Read urhobo Mak 7 Bible Online

Mak 7 - urhobo bible

Mak 7

¹Asakiephana Farisi kugbe ẹvo vwẹ isiẹbe ri nẹ Jerusalẹm rhe de koko bro rhe,

²ayen da mrẹ ẹvo vwẹ idibo rọye re ria emu vwi jẹfuọn, kidie ayen hworhẹ abọ-ọ,

³Kidie ayen Farisi kugbe ihwo ri Ju ejobi, kpẹsiẹ rẹ ayen hworhẹ abọ-ọ, ayen rie emu-u, ayen da yọnre uruemu rẹ ekpako rayen

⁴ayen de nẹ eki rhe, kpẹsiẹ rẹ ayen họre-e, ayen ria emu-u; kugbe oghẹre rẹ emu etieye efa buebu rẹ ayen yọnre iko ẹhworhẹ, kugbe itaso, ẹrovwo kugbe imẹjẹ.

⁵Ayen Farisi kugbe isiẹbe na da nọ, Die idibo wẹn gbe yọnre iruemu re ẹkpakẹ na-a, rẹ ayen gbe hworhẹ abọ tavwe rẹ ayen ke ria emu-u?

⁶Ọ da ta kẹ ayen, Uyota Aizaya ghine mraro kpahe ovwan imeru na, kirobo re siro nẹ, Ihwo nana vwẹ unu mu ọghọ kẹ vwẹ ẹkẹvuọvo yẹ udu rayen sheri kẹ vwẹ.

⁷Ẹkẹvuọvo ayen de ga vwẹ ghevweghe Ayen yono uyono kugbe uruemu rẹ ihwo.

⁸Ovwan gbobọnyẹ urhi rẹ Ọghẹnẹ, wa yọnre uruemu rẹ ihwo gan.

⁹Ọ da ta kẹ ayen, Ovwan sen urhi rẹ Ọghẹnẹ rẹ ovwan vwọ yọnre uruemu rẹ ovwan.

¹⁰Kidie Mosis tare, Mu ọghọ kẹ Ọsẹ wẹn vẹ oni wẹn ọ rọ ta ota omiomiovwi kẹ ọsẹ eyẹ oni, e jo ghwu;

¹¹Ẹkẹvuọvo ovwan tare, Ọ da dianẹ ohwo ta kẹ ọsẹ rọye eyẹ oni rọye, Emu ra dia erere kẹ ovwan vwẹ obọ mẹ, Kọban, otọ rọye, A vwe rọ kẹ Ọghẹnẹ

¹²vwẹ ọtiọye na ovwan gbi jo ru emu kẹ ọsẹ rọye eyẹ oni rọye ọfa-a;

¹³Kẹ ọtiọye ovwan vwo ru ota rẹ Ọghẹnẹ phihọ odiodi, vwi fiki rẹ uruemu rẹ ovwan vwọ nẹ; kugbe oghẹre rẹ emu buebu ọtiọye rẹ ovwan de ruẹ.

¹⁴Ọ kẹ rhoma se ihwo na bro rhe, ọ da ta kẹ ayen, Ovwan ejobi me kerhọn rẹ ota mẹ, rere ovwan riẹn otọ rọye;

¹⁵emu ro nẹ uphẹphẹ rhe ro evun rẹ ohwo, ro se miovwo ohwo herọ-ọ; ẹkẹvuọvo emu ro nẹ evun rẹ oma rhe, ọye se miovwo ohwo.

¹⁶Kohwo kohwo ro vwo erhọn ro vwo nyo ẹme e jo nyo.

¹⁷Ọke rọ vwọ yan jẹ otu na vwo ra ro uwevwi, idibo rọye da nọ otọ rẹ itẹ na.

¹⁸Ọ da ta kẹ ayen, ovwan ji vwo ẹruọ rhe? Ovwan gbe riẹn nẹ kemu kemu ro nẹ uphẹphẹ ro ohwo se miovwo-o;

¹⁹fikiridie ọ ro evun rẹ udu rọye-e ẹkẹvuọvo evun ọvo, o mi re tue fia? Ọna rọ tare na, o vwi ro ru emu na ejobi fon.

²⁰Ọ da ta, Ọ ro nẹ evun rẹ ohwo rhe ri se miovwo ohwo.

²¹Kidie evun rẹ udu rẹ ohwo, ọye iroro imiomiovwi nẹ cha, ọfanrhie egbe, iji echo, izighe, igberadja,

²²ẹruephio, evun umwemwu, ọphiẹvwẹ, zighi zighi, omaẹrio, ophọphọvwe, eheri, ughẹnghẹn.

²³Imu imiomiovwi nana ejobi evun rẹ udu i nẹ cha, eyena keye ri miovwo ohwo.

²⁴O de vrẹn nẹ etiyin o de kpo ubrakpo ri Taya vẹ Saidọn. Ọ da ro uwevwi ọvo ọ gbe guọnọ nẹ ohwo ọvuọvo riẹ-ẹn: ẹkẹvuọvo yọ sa djahe-e.

²⁵Siẹvuọvo na aye ọvo, rẹ ọmọtẹ rọye vwo erhi ro jẹfuọn, ro vwo nyo umri rọye ọ da rhe rhi diguẹ vwẹ asan awọ rọye.

²⁶Aye na ọ rẹ Griki, ohwo ri Sarofonika. Ọ da rhe rhe rẹ rere ọ djẹ idẹbono nẹ oma rẹ ọmọtẹ rọye na.

²⁷Ọ da ta kẹ, E jẹn evun ka vọn emọ na tavwe. kidie o fori ra vwẹ ikara rẹ emọ na kẹ eranko-o.

²⁸Ẹkẹvuọvo aye na da kpahe ta kẹ, Eriyin Ọrovwori, yẹ eranko rọ hẹ otọ rẹ imẹjẹ sa re ivwnvwu rẹ emu re emọ na.

²⁹Ọ da ta kẹ, Vwi fiki rẹ ota nana yanran kpo, idẹbono na nẹ oma rẹ ọmọtẹ wẹn re.

³⁰Ọ da yanran kpo obo uwevwi rọye, ọ da mrẹ ọmọtẹ na o shevwerhẹ enu rẹ ehwa, idẹbono na nuro re.

³¹Ọ da rhoma rhivwi nẹ ubrakpọ ri Taya, wan Saidọn vrẹn kpo abadi ri Galili, vwẹ uherevie ri Dikapoiis.

³²Ayen da reyọ odierhọn ọvo vwo rhe e ji bru awẹrenvwe rọye-e ayen da rẹ nẹ ọ ghwẹ abọ rọye kpahọ.

³³O de sio nẹ ohri rẹ otu na kpo odjahọ ọ da chọrọ irhiabọ rọye phihọ erhọn rọye, o de die enya vwo te ẹrenvwe rọye,

³⁴O de ni odjuvwu, o de ku ẹnwẹn, ọ da ta kẹ nẹ, Effata, otọ rọye rhie.

³⁵Erhọn rọye de rhie, awẹrenvwe rọye da rhan, ọ da ta ota phia.

³⁶O de jiji kẹ ayen nẹ ayen ta kẹ ohwo ọvuọvo-o ẹkẹvuọvo obo ro jiji kẹ ayen gan te na, eriyin ayen ji kperi usi rọye gan te.

³⁷O de gbe ayen unu vrẹn, ta nẹ, O ru emu ejobi yovwi, o ru odierhọn nyo ẹme, o ru idi ta ota.