Read urhobo Luk 17 Bible Online

Luk 17 - urhobo bible

Luk 17

¹Etiyin ọ da ta kẹ idibo rọye, Omuẹro nẹ ọdavwini rọ nẹrhẹ e ru umwemwu che jẹ cha-a; ẹkẹvuọvo ekan kẹ ohwo rọ wan obọ rọye rhe.

²Manẹ e yovwi kẹ ohwo yena re o churu oragha mu ohọre re o re divwi ghwu vwẹ evun rẹ abadi, nọ rọ da nẹrhẹ ọvo vwẹ usun rẹ imitete na ro de ru umwemwu.

³Wa kẹnoma rẹ ovwan; ọ dianẹ omoni wẹn ru umwemwu, ghwọ kuo, o de ku rhẹriẹ, vwo ghovwo;

⁴o de ru umwemwu kpahe owẹ asieghwrẹ ẹdọke, ọ da ta, Mi kurhẹriẹ, wo mi vwo ghovwo.

⁵Iyinkọn na da ta kẹ Ọrovwohwo, Ru esegbuyota rẹ avwanre bu!

⁶Ọrovwohwo da ta, ọ dianẹ wo vwo esegbuyota kerẹ ubi rẹ uyerhie, ku wọ sa ta kẹ urhe ri sikamọ nana nẹ, Ghwie nẹ ne otọ, re wo re mudia vwẹ evun rẹ abadi, ko sa vwẹ ọghọ kẹ wẹ.

⁷Ono vwẹ usun rẹ ovwan na, ro vwo odibo ro kpo ivoro eyẹ ro churu igodẹ, rọ da ta kẹ vwẹ ọke rọ de nẹ aghwa rhe nẹ, Mọ wọ re emu?

⁸Ọ dianẹ o ta kẹ, Chere emu rẹ ovwọnvwọn kẹ vwẹ, chobiẹ amwa wẹn wo mu emu kẹ vwẹ, bẹsiẹ me vwọ re nu me vwọ da nu; wo de ru nu wo ke re wọ ke da?

⁹Kọ kpẹvwẹ odibo na fikiridie o ru obo re ji iji kẹ?

¹⁰Ọtiọye rhe, vwẹ ọke wo de ru obo re ji iji kẹ wẹ nu, kọ ta, Avwanre idibo ri fi emuọvo-o; avwanre di ru ẹkẹn iruo ro te avwanre.

¹¹Rọ vwọ hẹ idjerhe kpọ Jerusalẹm kọ wan uvwre ri Sameria vẹ Galili vrẹn.

¹²Rọ vwọ vwẹriẹ ọko ọvo, ehọnvwoti ihwe da vwa, ri mudia tephe.

¹³e kpare urhuru e da ta, Jesu, Onini, ni arodọvwẹ rẹ avwanre.

¹⁴Ọke rọ vwọ mrẹ ayen ọ da ta kẹ ayen, yanran wa ra vwẹ oma nẹ irherẹn. Rẹ ayen vwọ yanran re ayen da ghwa fon.

¹⁵Etiyin ọvo vwẹ usun rẹ ayen, rọ vwọ mrẹ nẹ o sivwi ọye, o de rhivwi jiri Ọghẹnẹ vẹ urhuru ọgangan;

¹⁶o de she bọvwọn opharo rhuotọ vwẹ awọ ri Jesu, rọ kpẹvwẹ. Asakiephana ohwo na kẹ ohwo ri Sameria.

¹⁷Etiyin Jesu da ta, Ọ dia ihwe e sivwiri? Kẹ irhiri na rhọ?

¹⁸A gbe mrẹ ọvuọvo ro rhivwi rhe rhe vwẹ ejiro kẹ Ọghẹnẹ jokpa rẹ ọrhorha nana-a?

¹⁹Ọ da ta kẹ, Vrẹn kpo obo wọ ra; esegbuyota wẹn nẹrhẹ oma wẹ kpo.

²⁰Rẹ Farisi vwọ nọ nẹ ọkevọ uvie rẹ Ọghẹnẹ vwọ rhe, ọ da kpahe kẹ ayen, Uvie rẹ Ọghẹnẹ na cha rhe vẹ oka re che se vughee;

²¹eyẹ kẹ ayen cha ta, Nighe, ọna! eyẹ Etiyin i kidie nighe, uvie rẹ Ọghẹnẹ na ọ hẹ ohri rẹ ovwan.

²²Ọ da ta kẹ idibo rọye, Ẹdẹ cha rẹ ovwan cha vwọ guọnọ ẹdẹ ọvo rẹ Ọmọ rẹ ohwo na mrẹ, yẹ ovwan cha sa mrẹ-ẹ.

²³Ayen ke cha ta ke ovwan, Nighe, etiyin! eyẹ Nighe, etinẹ ! Wọ ra-a, wo nene aye-en.

²⁴Kirobo rẹ enu nyavwaro rọ da la mu obenu nẹ abọ ọvo re te ọrivẹ na, ọtiọye Ọmọ rẹ ohwo cha dia vwẹ ẹdẹ rọye.

²⁵Ẹkẹvuọvo ẹsosuọ na ọ ka cha re oja rẹ emu buebu tavwe uvwiẹ nana kọ cha siọn.

²⁶Kirobo rọ epha vwẹ ọke ri Noa, ọtiọye ọ je cha dia vwẹ ọke rọ Ọmọ rọ ohwo.

²⁷Ayen ria, ayen da, ayen rọvwọ, ayen vwo kpo orọvwe, bẹsiẹ ro rhi vwo te ọke ri Noa rhe vwọ ro okọ, oghwe na da rhe rhe ghwọrọ ayen ejobi.

²⁸Ọ je họhọ obo rọ epha vwọ ọke ri Lọt — ayen ria, ayen da, ayen shẹ, ayen dẹ, ayen kọn, ayen bọn,

²⁹ẹkẹvuọvo ẹdẹ ri Lọt ghwe vrẹn nẹ Sodọm, erhanre vẹ ibioso rẹ erhanre da rhọ nẹ odjuvwu rhe rhe ghwọrọ ayen ejobi —

³⁰ọtiọye ọ je cha dia vwọ ẹdẹ ra da cha vwọ Ọmọ rọ ohwo phia.

³¹Vwọ ẹdẹ yena, e jẹn ohwo rọ họ okpo rọ uwevwi, rọ ekuakua rọye da họ evun rọ uwevwi, wotọ cha cha kua ayen no-o; e jẹn ohwo rọ họ obo udju rhivwi cha-a.

³²Karohọ aye ri Lọt.

³³Kohwo kohwo rọ guọnọ arhọ rọye sivwi ko kuofia, ẹkẹvuọvo kohwo kohwo ro ku arhọ rọye fia ko sivwo.

³⁴Me ta kọ ovwan, vwọ ason yena eshare ivẹ cha dia ehwa ọvo; a cha reyọ ọvo re de jọ ọvo vwo.

³⁵Eya ivẹ che wuye vwọ asan ọvo; a cha reyọ ọvo re de jẹ ọvo vwo.

³⁶Eshare ivẹ che kpo udju, a cha reyọ ọvo re de je ọvo vwo.

³⁷Ayen da ra kẹ, Tivọ vwo Ọrovwohwo? Ọ da ta kẹ ayen, Asan rẹ orivwi epha, etiyin ekana da ghwẹ koko.