Read urhobo Luk 11 Bible Online

Luk 11 - urhobo bible

Luk 11

¹Kọ nẹ ẹrhovwo vwẹ asan ọvo, ro vwo fue ẹrhovwo nure, odibo rọye ọvo da ta kẹ, Ọrovwohwo yono avwanre obo ra nẹ ẹrhovwo, kirobo ri Jọn yono idibo rọye.

²Ọ da ta kẹ ayen, Ovwan da nẹ ẹrhovwo, ovwan ta, Ọsẹ, jẹ avwanre vwẹ ọghọ kẹ odẹ wẹn, jẹ uvie wẹn rhe.

³Kẹ avwanre emu ri kẹdẹ kẹdẹ;

⁴vwẹ imwemwu rẹ avwanre ghovwo avwanre, kirobo ri me vwo ghovwo otu ri gbe avwanre ku; Wo si avwanre ro odavwini-i.

⁵Ọ da ta kẹ ayen, Ono vwẹ usun rẹ ovwan na ro vwo ugbeyan ro de bro ra vwẹ uherevie ason rọ da ta kẹ, Oko, momo ikara erha kẹ vwẹ;

⁶Kidie ugbeyan mẹ ro nẹ asan cha rhi wo vwe, Me gbe mrẹ emu vwọ kẹ-ẹ;

⁷kọ dia evun rẹ uwevwi da kpahe kẹ, Wo kpokpo uvwe-e; Me kanre ẹchẹ nure, emọ mẹ vẹ ovwẹ shevwerhẹ ehwa; mi gbi se vrẹn vwọ kẹ wẹ-ẹ?

⁸Me ta kẹ wẹ, dede nẹ o se vrẹn rọ da kẹ emuọvo-o fikiridie ugbeyan rọye o ruẹ, ẹkẹvuọvo fiki robo rọ vwọ djẹ ovwerhẹ na, ko vrẹn vwọ kẹ kirobo rọ guọnọre.

⁹Me ta kẹ wẹ, Nọ, ka vwọ kẹ wẹ; guọnọ, ko wọ mrẹ; hworo, ke rhie kẹ wẹn.

¹⁰Kidie ohwo kohwo rọ nọre ko vwo, ọ rọ guọnọre kọ mrẹ, ọ ro hwori ke rhie kẹ.

¹¹Didi ọsẹ vwẹ ohri rẹ ovwan, rẹ ọmọ rọye da nọ ekpẹn rẹ eri, rọ da vwẹ ọrọdekọ kẹ vwẹ ẹdia rẹ eri,

¹²eyẹ rọ da nọ ekpẹn rẹ ukẹn, rọ da vwẹ akpakpasimagha kẹ?

¹³Ọ da dianẹ, wẹ rẹ ohwo umwemwu, da riẹn obo ra vwẹ emu oyoyovwi kẹ emọ wẹn, komavọ ọ rho te rẹ ọsẹ robo odjuvwu sa vwẹ Erhi Ọfuanfon kẹ otu re nọrọ?

¹⁴Asakiephana kọ djẹ erhi rẹ idẹbono ro diunu; rẹ idẹbono na vwo no nure, odiunu na da ta ota, o de gbe ihwo na unu.

¹⁵Ẹkẹvuọvo ẹvo da ta, Ogangan rẹ Bẹlzibọb, onotu rẹ idẹbono, ọ vwọ djẹ idẹbono phia,

¹⁶efa ghwa davwọ nẹ, nẹ ọ vwẹ oka nẹ odjnvwa rhe.

¹⁷Ẹkẹvuọvo rọ vwọ riẹn iroro rayen, ọ da ta kẹ ayen, Kuvie kuvie rọ ghare vwọ so omaobọ rọye kọ ghwọrọ, uwevwi she teye uwevwi.

¹⁸Ọ da dianẹ Idẹbono vwọ so omaobọ rọye, komavọ uvie rọye se vwo mudia? Kidie ovwan ta nẹ ogangan ri Bẹlzibọb Me vwọ djẹ idẹbono.

¹⁹Ọ da tobọ dianẹ ogangan ri Bẹlzibọb me vwọ djẹ idẹbono, kẹ ogangan rẹ ono emọ rẹ ovwan vwọ djẹ ayen phia? Fiki rẹ ọtiọye na ovwan ọvo gbe brorhiẹ yena.

²⁰Ẹkẹvuọvo kẹ ogangan rẹ Ọghẹnẹ me vwọ djẹ idẹbono, yẹ uvie rẹ Ọghẹnẹ bru ovwan rhe nure

²¹Ọke rẹ ọgba, rọ nabọ choma, da rhẹrẹ ighẹn rọye, oma ko fu eyere rọye;

²²ẹkẹvuọvo ohwo rọ goma nọ de bro rhe ro de phio kparobọ, kọ ka ghwa ekuakua rẹ ofovwi rọ vwẹ ẹro so na reyọ tavwe, rọ ke kua eyere rọye kpo.

²³Ohwo rọ vẹ ovwẹ hẹ obọ-ọ yọ vwọ so vwẹ, ohwo rọ vẹ ovwẹ ghwẹ koko-o yọ hra.

²⁴Ọke rẹ erhi ro jẹfuọn de nẹ evun rẹ ohwo, ko suosuo wan asan ọyaya rẹ ame epha-a ro de rovwo oma; ọ rha mrẹ-ẹ kọ ta, Mi rhivwi kpo uwevwi mẹ ri mi nurhe.

²⁵Ọke rọ da rhe rọ mrẹrẹ re hwerhe fia a nabọ rhuẹrẹ phihọ.

²⁶Kọ rhoma ọ me ra reyọ erhi ighwrẹ re bra nọ ekpuyovwi rọye, ayen me ro evun rọye ra dia etiyin; akpọ rẹ ohwo na ukuko na mi rhi miovwi nọ ọ rẹsosuọ.

²⁷Rọ vwọ ta ọnana re, aye ọvo vwẹ evun rẹ otu na da kpare unu ọ da ta kẹ, Ebruba kẹ evun ro vwiẹ wẹ, kugbe evie ru wo vieri!

²⁸Ẹkẹvuọvo ọ da ta, Ofori wọ vwọ ta, Ebruba kẹ ihwo ri nyo eta rẹ Ọghẹnẹ re da yọnrọn.

²⁹Ọke re otu na vwo buẹ phihọ, ko muhọ ẹta, Uvwiẹ nana uvwiẹ umwemwu; ọ guọnọ oka, ẹkẹvuọvo a cha kẹ oka-a jokpa rẹ oka ri Jona.

³⁰Kidie obo ri Jona dia oka kẹ ihwo ri Ninive, ọtiọye ọmọ rẹ ohwo je cha dia kẹ uvwiẹ nana.

³¹Ovie aye rẹ Obuko ọnre che vrẹn vwọ ihwo rẹ uvwiẹ nana guẹdjọ ro de bru hwe ayen; kidie o nẹ obo oba rẹ akpọ na rhe rhi nyo aghwanre ri Solomọn, gbe nighe, emuọvo rọ rhonọ Solomọn hẹ etinẹ.

³²Ihwo ri Ninive cha vwẹ uvwiẹ nana guẹdjọ re de bru hwe; kidie ayen kurhẹriẹ vwẹ eghwoghwo ri Jona, gbe nighe, emuọvo rọ rhonọ Jona hẹ etinẹ.

³³O vwo ohwo rọ vwẹ urhukpẹ rhu nu ro de phio phihọ eghogho eyẹ otọ rẹ ikuru-u, ẹkẹvuọvo enu rẹ ogburhukpẹ, rere otu re ro uwevwi na sa vwọ mrẹ orẹ.

³⁴Ẹro wẹn ọye hẹ urhukpẹ rẹ oma wẹn; ẹro wẹn da hẹ ọkpokpọ, oma wẹn ejobi kọ vọn vẹ orẹmrẹ; ẹkẹvuọvo ọ rha dia ọkpokpọ-ọ, oma wẹn kọ vọ vẹ ebri.

³⁵Fiki rẹ ọtiọye na gba jẹ omaotọ rere orẹmrẹ wẹn vwo jẹ ebri ẹdia.

³⁶Ọ da dianẹ oma wẹ ejobi vọnre vẹ orẹmrẹ, abọvo rhe bi-i, kọ riẹn la, kẹrẹsiẹ ra da vwẹ urhukpẹ rọ riẹn la mrẹ orẹ.

³⁷Rọ vwọ ta ota na, Farisi ọvo de se re emu; o de bro ra ayen da tidia udoemu.

³⁸Ri Farisi na vwọ mrẹ o de gbe unu kidie ọ ka hworhẹ obọ tavwe rọ ke re emu-u.

³⁹Ọrovwohwo da ta kẹ, Asakiephana ovwan Farisi hworhẹ obuko rẹ uko kugbe ọsete, ẹkẹvuọvo yẹ obo evun rẹ ovwan vọnre vẹ ọghware kugbe uvun-umwemwu.

⁴⁰Wẹ ẹkpa na, ọ dia ohwo ọvuọvo rọ ma obuko na re je ma obo evu-un?

⁴¹Ẹkẹvuọvo dia obo evun wẹn de ru ẹse; gbe nighe, emu na ejobi kọ fon kẹ wẹ.

⁴²Ẹkẹvuọvo ekan kẹ ovwan Farisi! Kidie wa hwa ẹkẹnhwe rẹ orhọ rẹ enẹ vẹ eka kugbe ifọ, we mi gbobọnyẹ ọsoso kugbe ẹguọnọ rẹ Ọghẹnẹ; ena ri fo obo ru we ru jovwo, we rhe gbobọnyẹ efa-a.

⁴³Ẹkan kẹ ovwan Farisi ! kidie asan ro me yovwi vwi Sinagọg wa guọnọ tidia kugbe uyere rẹ afieki.

⁴⁴Ekan kẹ ovwan ! kidie ovwan họhọ ishi re jẹ mrẹ, ihwo re yan wan enu rẹ ayen rha riẹ-ẹn.

⁴⁵Ọvo vwẹ usun re ẹriẹn urhi na da kpahe kẹ. Oyono, wọ vwọ ta ọnana na avwanre ejobi wo di muẹ harha na.

⁴⁶Ọ da ta, Ekan je kẹ ovwan ẹriẹn urhi nai! kidie ovwan kru eghwa ehọhọhọ re bẹn ẹghwa nyẹ ihwo efa, ẹkẹvuọvo wa vwẹ urhiabọ ọvo rẹ ovwan dede vwo te-e.

⁴⁷Ekan kẹ ovwan! kidie ovwan tọn ushi rẹ emraro na rẹ esẹ rẹ ovwan hweri.

⁴⁸Ọtiọye na ovwan kẹ iseri wa je rhọvwe phihọ uruemu rẹ esẹ rẹ ovwan; kidie ayen hwe ayen, ovwan da tọn ushi rayen.

⁴⁹Kọye Aghwanre rẹ Ọghẹnẹ vwọ ta, Mi ji emraro na rhe ayen kugbe iyinkọn ayen hwe ẹvo vwọ ayen mu ẹvo,

⁵⁰rere ọbara rẹ emraro na, re sun te otọ nẹ ọke rẹ akpọ vwọ mama rhe, ka nọ ekpẹn rọye vwẹ obọ rẹ uvwiẹ nana,

⁵¹nẹ ọbara rẹ Ebẹl re te ọbara ri Zakaraya, ro ghwuru vwẹ uvwre rẹ agbada vẹ ẹshẹ. Uyota me ta kẹ wẹ, ka nọ ekpẹn rọye vwẹ obọ rẹ uvwiẹ nana.

⁵²Ekan kẹ ovwan erianriẹn na; ekpuyovwi rẹ ovwan ro uwevwi-i, yẹ ihwo re rha ruọ wa da ayen ji.

⁵³Rọ vwọ yan nẹ etiyin re, isiẹbe kugbe Farisi ke nẹrhẹ phihọ ota gangan rere ọ ta ota buebu kẹ ayen,

⁵⁴ayen ke rhẹrẹ, re ayen nyo obo rọ cha ta.