Read urhobo Luk 13 Bible Online

Luk 13 - urhobo bible

Luk 13

¹Evo hẹ etiyin vwẹ ọke yena ri gbe ikun rẹ ihwo ri Galili kẹ ri Pailet vwẹ ọbara rayen gua izobo ze.

²Ọ da kpahe kẹ ayen, We rori nẹ ihwo ri Galili nana ri me ru imwemwu nọ ihwo ri Galili ejobi, fikiridie ayen reoja ọtiọna?

³Me ta kẹ wẹ, Ẹjo, ẹkẹvuọvo jokpa nẹ we kurhẹriẹ ovwan je ghwọrọ ọtiọye rhe.

⁴Eyẹ ihwe gbẹ ẹrenre yena rẹ ọguan ri Sailọm she teye ghwu na, we rori nẹ e ma dia igburhi nọ ayen ejobi re dia Jerusalẹm na?

⁵Me ta kẹ wẹ, Ẹjo, ẹkẹvuọvo jokpa nẹ we kurhẹriẹ ovwan je ghwọrọ ọtiọye.

⁶O de kpe itẹ nana. Ọshare ọvo da kọn owe phihọ ogba ri vain rọye; ọ da rhe rhe guọnọ ubi vwẹ enu rọye ọ gbe mrẹ ọvuọvo-o.

⁷Ọ da ta kẹ ohwo rọ rhuẹrẹ phihọ vain na, Nighe, Etiyin ikpe erha re Me guọnọ uhi vwẹ enu rẹ owe nana, mẹ mrẹ ọvuọvo-o. She kufia; die orhuoghi rọye vwo m iovwi otọ na?

⁸Ọ da kpahe kẹ, Yan jovwo enukpe na tavwe, ọrovwovwe, re mi bru otọ kẹ re e ku erhurhu phihọ.

⁹Ọ da mọ emamọ vwẹ ukpe rọ cha yẹ o yoma; ẹkẹvuọvo ọ gbe mọ-ọ, ku wo se she teye otọ.

¹⁰Asakiephana ko yono vwẹ sinagọg ọvo vwẹ ẹdidjala.

¹¹Aye ọvo hẹ Etiyin rọ honvwa ikpe ihwe gbẹ ẹrenre re; o de sa uke ọ gbe sa riẹn oma rọye-e.

¹²Ọke ri Jesu vwọ mrẹ, o de se ọ da ta kẹ, Aye, e sivwi uwe nẹ ehonvwo wẹn.

¹³Ọ da ghwẹ obọ kpahọ, siẹvuọvo na ọ da ghwa kpovi, o de jiri Ọghẹnẹ.

¹⁴Ẹkẹvuọvo ilori ri Sinagọg na, rẹ ivun miovwẹ fikiridie Jesu sivwiri vwẹ ẹdidjala, da ta kẹ ihwo na, Ẹdẹ esan ọye ihwo vwo ru iruo, yanrhe vwẹ ẹdẹ yena re e sivwi uwe, ọ dia ẹdidjala na-a.

¹⁵Etiyin Ọrovwohwo da kpahe kẹ, Ovwan imemesi na! Ovwan ohwo ọvuọvo rha rhan erhuẹn eyẹ ekẹtẹkẹtẹ rọye nẹ urhuẹ-ẹn, we mi suo ra da ame?

¹⁶O rhe fo kẹ aye nana, ọmọtẹ rẹ Ebraham na, rẹ Idẹbono gbare ikpe ihwe gbẹ ẹrenre na, ra rhan nẹ ifi vwẹ ẹdidjala na?

¹⁷Rọ vwọ ta ọnana re oma da vo ukọn rọye, ihwo na ejobi da ghọghọ fiki rẹ emu rẹ urinrin ro ruru na.

¹⁸Ọ da ta, Kidie a vwẹ uvie rẹ Ọghẹnẹ vwo dje? Kidie re họherọ?

¹⁹Ọ họhọ ubi rẹ uyerhie rẹ ohwo reyọre ọ da kọn phihọ udju rọye; ọ da djẹ rhi hirhe phihọ okpurhe, emephran rẹ obenu da rhe bọn ẹho phihọ abọ rọye.

²⁰Ọ da rhoma ta, Kidie re họhọ uvie rẹ Ọghẹnẹ?

²¹Ọ họhọ ọko erha rẹ aye phare mu chere, o de rhi phu tuturutu.

²²Ọ da yanran wan irho vẹ ẹko, o yono, jọ yan hirhe opharo ku Jerusalẹm.

²³Ohwo ọvo da ta kẹ, Ọrovwohwo, imihwo tutuno re cha rhọ vwọ? Ọ da ta ke ayen,

²⁴Pharhe re wọ sa ro anurhoro ọhwahwa na; kidie buebu, me ta kẹ wẹ, re cha guọnọ ro yẹ ayen sa ruọ-ọ.

²⁵Ọke rẹ onini na de vrẹn siẹvuọvo rọ da kanre ẹchẹ, ku we mudia vwẹ obo otafe de hworo ẹchẹ, tanẹ, Ọrovwohwo, rhie ẹchẹ kẹ avwanre. Kọ kpahe kẹ wẹ, Me riẹn asan wo nurhe-e.

²⁶Etiyin ku wo che muhọ ẹta, Avwanre rere avwanre dare vwẹ irharo wẹn, wo ji yono vwẹ irhuvwu rẹ avwanre.

²⁷Ẹkẹvuọvo ko ta, Me ta kẹ wẹ, Me riẹn asan wo nurhe-e; bi nẹ uvwe oma, ovwan ihwo ejobi ri ruẹ orukuruku.

²⁸Kẹ etiyin wọ da viẹ wọ da reako wẹn, vwẹ ọke wọ da mrẹ Ebraham kugbe Aizik kugbe Jekọp kugbe emraro na ejobi vwẹ uvie rẹ Ọghẹnẹ ra da djẹ ekpuyovwi rẹ ovwan ro otafe.

²⁹Ihwo ki nẹ obaro ọnre rhe vẹ obuko ọnre te obọhwẹre ọnre te obọrhe ọnre, ki che tidia vwẹ udoemu vwẹ uvie rẹ Ọghẹnẹ.

³⁰Nighe, ihwo re ka uko cha karo, e re karo cha ka uko.

³¹Vwẹ unọke yena dẹn na Farisi ẹvo da rhe, e da ta kẹ, Yanran nẹ etinẹ, kidie Herọd che hwe we.

³²Ọ da at kẹ ayen, Yanran ra ta kẹ urhirako yena, Nighe, me djẹ idẹbono mi sivwẹ nonẹ kugbe odẹ rọ cha, ẹdẹ rerha yẹ iruo mẹ reri.

³³Dede na mi kpo obo me ra nonẹ kugbe odẹ rọ cha kugbe ẹdẹ rọ kpaherọ; kidie a sa ta nẹ ọmraro ghwu nẹ Jerusalẹmu-u.

³⁴E Jerusalẹm, Jerusalẹm, ro hwe emraro na ro phiẹ ihwo re ji bru we rhe hwe! Bro ọke me ghwẹ emọ rẹ ovwan koko te kerẹ ọhọ rọ vwẹ ibekpe rhurhu emọ rọye, yẹ ovwan kerhọ-ọn.

³⁵Nighe, a sen uwevwi rẹ ovwan. Me ta kẹ wẹ, wọ gbe cha mrẹ vwẹ-ẹ bẹsiẹ wọ vwọ ta, Ebruba kẹ ọ rọ cha vwẹ odẹ rẹ Ọrovwohwo na.