Read urhobo Mak 8 Bible Online

Mak 8 - urhobo bible

Mak 8

¹Vwẹ ẹdẹ yena otu buebu da rhoma ri koko ayen gbi vwo emuọvo rẹ ayen re-e, o de se idibo rọye bro rhe ọ da ta kẹ ayen,

²aro rẹ otu buebu na dọn vwẹ, kidie etiyin ẹdẹ erha ayen vẹ ovwẹ gbe herọ re, ayen vwo emuọvo rẹ ayen ria-a,

³mi de ji ayen yanran kpo uwevwi rayen erhierhi, oma bru ro ayen vwẹ idjerhe; ẹvo nẹ asan ro sheri rhe.

⁴Idibo rọye da kpahe kẹ, Bovọ a da sa mrẹ ikara rọ vọn ihwo nana evun vwẹ aton nana?

⁵Ọ da nọ ayen, bro ikara ovwan vwori? Ayen da ta, Ighwrẹ.

⁶Ọ da ta kẹ otu buebu na nẹ ayen tidia otọ; ọ da reyọ ikara ighwrẹ na, re ọ vwọ kpẹvwẹ nu, o de bro, vwọ kẹ idibo rọye, re ayen vwọ kẹ ayen; ayen de mu ayen phihọ obaro rẹ otu na.

⁷Ayen ji vwo imiyeri itete ẹvo. re ọ vwọ nẹ ẹrhovwo phihọ nu, ọ da ta nẹ e ji mu enana vwọ kẹ ayen rhe.

⁸Ayen re re, evun da vọn ayen. ayen da sanọ ivwuvwu ri chekọ vọn ibere ighwrẹ.

⁹Otu re re emu na da dia uriori iyori.

¹⁰O de ji ayen kpo siẹvuọvo na, ọ vẹ idibo rọye da ro okọ ọ de kpo ubrotọ ri Dalmanuta.

¹¹Farisi da rhe, ayen ki nene phra aphro, ke guọnọ oka ro ru nẹ odjuvwu rhe, ayen ke davwọ nẹ.

¹²O de ku ẹnwẹn kokodo vwẹ obo erhi rọye ọ da ta, Die orua nana vwọ guọnọ oka? Uyota Me ta kẹ ovwan, Asa vwẹ oka kẹ orua nana-a.

¹³Ọ da yan jẹ ayen vwo, ọ rhoma ro okọ na o de kpo esamu rivẹ.

¹⁴Asakiephana ayen gbe karoho reyọ ikara nene oma-a; ikara ọvuọvo kọye ayen vwo vwẹ evun rẹ okọ na.

¹⁵Ọ da phẹphẹ ayen unu, tanẹ, Ovwan kẹnoma kpahe iphuephu re emu ri Farisi vẹ iphuephu rẹ Herọd.

¹⁶Ayen ki roro ota nana vwẹ omoma rẹ ayen, tanẹ, fiki rẹ obo rẹ avwanre ghwa ikara-a na.

¹⁷Ri Jesu vwọ riẹn ọ da ta kẹ ayen, Die ovwan vwo roro ota na nẹ fiki rẹ obo ra avwanre ghwa ikara-a? Ovwan ji vughe-e, gbenẹ ọ je ro ovwa-an? Udu rẹ ovwan je gan?

¹⁸Ovwan vwo ẹro, ovwan mrẹ orẹ-ẹ? Ovwan vwo erhọn, ovwan nyo ẹme-e? Owan karọphihọ-ọ?

¹⁹Ọke mi vwo bru ikara iyori kẹ ihwo uriori iyori bro ibere ovwan sanọ vọn vwẹ ivwuvwu ri chekọ na? Ayen da ta Ihwivẹ.

²⁰Ọke rẹ mẹ vwo reyọ ikara ighwrẹ vwọ kẹ ihwo uriori ẹne bro ibere ovwan sanọ vọn vwẹ ivwuvwn ri chekọ na? Ayen da ta, Ighwrẹ.

²¹Ọ da ta ke ayen, Ọ je ro ovwa-an?

²²Ayen da rhe Bẹtsaida. Ihwo da reyọ orhuẹro ọvo vwo rhe, ayen da rẹ nẹ ọ vwẹ obọ te.

²³Ọ da yọnrọn orhuẹro na obọ, ọ da reyọ nẹ ọko na; ọke ro vwo dje enya ku ẹro rọye, ọ da ghwẹ abọ kpahọ, ọ da nọ, wọ mrẹ emuọvo?

²⁴Ọ de ni enu, ọ da ta mẹ mrẹ ihwo; ẹkẹvuọvo ke họhọ irhe, re yan.

²⁵Ọ da rhoma ghwẹ abọ rọye kpahe ẹro rọye, o de ni enu kpae orẹmrẹ rọye da varhe, ọ da mrẹ emu ejobi phephẹ.

²⁶O de jo kpo uwevwi rọye, tanẹ wọ vwẹriẹ evun rẹ ighwrẹ na-a.

²⁷Jesu vẹ idibo rọye de kpo ọko ri Sizaria Filipae. vwẹ idjerhe ọ da nọ idibo rọye, Ono ihwo tobọ ta ne Me epha?

²⁸Ayen da ta kẹ, Jọn ri Baptist, efa da ta Ilaija, ẹkẹvuọvo evo nẹ, ọvo vwẹ emrarọ na.

²⁹Ọ da nọ ayen, Ẹkẹvuọvo kẹ ono ovwan ta nẹ Me epha? Pita da kpahe kẹ, Wọwẹ hẹ Kristi na.

³⁰Ọ da phẹphẹ ayen unu nẹ ayen gbe ikun na kẹ ohwo ọvuọvo-o.

³¹O de mu ayen họ eyono, nẹ, Ọmọ rẹ ohwo cha rẹ oja rẹ emu buebu, ẹkpako na, kugbe irherẹn na, kugbe isiẹbe ua cha siọn, ayen che hwe, ẹdẹ erha da wan nu kọ rhoma vrẹn.

³²Ọ da ta ota na phephẹ kẹ ayen. Pita ke ghwọ kuo.

³³Ẹkẹvuọvo rọ vwọ rhẹriẹ oma mrẹ idibo rọye ọ da ghwọ ku Pita, ọ da ta, Wan ro obuko mẹ, Idẹbono; kidie ọ dia abọ rẹ Ọghẹnẹ wo epha-a ẹkẹvuọvo ọ rẹ ihwo.

³⁴O de se otu na kugbe idibo rọye bro rhe, ọ da ta kẹ ayen, Ohwo kohwo da guọnọ ovwẹ nene, e gbe jọ sen omobọ rọye ro mu agbagba rọye ro nene uvwe.

³⁵Kidie kohwo kohwo ro sivwi arhọ rọye ko kuo fia; ohwo kohwo ro ku arhọ rọye fia fiki mẹ vẹ fiki rẹ iyẹnrẹ esiri na ke sivwo rhọ.

³⁶Ki didi erere ri te ohwo, ro de vwo akpọ na ejobi ro de ku arhọ rọye fia?

³⁷Gbenẹ kidie ohwo se vwo wene arhọ rọye?

³⁸Kidie ohwo kohwo rọ vo oma mẹ kugbe oma rẹ ota mẹ vwẹ evun rẹ orua ri gbe igberadja na kugbe iruimwemwu nana, Ọmọ rẹ ohwo je vo oma rọye rhe, vwẹ ọke rọ da cha vwẹ evun rẹ urinrin rẹ Ọsẹ rọye vẹ emakashe efuanfon na.