere ihwo vwo kurhẹriẹ;

¹³Ayen da djẹ idẹbono buebu phia, ayen da vwẹ ori ghworo otu buebu re hovwan e de sivwi ayen.

¹⁴Ovie Herọd de nyo; kidie odẹ ri Jesu kperi usi yariẹ. Evo da ta, Jọn ri Baptist vrẹn nẹ ughwu, kọye iruo egangan nana vwọ vwo phia vwẹ oma rọye.

¹⁵Ẹvọ da rha ta, Ilaija o ruẹ, Efa da ta, Ọ họhọ ọmraro ọvo rẹ awanre.

¹⁶Ẹkẹvuọvo ọke ri Herọd vwo nyo, ọ da ta, Jọn ri mi bru uyovwi nu na, ọye rhoma vrẹn nẹ ughwu na.

¹⁷Kidie Herọd ji ikọn re mu Jọn, ọ da gba phihọ uwodi fiki ri Hẹrọdias aye ri Filip oniọvo rọye fikiridie ọ vwọ rọvwọ;

¹⁸Kidie Jọn ta kẹ Herọd nẹ, O fori rere ọ wọ reyọ aye re oniọvo rọye-e.

¹⁹Hẹrodias de phi ihuhn rọye phihọ evun o da guọnọ obo ro vwo hwe, o gbi se ruo-o;

²⁰Kidie Herọd djẹ oshọ ri Jọn ọ riẹnre nẹ ọvwata kugbe ohwo rọ fonro o ruẹ, ọ da sẹro rọye egberhẹnẹdẹ. Ọkẹ ro vwo nyo, ọ da dia gedegede; dede na o de nyo ota rọye vẹ aghọghọ.

²¹Rẹ uphẹ rhe vwọ dia ẹduvwiẹ rẹ Herọd rhi vwo te o de chere emu kẹ ehọnvwọnre rọye kugbe inotu rẹ ofovwi vẹ ihwo ride ri Galili;

²²Ọke rẹ ọmọtẹ ri Hẹrọdias vwọ rhe ro vwo gbe eha, o de jẹ Herọd kugbe otu re vẹ ọye gbe tidia vwẹ udoemu; ovie na da ta kẹ ọmọtẹ na, Nọ emu kemu ro wọ guọnọre, me vwọ kẹ wẹ.

²³O de ve kẹ nẹ, Emu kemu wọ nọ vwẹ obọ mẹ, Me vwọ kẹ wẹ, ọ da tobọ dia abọvo rẹ uvie mẹ na.

²⁴O de kpo ra ta kẹ oni rọye, kidie me nọ? Ọ da ta kẹ, Uyovwi ri Jọn ri Baptist.

²⁵Ọ de ghwe bru ovie na rhe kpata kpata, tanẹ, Mẹ, guọnọre ne wọ kẹ vwẹ uyovwi ri Jọn ri Baptist vwẹ evun rẹ ọsete.

²⁶Ọ da da ovie na gangan; ẹkẹvuọvo vwi fiki rẹ ive rọye, kugbe otu re vẹ ọye gbe tidia vwẹ udoemu na, ọ gbe sa siọn kẹ-ẹ.

²⁷Ovie na de ghwe ji isodje rọ hẹrhẹ ọ da ta kẹ nẹ ọ ra reyọ uyovwi rọye rhe; ọ da yanran re bru uyovwi ri Jọn vwẹ uwodi,

²⁸ọ da reyọ phihọ evun rẹ ọsete vwo rhe, ọ da reyọ vwọ kẹ ọmọtẹ na; ọmọtẹ na da reyọ vwọ kẹ oni rọye.

²⁹Ọke rẹ idibo rọye vwo nyo, ayen da rhe rhi mu orivwi rọye ayen de re sho phihọ evun rẹ ushi.

³⁰Ikọn na de rhivwi rhe ayen de gbe ikun rẹ obo rẹ ayen ruru kugbe obo rẹ ayen yonori ejobi kẹ.

³¹Ọ da ta kẹ ayen, ovwan, ekpuyovwi rẹ ovwan yanrhe rere e kpo asan ofuefu, re rovwoma emerha. Kidie otu buebu herọ yan cha yan kpo, ayen gbe mrẹ ọke vwọ re emu-u.

³²Ayen da ro okọ bi kpo asan ọvo rọ djahere.

³³Ihwo da mrẹ ayen rẹ ayen vwọ yanran, otu buebu de vughe ayen, ayen da vwẹ owọ djẹ wan otọ nẹ orho na ejobi rhe ayen da karo rẹ ayen te etiyin.

³⁴Ri Jesu vwo wotọ rhe ọ da mrẹ otu buebu na, aro rẹ ayen da dọn, fikirdie ayen ke họhọ igegede ri vwo ohwo ro suẹn aye-en; o de yono ayen emu buebu.

³⁵Rẹ ọke vwo kpo yanran re, idibo rọye de bro rhe, ayen da ta, Ọnana asan ofuefu yẹ ọke na kpo yanran re;

³⁶ji ihwo na kpo rere ayen kpo orho vẹ ighwre re yariẹ ayen phihọ na re ayen ra dẹ emu re.

³⁷Ẹkẹvuọvo ọ da kpahe ọ da ta kẹ ayen, ovwan vwe emu kẹ ayen re. Ayen da ta kẹ, kẹ avwanre yanran ra dẹ ikara re ikọba uri vwọ kẹ ayen re?

³⁸Ọ da ta kẹ ayen, Bro ikara ovwan vwori? Ovwan yanran re no. Ayen vwọ riẹn re ayen da ta nẹ, Iyori, kugbe imiyeri ivẹ.

³⁹Ọ da ta kẹ ayen ejobi nẹ ihwo na ejobi tidia otuotu vwẹ enu rẹ odi ekpokpọ na.

⁴⁰Ayen de tidia ẹkuẹko, ẹvo ujori ẹvo ujuvẹ gbẹ ihwe.

⁴¹Rọ vwọ reyọ ikara iyori na kugbe imiyeri ivẹ na re o de ni enu, ọ da kpẹvwẹ o de bru ikara na; vwọ kẹ idibo rọye re ayen ghare kẹ ayen; ọ da je ghare imiyeri ivẹ na kẹ ayen ejobi.

⁴²Ayen ejobi da re, evun da vọn ayen.

⁴³Ayen da sanọ ivwuvwu rẹ ikara na kugbe imiyeri rẹ ayen re chekọ na vọn ibere ihwivẹ.

⁴⁴Ayen otu re re ikara na ihwo uriori iyori.

⁴⁵Siẹvuọvo na ọ da ta kẹ idibo na nẹ ayen ro okọ re ayen bi karo kẹ kpọ esamuo rivẹ ri Bẹtsaida, re ekpuyovwi rọye ọvo ji otu na kpo.

⁴⁶Ọke ro vwo jẹ ayen vwo nu, ọ da yan kpo enu rẹ ugbenu ra nẹ ẹrhovwo.

⁴⁷Ọke rẹ ovwọnvwọn vwo te, yẹ okọ na hẹ uherevie rẹ abadi re ọye ọvo kọye hẹ otọ.

⁴⁸Ọ da mrẹ ayen re Lagha oma rẹ ebio, kidie aphopho rhan ayen, ro vwo te ẹrhẹrẹ rẹne vwẹ ason o de bru ayen rhe, yẹ ọ yan vwẹ enu rẹ abadi na kẹ emerha rọ vwọ yan vrẹn ayen;

⁴⁹ẹkẹvuọvo rẹ ayen vwọ mrẹ rọ vwọ yan vwẹ enu rẹ abadi na, ayen de vwo roro erhi ayen de kperi;

⁵⁰kidie ayen ejobi mrẹrẹ oshọ de mu ayen. Siẹvuọvo na ọ de nene ayen ta ota, ọ da ta kẹ ayen, We jẹn udu rẹ ovwan gan, mẹvwẹ ovwan djẹ oshọ-ọ.

⁵¹Ọ da ro evun rẹ okọ na bru ayen rhe aphopho na de fu; o de gbe ayen unu gangan,

⁵²Kidie ayen riẹn otọ rẹ igbunu rẹ ikara na-a, kidie udu rayen epha gangan.

⁵³Ọke re ayen vwọ samu nu, ayen de rhi te otọ ri Gẹnẹsarẹt, ayen de churu oko na si otọ.

⁵⁴Rẹ ayen vwo hẹ okọ na re, siẹvuọvo na ihwo de ghwe vugbe.

⁵⁵Ayen da djẹ yariẹ ubrotọ na ayen de mu ihwo rẹ oma da phihọ eruẹ rhe, vwo kpo asan rẹ ayen nyori nẹ ọ epha.

⁵⁶Kasan kasan ro teri owenẹ ọ dia ighwre, eyẹ irere eyẹ orho ayen de mu ihwo rẹ oma da phihọ afieki, ayen da rẹ rere ayen vwẹ obọ te orhoma rẹ ewun rọye; uche ihwo re vwẹ obọ te ejobi oma rẹ ayen de kpo.