Read urhobo Luk 1 Bible Online

Luk 1 - urhobo bible

Luk 1

¹Kirobo rẹ ihwo buebu vwo si eta na phihọ otọ rẹ obo re phiare kugbe emu ri ruru vwẹ uherevie rẹ avwanre,

²kirobo ra vwẹ ayen yono avwanre notọrhe, vwẹ unu rẹ ihwo re dia iseri rẹ ota na,

³o de fo kẹ vwẹ rere kirobo re me riẹn ayen gbagba na, kọye mi si ayen ọvuọvo rhe,

⁴Tiofilọs ro kpenu; rere wọ vwọ sa riẹn uyota rẹ obo re vwo yono uwe na.

⁵Ọke ri Herọd vwọ hẹ ovie ri Judia, ọwanran ọvo re se Zakaraya, ọ rẹ otu rẹ Abija. o de vwo aye ọvo ọ rẹ ekru rẹ Erọn, odẹ rọye kẹ Ẹlizabẹt.

⁶Ayen ivẹ na da dia evwata vwẹ obaro rẹ Ọghẹnẹ, ayen yọnrọn irhi na gangan.

⁷Ayen gbi vwo ọmọ-ọ, ẹga kọye ese ayen, ayen ivẹ na je kpako re.

⁸Ute rọye vwo te, ro vwo ze izobo kẹ Ọghẹnẹ vwẹ enu rẹ ẹshẹ,

⁹kirobo rẹ ẹwanran na ruẹ jovwo, vwẹ uwevwi rẹ ẹga rẹ Ọrovwohwo rọ vwọ torhẹ insẹns.

¹⁰Yẹ ihwo na ejobi diguẹ re nẹ ẹrhovwo vwẹ ọke ra vwo torhẹ insẹns na.

¹¹Amakashe rẹ Ọrovwohwo ro mudia vwẹ obọrhe rẹ ẹshẹ rẹ insẹns na da vwẹ oma phia kẹ.

¹²Udu de bro rọ vwọ mrẹ, oshọ de muo.

¹³Ẹkẹvuọvo amakashe na da ta kẹ, Zakaraya wọ djẹ oshọ-ọ, kidie enyo ẹrhovwo wẹn, aye wẹn Flizabẹt che vwiẹ ọmọshare, ku wo se odẹ rọye Jọn.

¹⁴Ku wo vwo aghọghọ vẹ omavwerhe, ihwo buebu ke ghọghọ vwẹ evwiẹ rọye;

¹⁵Kidie ọ cha rho vwẹ obaro rẹ Ọrovwohwo, ọ cha da wain yẹrẹ udi ọganga-an, kọ cha vọn vẹ Erhi Ọfuanfon, mrẹmrẹ nẹ evun rẹ oni rọye rhe.

¹⁶Ko ku emọ rẹ Izrẹl buebu rhẹriẹ bru Ọrovwohwo Ọghẹnẹ rayen,

¹⁷kọ ka obaro kẹ vwẹ erhi vẹ ogangan rẹ Ilaija, rọ rhẹriẹ udu rẹ esẹ na bru emọ na, ijọghọ evwo kpo aghwanre rẹ ọsoso, rere ọ rhuẹrẹ ihwo phihọ otọ kẹ Ọrovwohwo.

¹⁸Zakaraya da ta kẹ amakashe na, Didi oka mi vwo vugbe ọna? Kidie mẹvwẹ ọmare, aye mẹ je kpako re.

¹⁹Amakashe na da kpahe kẹ, Mẹvwẹ Gabrẹl ro muẹdia vwẹ obaro rẹ Ọghẹnẹ; ke ji vwe rhe ta ota kẹ wẹ, re me ghwa ikun esiri na rhe we.

²⁰Nighe, kẹ etinẹ yanran ku wo diunu, wọ gbe sa ta ota-a, bẹsiẹ rẹ imu nana che vwo ru, fikiridie wo se ota mẹ gbuyota-a, ri che ru gba vwẹ ọke rayen.

²¹Ihwo na da rhe hẹrhẹ Zakaraya bẹn, o de gbe ayen unu kidie o krinọ vwẹ obo ẹshẹ na.

²²Ọke ro vwo yoro phia, ọ gbe sa ta ota kẹ aye-en, ayen da vwẹ evun riẹn nẹ ọ mrẹ emramrẹ uwevwi rẹ ẹga na; obọ kọye o kpogho kẹ ayen, o de ghwe diunu.

²³Ọke rẹ ute rẹ ẹga rọye vwọ gba nu, o de kpo uwevwi rọye.

²⁴Vwẹ ẹdẹ nana rhe vwọ wan nu aye rọye Ẹlizabẹt da mrevun, o de sioma nu emeranvwe iyori soso, tanẹ,

²⁵Ọrovwohwo ruruọ o de ghine si ehwẹjẹ nana nẹ uvwe oma.

²⁶Vwẹ emeranvwe resan Ọghẹnẹ de ji amakashe Gabrẹl kpo orere ri Galili ọvo re se Nazarẹt,

²⁷bru ọmọtobẹ ri Josẹf saotọ, ohwo rẹ uwevwi ri Devid; odẹ rẹ ọmọtobẹ na ki Meri.

²⁸Ọ de bro rhe ọ da ta, Do wẹ rọ vọnre vẹ ẹserọphẹ, Ọrovwohwo vẹ owẹ herọ.

²⁹Udu de bro gangan vwẹ ota na, kọ vwẹ evun roro nẹ, ọna ki didi oghẹre rẹ uyere.

³⁰Amakashe na da ta kẹ, Meri, wọ djẹ oshọ-ọ, kidie ivun wẹ vwerhe Ọghẹnẹ gangan.

³¹Nighe, wọ cha mrevun ku wo che vwiẹ ọmọshare, ku wo se odẹ rọye Jesu.

³²Ọ cha rho, ke se Ọmọ rẹ Ọro Mekpenu; Ọrovwohwo Ọghẹnẹ kọ vwẹ ekete ri Devid ọsẹ rọye vwọ kẹ,

³³Kọ re vwẹ enu rẹ uwevwi ri Jekọp bẹdẹ; uvie rọye gbi se vwo oba-a.

³⁴Meri da ta kẹ amakashe na, Komavọ ọnana sa vwọ dia ọtiọye, ye me vẹ ọshare je mroma-a?

³⁵Amakashe na da ta kẹ, Erhi Ọfuanfon na che bru we rhe, ogangan rẹ Ọro Mekpenu na ko che rhurhu uwe; ọtiọye ọmọ ru wo che vwiẹ na ke se ọfuanfon, ọmọ rẹ Ọghẹnẹ.

³⁶Nighe, Ẹlizabẹt omoni wẹn ọ rhi mrevun rẹ ọmọshare vwẹ uyovwiesha na; etiyin emeranvwe esan re, ọ re se ẹga jovwo na.

³⁷Kidie o vwo emu ọvuọvo rọ bẹn kẹ Ọghẹnẹ-ẹ.

³⁸Meri da ta, Nighe, mẹvwẹ ọmọtẹ rẹ Ọrovwohwo; gbe jẹ ọ sẹ kẹ vwẹ kirobo rẹ ota wẹn epha. Amakashe na da yan jovwo.

³⁹Vwẹ ọke yena Meri de ghwe vrẹn okpokpakpa vwo kpo obo orho rẹ ugbenu, vwo kpo orere ri Juda,

⁴⁰ọ da ro uwevwi ri Zakaraya o de yere Ẹlizabẹt.

⁴¹Rẹ Ẹlizabẹt vwo nyo uyere ri Meri, akpẹn rẹ evun na de mu pho vwẹ evun rọye; Ẹlizabẹt da rhe vọn vẹ Erhi Ọfuanfon

⁴²o de mu kperi gangan, Ebruphihọ kẹ wẹ vwẹ ohri rẹ eya, ebruphihọ kẹ akpẹn rẹ evun wẹn!

⁴³Mavọ o ru wan, rẹ oni rẹ Ọrovwovwe rhi vwo wo vwe?

⁴⁴Kidie, nighe, ọke mi ghwe vwo nyo umri rẹ uyere wẹn na, akpẹn rẹ evun mẹ na de mu pho vẹ aghọghọ.

⁴⁵Ebruphihọ kẹ ohwo ro segbuyota nẹ obo rẹ Ọrovwohwo ta kpahọ ejobi cha sẹ.

⁴⁶Meri da ta, Erhi mẹ jiri Ọrovwohwo,

⁴⁷Ẹnwẹ mẹ ghọghọre vwẹ oma rẹ Ọghẹnẹ Osivwi mẹ.

⁴⁸fiki rẹ ọghọ ro mu kẹ ọmọtẹ rọye. Kidie, nighe, kẹ etinẹ ra uvwiẹ rẹ akpọ na ejobi che se vwe ebruphihọ.

⁴⁹Onotu rẹ ogangan ru emu rode kẹ vwẹ, ọfuanfon kọ dia kẹ odẹ rọye.

⁵⁰Arodọvwẹ rọye herọ kẹ otu re djẹ oshọ rọye nẹ uvwiẹ re te uvwiẹ.

⁵¹Ọ vwẹ ogangan rẹ obọ rọye phia, ọ hra eheri rẹ udu rẹ ihwo ofefe,

⁵²Ọ vwẹ ihwo ri kpenu kpotọ, ọ kpare ihwo ri kpotọ kpenu.

⁵³Ọ vwẹ emu kẹ otu rẹ owẹvwe hwe; edafe na ọ djẹ ayen kpo vẹ abọ ofefe.

⁵⁴Ọ cha Izrẹl odibo rọye uko, vwẹ ẹkarohọ vẹ arodọvwẹ,

⁵⁵kirobo ro veri kẹ esẹ rẹ avwanre ride, Ebraham vẹ ikru rọye bẹdẹ.

⁵⁶Meri da dia uwevwi rẹ Ẹlizabẹt emeranvwe erha tavwe ro ki rhivwi kpo.

⁵⁷Asakiephana ọke rẹ uvwiẹ rẹ Ẹlizabẹt de rhi te, o de vwiẹ ọmọshare.

⁵⁸Igbeyan rọye kugbe imoni rọye rhe vwọ mrẹ ẹse rẹ Ọrovwohwo ru kẹ, ayen da rhe ghọghọ kẹ.

⁵⁹Edẹ ẹrenre vwọ gba, ayen da rhe yanvwe ọmọ na; ayen de mu odẹ kẹ nẹ Zakaraya, kirobo re se ọsẹ rọye,

⁶⁰oni rọye da sen nẹ, ọ dia ọtiọye-e, e se Jọn.

⁶¹Ayen da ta kẹ, o vwo ohwo ọvuọvo re se Jọn vwẹ orua na-a.

⁶²Ayen da vwẹ obọ ta ota kẹ ọsẹ rọye rere ọye ọvo mu odẹ kẹ.

⁶³Ọ da nọ ekpẹn rẹ ọbe kugbe imẹjẹ, o de sio nẹ, E se odẹ rọye Jọn. O de gbe ayen ejobi unu,

⁶⁴Siẹvuọvo na unu rọye de ghwe rhie awọẹrenwe rọye da ghwa rhan, ọ da ta ota, jiri Ọghẹnẹ.

⁶⁵Oshọ de rhi mu ihwo re dia kẹrẹ ayen ejobi. Usi rẹ ota na de rhi kperi ro orho rẹ ugbenu ri Judia ejobi;

⁶⁶ihwo ejobi ri nyo ota na de phio phihọ udu rayen, tanẹ, Komavọ ọmọ nana cha dia? Kidie obọ rẹ Ọrovwohwo vẹ ọmọ na herọ.

⁶⁷Ọsẹ rọye Zakaraya da rhe vọn vẹ Erhi Ọfuanfon o da mraro, tanẹ,

⁶⁸Ebruba kẹ Ọrovwohwo Ọghẹnẹ rẹ Izrẹl; kidie o rhi ni ihwo rọye rọ tan hirhe,

⁶⁹ọ kpare ighoro rẹ esivwo kẹ avwanre vwẹ uwevwi ri Devid odibo rọye,

⁷⁰kirobo rọ tare vwẹ unu rẹ emraro rọye nẹ otọ rẹ akpọ na rhe,

⁷¹nẹ o si avwanre nẹ obọ rẹ ivwighrẹ rẹ avwanre, kugbe obọ rẹ otu ri tuoma rẹ avwanre;

⁷²iruo rẹ arodọvwẹ ro ruru kẹ esẹ rẹ avwanre ride, kugbe ẹkarohọ rẹ ọphọ ọfuanfon rọye,

⁷³ive ro veri kẹ ọsẹ rẹ avwanre Ebraham,

⁷⁴nẹ ọye vwọ kẹ avwanre, rere, o de si avwanre nẹ obọ rẹ ivwighrẹ rẹ avwanre nu, avwanre vwọ sa ga vwẹ ufuoma,

⁷⁵vwẹ ẹfuọn kugbe ọvwara vwẹ obaro rọye vwẹ ẹdẹ rẹ akpọ rẹ avwanre ejobi.

⁷⁶Wẹ, ọmọ, e che se we ọmraro rẹ Ọro Mekpenu; kidie wọ cha ka obaro kẹ Ọrovwohwo ra rhuẹrẹ idjerhe rọye,

⁷⁷Kọ vwẹ ẹriẹn rẹ esivwo kẹ ihwo rọye, vẹ evwoghovwo rẹ imwemwu rayen,

⁷⁸fiki rẹ arodọvwẹ rẹ Ọghẹnẹ rẹ avwanre, ọye Isio rẹ Urhiọke vwo nẹ enu bru avwanre rhe

⁷⁹ro lo mu ihwo re hẹ ebri kugbe uhoho rẹ ughwu, ro sun avwanre vwẹ idjerhe rẹ ufuoma.

⁸⁰Ọmọ na da rhe rho ọ da rhe vọn vẹ erhi, ọ da dia evun rẹ aghwa bẹsiẹ rọ ke vwẹ oma phia kẹ Izrẹl.