Read urhobo Luk 14 Bible Online

Luk 14 - urhobo bible

Luk 14

¹Vwẹ ẹdidjala ro vwo kpo uwevwi rẹ osun ri Farisi ọvo ra re emu, ayen ke rhẹrẹ.

²Nighe, ohwo ọvo hẹ etiyin ro she enwẹnwẹ.

³Jesu da ta ota kẹ eriẹn urhi kugbe Farisi, tanẹ, O fori re vwo sivwi vwẹ ẹdidjala, eyẹ ẹjo?

⁴Ẹkẹvuọvo ayen de fotovwi. Etiyin ọ da reyọ o de sivwo, o de siobọ no kpo.

⁵Ọ da ta kẹ ayen, Ono vwẹ usun rẹ ovwan na, ro vwo ekẹtẹkẹtẹ eyẹ erhuẹn ro she phihọ orhare, ro je siono kpatakpata vwẹ ẹdidjala?

⁶Ayen gbe sa kpahe phihọ ọnana-a.

⁷Asakiephana o de kpe itẹ ayen otu re seri, rọ vwọ mrẹ obo re ayen sanọ asan ro vwo ọghọ, o da ta kẹ ayen,

⁸Ọke re de se ọvo vwẹ usun rẹ ovwan kpo orẹ rẹ ọpha, wo tidia asan ro vwo ọghọ-ọ, siẹvo yo ji se ohwo ọfa rọ rhonọ owẹ;

⁹ọ ro se ovwan ivẹ na kọ rhe, ọ me ta kẹ wẹ, Vwẹ asan kẹ ohwo nana, wọ vẹ omaẹvuọ ko re tidia asan ro kpotọ.

¹⁰Ẹkẹvuọvo e de se we, yanran re tidia asan ro kpotọ, rere siẹ rẹ ohwo ru wo wori na da rhe kọ ta kẹ owẹ, Oko, yanran kpo obo ro kpenu; etiyin re ku wo vwo ọghọ vwẹ obaro rẹ ayen ejobi re vẹ owẹ gbe tidia imẹjẹ na.

¹¹Kidie kohwo kohwo ro mu oma kpenu ka phọphọ, ohwo ro mu ọghọ kẹ oma ka kparọ kpenu.

¹²Ọ da rhoma ta kẹ ohwo ro sere na, Ọke wo de chere emu kẹ ihwo eyẹ okpọre, wo se igbeyan eyẹ e re dia kẹre owẹ-ẹ, siẹvo ayen da rhoma se wẹ, ya hwa osa kẹ wẹ nure.

¹³Ẹkẹvuọvo wẹ da re orẹ, se ivwiogbere, ikruabọ, ikpono, irhuẹro,

¹⁴ke bruba kẹ wẹn, fikiridie ayen sa hwa osa kẹ wẹ-ẹ. A cha rhoma hwa osa kẹ wẹ vwẹ evrenushi rẹ evwata na.

¹⁵Ọke rẹ ọvo vwẹ usun rẹ otu re vẹ ọye gbe tidia imẹjẹ na vwo nyo Ọnana, ọ da ta kẹ, Ebruba kẹ ohwo rọ cha re emu vwẹ uvie rẹ Ọghẹnẹ na.

¹⁶Ẹkẹvuọvo ọ da ta kẹ, Ohwo ọvo de vwo okpọre, o de se ihwo buebu;

¹⁷ọke rẹ okpọre na vwo te, o de ji idibo rọye bru ihwo ro seri jovwo na nẹ, A mọ; kidie emu ejobi gbare.

¹⁸Ẹkẹvuọvo ihwo na ejobi ki vwerhe oma. Ọ rẹsosuọ da ta kẹ, Me dẹ udju, me ra re me ra mrẹ tavwe; biko, fa vwẹ.

¹⁹Ọfa da ta, Me dẹ ekru rẹ irhuẹn iyori, Me yanran re ni ayen tavwe; biko, fa vwẹ.

²⁰Ọfa da rha ta, E sun aye rhe vwe, vwẹ ọtiọye na me sa rhe-e.

²¹Ọtiọye na odibo na da rhe rhe nẹ iyẹnrẹ kẹ onini rọye. Etiyin ọ ro vwo uwevwi na da vwẹ ivuemiovwo ta kẹ odibo rọye, yanran jọphẹre ro irhuvwu na kugbe idjerhe rẹ orere na, ru wo se ivwiogbere, ikruabọ kugbe irhuẹro kugbe ikpono.

²²Odibo na da ta, Ọrovwovwe, obo wọ tare na e ruro gba, yẹ ẹdia je jerọ.

²³Onini na da ta kẹ odibo na, yanran kpo idjerhe ride na vẹ otọ rẹ irhe na, re wọ gba ayen rhe, rere uwevwi mẹ vwọ vọn.

²⁴Kidie me ta kẹ wẹ, ọvuọvo rẹ otu ri mi seri jovwo na gbe cha re okpọre mẹ na ọfa-a.

²⁵Asakiephana urogho rode de nene; ọ rhẹriẹ oma ọ da ta kẹ ayen,

²⁶Ọ da dianẹ ohwo bru uvwe rhe ro sa sen ọsẹ robọ rọye kugbe oni kugbe aye kugbe emọ kugbe iniọvo rẹ eshare vẹ emetẹ-ẹ, tobọ arhọ rọye dede-e, ọ sa dia odibo mẹ-ẹ.

²⁷Kohwo kohwo ro rhe mu agbagba rọye ro de nene uvwe-e, ọ sa dia odibo mẹ-ẹ.

²⁸Kidie ono vwẹ usun rẹ ovwan, rọ guọnọ bọn ohẹrhẹ, ro de je tidia te otọ roro unu ro muru, so se vwo obo ro te vwo ruo gba?

²⁹Ọ gbe dia ọtiọye-e, ọke ro de mu uchivwo rọye vi nu, rọ gbe sa bọn re-e, ihwo re mrẹrẹ ejobi ke vwọ jehwẹ,

³⁰tanẹ, Ohwo nana mu ẹbọn phihọ ọ gbe sa bọn re-e.

³¹Eyẹ didi ovie, re cha kpare ofovwi vwọ so ovie ọfa, ro de je roro tavwe sẹ udu rẹ uriori ihwe sa gba ọ ro vwo uriori uje?

³²Ọ gbe dia eriyi-in, ọke rẹ ọ ro chekọ vwọ hẹ ogboko ye, ko ji ikọn ra guọnọ arhuẹrẹ.

³³Vwẹ ọtiọye na, kohwo kohwo rọ rha sen emu kemu ro vwori-i ọ sa dia odibo mẹ-ẹ.

³⁴Ughweraka yoma; ẹkẹvuọvo ughweraka de ku avwerhe rọye kufia, kidie e vwo ruo vwerhe?

³⁵O gbi fo kẹ otọ eyẹ erhurhu-u; ihwo ki kuo fia. Ọ ro vwo erhọn ro vwo nyo, e jo nyo.