Read urhobo Mak 9 Bible Online

Mak 9 - urhobo bible

Mak 9

¹Ọ da ta kẹ ayen, Uyota mẹ ta kẹ ovwan, evo hẹrọ ri mudia vwẹ etinẹ na, rẹ cha davwe ughwu phiephie-e, bẹsiẹ re ayen vwọ mrẹ uvie rẹ Ọghẹnẹ rọ cha vẹ ogangan.

²Rẹ ẹdẹ ẹsan vwọ wan nu Jesu da reyọ Pita, kugbe Jems vẹ Jọn ọ da vwẹ ayen rhe enu rẹ ugbenu ọvo ro kpenu ọ vẹ ayen ọvo, o de wene oma vwẹ irharo rẹ ayen.

³Iwun rọye ki lo wrowro, fuanfon gangan; ọtiọye na o se vwo ohwo rọ fọnrhọn emwa fon eriyin vwẹ akpọ na-a.

⁴Ilaija kugbe Mosis da vwẹ oma phia kẹ ayen. ayen de nene Jesu ta ota.

⁵Pita da kpahe, ọ da ta kẹ Jesu, Rabbi oyoma rere avwanre dia etinẹ. Jẹn avwanre bọn itughẹ erha; ọvo ọwẹn, ọvo ọ ri Mosis, ọvo kẹ Ilaija.

⁶Kidie ọ gbe riẹn obo rọ ta-a; kidie oshọ mu ayen gangan.

⁷Egho da rhi rhurhu ayen, urhuru ọvo de nẹ egho na rhe, Ọnana Ọmọ mẹ ro je vwe. ovwan nyo ota rọye.

⁸Siẹvuọvo na rẹ ayen vwo ni asan na yariẹ, ayen gbe mrẹ ohwo ọfa-a, jokpa ri Jesu kugbe ayen ọvo.

⁹Rẹ ayen vwo wo nẹ ugbenu na cha otọ, ọ da phẹphẹ ayen unu nẹ ayen ta emu rẹ ayen mrẹre na kẹ ohwo ọvuọvo-o bẹsiẹ rẹ Ọmọ rẹ ohwo vwo vrẹn nẹ ughwu nu.

¹⁰Ayen de phi ota na phihọ evun, ayen ke nọ omoma rẹ ayen nẹ kemavọ evrenughwu fiki epha.

¹¹Ayen da nọ, Die isiẹbe na vwọ ta nẹ Ilaija re ka rhe?

¹²Ọ da ta kẹ ayen, Ilaija re ka rhe, ọ mẹ rhe rhuẹrẹ emu na ejobi ru. kemavọ e siro kpahe Ọmọ rẹ ohwo nẹ, Ọ rẹ oja rẹ ẹmu buebu nẹ ayen cha vwọ jehwẹ?

¹³Ẹkẹvuọvo mẹ ta kẹ ovwan nẹ, Ilaija ghinẹ rhe nure, ayen de ruo obo ri je ayen, kirobo re siro kpahọ.

¹⁴Ọke rẹ ayen vwo bru idibo na rhe, ayen da mrẹ otu rẹ yariẹ ayen phihọ, kugbe isiẹbe re vẹ ayen gba nọ enanọ.

¹⁵Rẹ otu na vwọ mrẹ, o de gbe ayen unu gangan, ayen da dje bro re yere.

¹⁶Ọ da nọ ayen, Die ovwan nọ ayen?

¹⁷Ọvo vwẹ otu na da kpahe kẹ, Oyono, Me reyọ ọmọ mẹ ro vwo erhi ro diunu, vwo rhe we;

¹⁸asan kasan ro de muo, o mi vwo phiotọ, unu rọyen mi gbe iphughẹ, ọ Me riako oma mi bru ruọ. Me da ta kẹ idibo wẹn nẹ ayen djẹ no, ayen se ruo-o.

¹⁹Ọ da kpahe ke ayen, orua ro je esegbuyota evwo, mavọ Me vẹ ovwan dia kri te? mavọ mi chirako rẹ ovwan te? reyọ vwo rhe vwe.

²⁰Ayen da reyọ ọmọ na vwo rhe, ọke rẹ erhi na vwọ mrẹ, o de ghwe si ọmọ na miomiovwi; o de she phihọ otọ, kọ gbule, unu rọye ko gbe iphugbẹ.

²¹Jesu da nọ ọsẹ rọye, Ọkevọ ọga nana vwo muo? Ọ da ta, Nẹ ọke emọ rhe.

²²Kọke kọke o vwo muo phihọ erhanre kugbe ame, re o vwo hwe. ẹkẹvuọvo wo de se ruẹ emu ọvo ni arodọvwẹ re avwanre wọ chọ avwanre uko.

²³Jesu da ta kẹ, wo de se ru! Emu na ejobi ọlọlọhọ kẹ ọ ro segbuyota.

²⁴Siẹvuọvo Ọsẹ rẹ ọmọ na de ghwe kperi phia ọ da ta, mi segbuyota; chọ ijesegbuyota mẹ uko.

²⁵Ọke ri Jesu vwọ mrẹ nẹ otu na ra dje siẹ koko, ọ da ghwọ ku erhi ro jẹfuọn na, tanẹ wọwẹ erhi ro diunu na vẹ odierhọn, Me ta kẹ wẹ, wan no, wọ gbe ruọ ọfa-a.

²⁶Ro vwo kperi phia, o de sio gangan. o de no, ọmọ na da họhọ orivwi ọtiọye re ihwo buebu da ta nẹ, o ghwuru.

²⁷Ẹkẹvuọvo Jesu da yọnrọn obọ ọ da kparọ kpenu; o de vrẹn.

²⁸Ọke rọ vwọ rhe evun rẹ uwevwi, idibo rọye da nọ vwẹ odjahọ, Die avwanre gbe sa djẹ phia-a?

²⁹Ọ da ta kẹ ayen, A sa djẹ oghẹre nana no-o jokpa rẹ ẹrhovwo ọvo.

³⁰Ayen de nẹ etiyin ra wan Galili vrẹn; ọ gbe guọnọ nẹ ohwo ọvo riẹ-ẹn.

³¹Kidie o yono idibo rọye tanẹ, E che mu Ọmọ rẹ ohwo phihọ obọ rẹ ihwo, ayen che hwe; e de hwe ghwu nu, ẹdẹ erha da wan ko vrẹn.

³²Ẹkẹvuọvo otọ rẹ ota na ro aye-en, oshọ rẹ ayen vwọ nọ de mu ayen.

³³Ayen da rhe Kepanọm; ọke rọ vwọ hẹ evun rẹ uwevwi ọ da nọ ayen, Die ovwan tobọ jẹ iroro rọye vwẹ obo idjerhe?

³⁴Ẹkẹvuọvo ayen de fotovwi, kidie ayen nene omoma rẹ ayen phro aphro vwẹ idjerhe, nẹ ono re ma rho.

³⁵Ọ de tidia, o de se ayen ihwivẹ na, ọ da ta kẹ ayen, Ohwo kohwo da guọnọ nẹ ọye karo, ọye re cha ka uko, kugbe ọ ro gbe odibo kẹ ayen ejobi.

³⁶O mu omotete ọvo vwo mudia uherevie rayen; Ọ de muo kpahe abọ rọye ọ da ta kẹ ayen,

³⁷Ohwo kohwo rọ reyọ omotete tiọnana vwẹ odẹ mẹ, yẹ ọ reyọ ovwẹ, kohwo kohwo rọ reyọ ovwẹ, ọ reyọ ovwẹ-ẹ, ẹkẹvuọvo ọ ro ji vwe rhe.

³⁸Jọn da da ta kẹ, Oyono, avwanre mrẹ ohwo ọvo rọ vwẹ odẹ wẹn djẹ idẹbono phia; avwanre da djẹ kidie o nene avwanre-e.

³⁹Ẹkẹvuọvo Jesu da ta, Ovwan djẹ-ẹ, kidie o se vwo ohwo ọvo rọ vwẹ odẹ mẹ vwo ru iruo rẹ igbunu rọ da sa phẹrẹ ta ota ọbrabra kpahe ovwẹ-ẹ.

⁴⁰Kidie ọ rọ vwọ so avwanre yọ vẹ avwanre obọ.

⁴¹Kidie uyota Me ta kẹ owẹ kohwo kohwo rọ vwẹ uko rẹ ame kẹ ovwan da, fiki rẹ obo rẹ ovwan vwọ hẹ ihwo ri Kristi, uyota Me ta kẹ ovwan osa rọye se ghwru-u.

⁴²Kohwo kohwo rọ nẹrhẹ ọvo vwẹ imitete nana ri se vwe gbuyota na she, oyovwi kẹ ohwo yena ro churu oragha rode mu ohọre, re muo teyọ abadi.

⁴³Obọ wẹn da nẹrhẹ owẹ she, bro nu; oyovwi kẹ wẹ wo vwo kru obọ ra ro arhọ, nọ ru wọ da vwẹ abọ ivẹ vwo kpo orho rẹ igbephẹre vwẹ evun re erhanre ri fue-e,

⁴⁴asan rẹ ihori rọye ghwẹ-ẹ, erhanre na fuẹ-ẹ.

⁴⁵Owọ wẹn da nẹrhẹ owẹ she, bro nu, oyovwi kẹ wẹ wo vwo kru owọ ra ro arhọ, nọ ru wọ da vwẹ awọ ivẹ kpo orho rẹ igbephẹre vwẹ evun rẹ erhanre ri fuẹ-ẹ,

⁴⁶asan rẹ ihori rọye ghwẹ-ẹ, erhanre na fuẹ-ẹ.

⁴⁷Ẹro wẹn da nẹrhẹ owẹ she, rhuo nu; oyovwi kẹ wẹ wọ vwọ reyọ ẹro ọvo vwọ ro uvie rẹ Ọghẹnẹ, nọ ru wọ da vwẹ ẹro ivẹ ra da kpare owẹ phihọ ọrho rẹ igbephẹre.

⁴⁸asan rẹ ihori rọye ghwẹ-ẹ, erhanre na ifuẹ-ẹ.

⁴⁹Kirobo ra vwẹ ughweraka ru emu na eriyin a cha vwẹ erhanre ru kohwo kohwo.

⁵⁰Ughweraka yoma: ẹkẹvuọvo ughweraka de ku avwerhe rọye fia, kidie ovwan vwo kẹ avwerhe? Ovwan vwo ughweraka vwẹ oma rẹ ovwan, ovwan vwẹ ufuoma nene ohwohwo yeri.