Read urhobo Luk 10 Bible Online

Luk 10 - urhobo bible

Luk 10

¹Rẹ Ọnana vwọ wan nu Ọrovwohwo de ji ujorha gbẹ ihwe efa, o de ji ayen ka obaro kẹ, ivivẹ, vwo kpo orho korho asan rẹ okpuyovwi rọye guọnọ ra.

²Ọ da ta kẹ ayen, orhọ na pha buebu, ẹkẹvuọvo otu rẹ iruo na gbi bu-n; a gba rẹ Ọrovwohwo ro vwo orhọ na ro ji otu rẹ iruo re vun orhọ rọye.

³Ovwan yanran; nighe, mi ji ovwan kerẹsiẹ ra mrẹ igegede vwẹ ohri rẹ ikpohrokpo.

⁴Wa ghwa umuamwa-a, eyẹ ekpo-o, eyẹ isabato-o, we yere ohwo ọvuọvo vwẹ idjerhe-e.

⁵Uwevwi kuwevwi re ovwan vwẹriẹre, we ke yere, Ufuoma dia kẹ uwevwi nana!

⁶Ọmọ rẹ ufuoma da hẹ etiyin, ufuoma wẹn ko nene dia; ẹkẹvuọvo ọ rha dia ọtiọye-e, ko rhivwi bru uwe rhe.

⁷Uwevwi yena ọvo ovwan dia, da re da da ọtiẹ oghẹre rẹ emu rẹ ayen vwọ kẹ ovwan, kidie ofori re otu re wianre vwo vwo osa; We nẹ uwevwi kpo uwevwi-i.

⁸Korho korho rẹ ovwan teri rẹ ayen da reyọ ovwan, kemu kemu rẹ ayen vwọ kẹ ovwan ejobi wa re;

⁹we sivwi ihwo re mwa vwẹ etiyin re wa ta kẹ ayen, Uvie rẹ Ọghẹnẹ te ovwan oma nure.

¹⁰Ẹkẹvuọvo korho korho rẹ ovwan teri rọ gbe reyọ ovwa-an wa gba ro evun rẹ irhuvwu rọye re wa ta,

¹¹Vwevwe rẹ iwurhie re tamu awọ rẹ avwanre, me phorho ayen kẹ ovwan; ọtiọye na ovwan gba riẹn ọnana nẹ, uvie rẹ Ọghẹnẹ te ovwan oma nure.

¹²Me ta kẹ ovwan, Oyovwi vwẹ ẹdẹ yena kẹ Sodọm nọ orho yena.

¹³Ekan kẹ wẹ, Korazin! ekan kẹ wẹ, Bẹtsaidai Ọ dianẹ iruo ride nana re ru vwẹ evun wẹ na ke ru ayen vwi Taya vi Saidọn, manẹ ayen kurhẹriẹ rhabae, rẹ ayen de rhuo esiso bru oma phihọ iwurhie.

¹⁴Ẹkẹvuọvo o yovwi vwẹ ẹdẹ rẹ ẹdjọeguo kẹ Taya kugbe Saidọn vwo nọ wẹ.

¹⁵Wẹ, ri Kepanọm, ro muẹ oma kpenu kpo odjuvwu? A cha vwẹ owẹ kpotọ kpo Erivwi.

¹⁶Ọ ro nyo ota rẹ ovwan yo nyo ọ mẹ, ọ rọ sen ovwan yọ sen vwẹ, ọ rọ sen vwẹ yọ sen ọ ro ji vwe rhe.

¹⁷Ujorha gbẹ ihwe na de rhivwi rhe vẹ aghọghọ, tanẹ, Ọrovwohwo, Vwevwe rẹ idẹbono na vwẹ uyovwi kpotọ kẹ avwanre vwẹ odẹ wẹn!

¹⁸Ọ da ta kẹ ayen, Me mrẹ Idẹbono ro sheri kerẹ enu rọ nyavwaro nẹ obo odjuvwu cha.

¹⁹Nighe, Me vwẹ ogangan kẹ ovwan we vwo chiyi eredekọ kugbe ekpakpasimagha, vwẹ enu rẹ ogangan rẹ ọvweghrẹ; yẹ emuọvo sa wan ovwan oma-a.

²⁰Dede na ovwan ghọghọ vwẹ ọna-a, nẹ irhi na vwẹ oma kpotọ kẹ ovwan; ẹkẹvuọvo wa ghọghọ nẹ e si odẹ rẹ ovwan phihọ odjuvwu.

²¹Vwẹ ọke yena vuọvo na ọ da ghọghọ vwẹ evun rẹ Erhi Ọfuanfon na ọ da ta, Me kpẹvwẹ owẹn, Ọsẹ, Ọrovwohwo ro vwo odjuvwu vẹ akpọ, ru wo vwo si imu nana nu kẹ evwaghwanre kugbe otu ri vwo ẹruọ wọ da vwẹ ayen phia kẹ emọboba; eriyin, Ọsẹ, kidie ọtiọye hẹ ọhọre esiri wẹn na.

²²Ọsẹ mẹ vwẹ emu na ejobi kẹ vwẹ; yẹ ohwo ọvuọvo riẹn ọmọ na-a jokpa rẹ Ọsẹ na, eyẹ ohwo ọvuọvo riẹn Ọsẹ na-a jokpa rẹ ọmọ na kugbe ohwo rẹ ọmọ na vwe rọ phia kẹ.

²³Rọ vwọ rhẹriẹ oma ku idibo na ọ da bẹbẹ ta kẹ ayen, Ebruba kẹ ẹro re mrẹ imu rẹ ovwan mrẹre na!

²⁴Kidie Me ta kẹ ovwan nẹ emraro buebu kugbe ivie buebu guọnọre re mrẹ imu nana rẹ ovwan mrẹre na, yẹ ayen sa mrẹ-ẹ, re i nyo obo we nyori na, yẹ ayen se nyo-o.

²⁵Nighe, ọ riẹn urhi ọvo de mudia ọ da davwọ ni, tanẹ, Oyono, die mi ru me vwọ reuku rẹ arhọ ri bẹdẹ na?

²⁶Ọ da ta kẹ, Die e si phihọ urhi na? Mavọ wo sere te?

²⁷Ọ da kpahe, Wọ me guọnọ Ọrovwohwo Ọghẹnẹ vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi, wọ me je guọnọ ọrivẹ wẹn kirobo wọ guọnọ oma wẹn.

²⁸Ọ da ta kẹ, Wọ riẹn kpahe, ru ọnana, ku wọ rhọ.

²⁹Ẹkẹvuọvo, rọ vwọ guọnọ brorhiẹ kẹ oma rọye, ọ da ta kẹ Jesu, Kono hẹ ọrivẹ mẹ?

³⁰Jesu da kpahe, Ọshare ọvo ko nẹ Jerusalẹm kpo Jeriko, ọ da yan ro abọ rẹ ihwo ri gborho ihwo, ayen da ban phihọ ayen de hwe, ayen da djẹ jovwo yo ji ghwu divwi-i.

³¹Kpregede na orherẹn ọvo kọ ra yan vwa; ọke rọ vwọ mrẹ ọ da ghrẹghrẹ akakọ rivẹ wan.

³²Ọtiọye rhe ohwo ri Livae ọvo da yanrhe, ọke rọ vwọ mrẹ ọ da ghrẹghrẹ akakọ ọfa wan.

³³Ẹkẹvuọvo ohwo ri Sameria ọvo, rọ vwọ yanran re, o de rhi te asan rọ hẹ epha, rọ vwọ mrẹ, aro rọye da dọn,

³⁴ọ da yan bro ọ da gba era rọye, o de ku evwri vẹ udi kuo; o de muo kpahe enu rẹ eranvwe robọ rọye, o da tẹtẹ re te uwevwi rẹ erhorha, ọ da vwẹ ẹro te.

³⁵Vwẹ ẹdẹ rivẹ ọ da reyọ ikọba ivẹ ọ da vwẹ ayen kẹ ohwo rọ sẹro rẹ uwevwi na, tanẹ, Vwẹ ẹro te; vwọ da vwẹ igho ọfa ba ghẹrẹ, mẹ da rhoma rhe ke me hwa ayen kẹ wẹ.

³⁶Kẹ ọrhọ vwẹ ihwo nana erha na, wo rori nẹ, ọrivẹ rẹ ohwo re gborhori na?

³⁷Ọ da ta, Ọ ro ni arodọvwẹ kẹ na. Jesu da ta kẹ, yanran wo re ru ọtiọye rhe.

³⁸Rẹ ayen vwọ yanran vwẹ idjerhe na, ọ da vwẹriẹ ọko ọvo; aye ọvo re se Mata da reyọ kpọ uwevwi rọye.

³⁹O vwo oniọvo rẹ ọmọtẹ ọvo re se Meri, ro tidia awọ rẹ Ọrovwohwo rọ kerhọn rẹ uyono rọye.

⁴⁰Ẹkẹvuọvo Mata ra pharha chere emu, ọ de bro ra ọ da ta kẹ, Ọrovwohwo, wo gbe riẹn nẹ Meri sen uchere na ejobi kẹ vwẹ-ẹ? Ta kẹ rọ rhe cha vwẹ uko.

⁴¹Ẹkẹvuọvo Ọrovwohwo da kpahe kẹ, Mata, Mata, wọ ro ẹnwan kpokpo oma rẹ emu buebu;

⁴²emu ọvo ọye a guọnọre. Meri jẹ emu esiri na reyọ nure, e gbi se mie ọfa-a.