Read urhobo Luk 16 Bible Online

Luk 16 - urhobo bible

Luk 16

¹Ọ da je ta kẹ idibo rọye, Ọdafe ọvo de vwo odibo ọvo, re mu rhe nẹ ọ rhaphiẹ ekuakua rọye.

²O de se ọ da ta kẹ, Didi ota mi nyo kpahe owẹ na? Gbe mo kere ekuakua ra vwọ kẹ wẹ yọnre na, kidie wọ gbe sa dia odibo mẹ ọfa-a.

³Odibo na da ta kẹ oma rọye, Kidie mi che ru, rẹ onini mẹ che vwo si vwe nẹ iruo mẹ na? Mi vwo ogangan mi vwo voro-o, yẹ omaẹvuọ che ju vwe ro ada ra yare-e.

⁴Me riẹn obo ri mi ru, rere ọke re de si vwe nẹ iruo me vwọ mrẹ ihwo ri se vwe kpo uwevwi rayen?

⁵Ọtiọye na, ro vwo se ihwo re re osa na ọvuọvo, ọ da ta kẹ ọ rẹsosuọ, Bro osa rẹ onini mẹ wọ rere?

⁶Ọ da ta nẹ, igogono rẹ evwri ujori. Ọ da ta ke, Reyọ ọbe wẹ rhe, tidia jọphẹre re wo si ujuvẹ gbe ihwe.

⁷Etiyin ọ da ta kẹ ọfa, ki bro wọ rere? Ọ da ta, ebo rẹ eka ujori. Ọ da ta, Reyọ ọbe wẹ rhe, re wo si ujọne.

⁸Onini na de jiri odibo umwemwu na fiki rẹ aghwanre rọye; kidie emọ rẹ akpọ nana vwẹ evun rẹ uvwiẹ rayen ghwanre nọ emọ rẹ urhukpẹ na.

⁹Me ta kẹ ovwan, we mu ugbeyan rẹ ẹro hrehre rẹ efe rẹ okpakpa na, rere o de ku we rhire ayen mrasan reyọ owẹ kpo ighẹn ri bẹdẹ.

¹⁰Ohwo rọ dia ọvwata vwe ẹmu otete, ọye je dia ọvwata vwẹ emu rode; ohwo rọ brare vwẹ emu otete, ọye je bra vwẹ emu rode.

¹¹Wọ rha ka dia ọvwata vwẹ efe rẹ ẹro hrehre na-a, kono sa vwẹ omamọ rẹ efe na kẹ wẹ yọnre?

¹²Wọ rha sa dia ọvwata vwẹ emu rẹ ohwo ọfa-a, kono sa vwẹ ọ robo wẹn kẹ wẹ?

¹³Odibo ọvuọvo sa ga inini ivẹ-ẹ; ivun rẹ ọvo che miovwo ivun rẹ ọrivẹ cha vwerhọ, o che si kere ọvo o mi rhe sheri kẹ ọrivẹ. Ovwan sa ga Ọghẹnẹ vẹ ẹdjọ kugbe-e.

¹⁴Farisi ri vwo ubiupho rẹ igho na, de nyo ọnana ejobi, ayen da vwọ jehwẹ.

¹⁵Ẹkẹvuọvo ọ da ta kẹ ayen, Ovwan hẹ ihwo ri brorhiẹ kẹ oma rẹ ayen vwẹ obaro rẹ ihwo, ẹkẹvuọvo Ọghẹnẹ riẹn udu rẹ ovwan; kidie obo rẹ ihwo kpara kpenu yẹ ẹgua vwẹ obaro rẹ Ọghẹnẹ.

¹⁶Urhi na vẹ emraro na herọ bẹsiẹ ro ki rhi te Jọn; nẹ ọke yena rhe na e vwo ghwoghwo ikun rẹ iyenre esiri rẹ uvie rẹ Ọghẹnẹ na, kohwo kohwo ke de vwẹ ozighi họrhọ ruọ.

¹⁷Ẹkẹvuọvo ọ pha phẹphẹre kẹ odjuvwu vẹ akpọ rọ vwọ wan, vwọ nọ umuku rẹ urhi na rọ vwọ dia odiodi.

¹⁸Kohwo kohwo ro siobọ nẹ aye rọye rọ da reyọ ọfa yo gbe igberadja, ohwo rọ rha reyọ aye rẹ ọshare siobọ nu yo gbe igberadja.

¹⁹Ọdafe ọvo herọ, ro rhuo ifenudu kugbe esada iyoyovwi rọ ria okpọre kẹdẹ kẹdẹ.

²⁰Ovwiogbere ọvo re se Lazarọs, ro mwa era ko tidia anurhoro rọye.

²¹kọ guọnọ nẹ ọye re ehahe rẹ emu ri she nẹ imẹjẹ rẹ ọdafe na rhe; marho eranko me rhe rarọ era rọye.

²²Ovwiogbere na de ghwu emakashe de muo kpo agada rẹ Ebraham. Ọdafe na de ji ghwu rhe e de sho;

²³vwẹ obo Erivwi, rọ vwọ mrẹ odjadja re, ọ da kpare opharo kpenu, ọ da mrẹ Ebraham vwẹ ogboko kugbe Lazarọs vwẹ agada rọye.

²⁴Ọ de se, Ọsẹ, Ebraham, ni arodọvwẹ mẹ re wo ji Lazarọs ro duvwu ẹroro rẹ urhiabọ rọye phihọ ame ro suo re ẹrenvwe mẹ re oma djiro uvwe; kidie oma gidi uvwe vwẹ erhanre nana.

²⁵Ẹkẹvuọvo Ebraham da ta, Mọmẹ, karohọ nẹ vwẹ ọke ru wọ vwọ hẹ obo akpọ wo vwo emu esiri buebu, eriyin rhe Lazarọs je mrẹ ẹnso buebu; ẹkẹvuọvo Asakiephana ọ hẹ ofuvwegbe vwẹ obonẹ, yo wẹ hẹ ogidi.

²⁶Vwọ ba enana ejobi, uvwre rẹ avwanre vẹ owẹ na iyara rode herọ, rere otu rẹ wan nẹ obonẹ yanran vwo jẹ sa wan, yẹ ohwo sa samu nẹ oboyi bru avwanre-e.

²⁷Ọ da ta, Etiyin na me rẹ wẹ, ọsẹ, re wo jo kpo uwevwi rẹ ọsẹ mẹ,

²⁸kidie mi vwo iniovo iyori, rere ọ ra vuẹ ayen, ayen da rha rhe asan odjadja nana.

²⁹Ẹkẹvuọvo Ebraham da ta, Ayen vwo Mosis kugbe emraro na; jẹn ayen nyo ayen.

³⁰Ọ da ta Ẹjo, ọsẹ Ebraham; ẹkẹvuọvo ọ da dianẹ ohwo ọvo nẹ erivwi ra, ayen ki kurhẹriẹ.

³¹Ọ da ta kẹ, Ọ da dianẹ ayen gbi nyo Mosis kugbe emraro na-a, o che se mu ayen ẹro-o ọ da dianẹ ohwo ọvo vrẹn nẹ erivwi ra.