Read urhobo Luk 18 Bible Online

Luk 18 - urhobo bible

Luk 18

¹Ọ de kpe itẹ ọvo kẹ ayen nẹ, ọtiọna ovwan nẹ ẹrhovwo kọke kọke e jọ bẹn ovwa-an.

²Ọ da ta, Vwẹ orere ọvo oguẹdjọ ọvo da herọ rọ djẹ oshọ rẹ Ọghẹnẹ-ẹ eyẹ ro se ohwo gbe emuọvo-o;

³ayeuku ọvo je hẹ orere na ro bro cha kọke kọke ọ me ta, chọ oja rẹ ukọn ro gbe kpahe ovwẹ na kẹ vwẹ.

⁴Kidie vwẹ ọmọke ọ da sen; ẹkẹvuọvo vwẹ ukuko rọye ọ da ta kẹ oma rọye, Dede na nẹ me djẹ oshọ rẹ Ọghẹnẹ-ẹ eyẹ se ohwo gbe emuọvo-o na,

⁵yẹ ukpokpogho rẹ ayeuku nana gan nọ kẹ vwẹ, me chọ oja rọye, eyẹ ofu rẹ ẹcha rọye kọke kọke na che dje vwe hwe.

⁶Ọrovwohwo da ta, Nyo obọ rẹ oguẹdjọ umwemwu na tare.

⁷Kẹ Ọghẹnẹ rha chọ oja rẹ Ihwo rọ sanọ reyọ, ri kperẹ se te ason te uvo-o? Ko gbe eghẹrẹ vwẹ enu rọ ayen?

⁸Me ta kọ ovwan, ọ cha chọ oja rọ ayen kpata kpata. Ẹkẹvuọvo ọke rẹ Ọmọ rẹ ohwo da rhe, kọ sa mrẹ esegbuyota vwẹ akpọ?

⁹O de ji kpe itẹ nana kẹ ẹvo re vwẹ ẹro so omaobọ rẹ ayen nẹ ayen ma dia ọvwata kẹ ayen jẹ ihwo efa fia.

¹⁰Eshare ivẹ de kpo uwevwi rẹ ẹga ra nẹ ẹrhovwo, ọvo Farisi ọ ro chekọ kẹ omiarhọghọ.

¹¹Farisi na vrẹn mudia ọ da nẹ ẹrhovwo enẹ kẹ oma rọye, Ọghẹnẹ, me kpẹvwẹ owẹ nẹ me họhọ ihwo efa-a, re ghwa ihwo ria, ifuevu-u, igberadja, eyẹ tobọ họhọ omiarhọghọ nana.

¹²Mi chirẹ owẹvwe asiava vwẹ ẹdidjala, me hwa ẹkẹn ehwe rẹ obo ri mi vwori ejobi.

¹³Ẹkẹvuọvo omiarhọghọ na, de mudia tephe, o gbi yivwi kpare opharo kpenu-u, ẹkẹvuọvo ọ da vwẹ abọ ghwiẹ udu, tanẹ, Ọghẹnẹ ni arodọvwẹ mẹ oruimwemwu!

¹⁴Me ta kẹ wẹ, ohwo na re ase kpo uwevwi rọye nọ ọ ro chekọ na; kidie kohwo kohwo ro mu oma rọye kpenu ke vwo kpotọ, ẹkẹvuọvo ọ rọ vwẹ oma rọye kpotọ ke vwo kpenu.

¹⁵Asakiephana kẹ ayen muẹ emọboba rhe rere ọ vwẹ obọ te ayen; rẹ idibo na vwọ mrẹ, ke ghwọ kuẹ ayen.

¹⁶Ẹkẹvuọvo Jesu de se ayen bro rhe, tanẹ, Jẹn imitete na bru vwe rhe a da ayen jẹ-ẹ; kidie oghẹre ọtiọnana hẹ uvie rẹ Ọghẹnẹ.

¹⁷Uyota, me ta kẹ ovwan, kohwo kohwo rọ reyọ uvie rẹ Ọghẹnẹ kerẹ omotete-e ọ sa ruọ-ọ.

¹⁸Osun ọvo da nọ, Oyono rẹ esiri, die mi ru me vwọ reuku rẹ arhọ ri bẹdẹ na?

¹⁹Jesu da ta kẹ, Die wo vwo se vwe ọ rẹ esiri? Ohwo esiri ọvuọvo herọ-ọ jokpa rẹ Ọghẹnẹ ọvo.

²⁰Wọ riẹn irhi na: Wo gbe igberadja-a, Wo hwe ohwo-o, Wo cho uji-i, Wo se iseri rẹ eku-u, mu ọghọ kẹ ọsẹ wẹn vẹ oni wẹn.

²¹Ọ da ta, Me yọnre enana ejobi nẹ ọke-emọ mẹ rhe.

²²Ọke ri Jesu vwo nyo, ọ da ta kẹ, Emu ọvo je kanre owẹ. Shẹ obo wo vwori ejobi re wọ ghare ayen kẹ ivwiogbere, ku wo vwo efe vwẹ obo odjuvwu; re wọ rhe, ri nene uvwe.

²³Ẹkẹvuọvo ọke ro vwo nyo ọnana o de muomahọ, kidie o feri gangan.

²⁴Ri Jesu vwo no ọ da ta, Mavọ ọ gan te kẹ otu ri feri re vwọ ro uvie rẹ Ọghẹnẹ!

²⁵Kidie ọ lọhọ kẹ erhuẹn rọ vwọ wan unu rẹ ukoti vrẹn nọ ọdafe rọ vwọ ro uvie rẹ Ọghẹnẹ.

²⁶otu ri nyoro da ta, ọtiọye na kono re sa rhọ?

²⁷Ẹkẹvuọvo ọ da ta, obo re bẹn kẹ ohwo ọ bẹn kẹ Ọghẹnẹ-ẹ.

²⁸Pita da ta, Nighe, avwanre yan je iwevwi rẹ avwanre vwo vwo nene uwe re.

²⁹Ọ da ta kẹ ayen, Uyota me ta kẹ ovwan, o vwo ohwo rọ yan jẹ uwevwi vwo eyẹ aye eyẹ iniọvo eyẹ esẹ vẹ ini eyẹ emọ, fiki rẹ uvie rẹ Ọghẹnẹ na,

³⁰ro je vwo kpahe vwẹ ọke nana, vwẹ akpọ rọ cha arhọ ri bẹdẹ.

³¹Rọ vwọ reyọ ihwivẹ na, ọ da ta kẹ ayen, Nighe, avwanre kpo Jerusalẹm re, kemu kemu ejobi rẹ emraro na si kpahe Ọmọ rẹ ohwo i che ru gba.

³²Kidie e che muo rhe Keferi, ka vwọ jehwẹ ka phọphọ ke dje enya kuo;

³³ka vwẹ ugbudia fa ke hwe ghwu, vwe ẹdẹ rerha kọ vrẹn.

³⁴Ẹkẹvuọvo imu nana ro aye-en, e si eta nana nu kẹ ayen, ayen gbe sa yọnre obo rọ tare-e.

³⁵Ro rhi vwo si kẹre Jeriko, orhuẹro ọvo tidia vwẹ orhoma rẹ idjerhe rọ yara;

³⁶ro vwo nyo umri rẹ urogho re lọrọ wan, ọ da nọ nẹ ọna kidie.

³⁷Ayen da ta kẹ, Jesu ri Nazarẹt re wanvrẹn.

³⁸Ọ de kperi, Jesu, Ọmọ ri Devid, ni arodọvwẹ mẹ!

³⁹Ayen otu re hẹ obaro da ghwọ kuo, nẹ o rhurhu unu; ẹkẹvuọvo ọ da rhoma kperi gan nọ ọtiọye, Ọmọ ri Devid, ni arodọvwẹ mẹ!

⁴⁰Jesu de mudia, ọ da ta nẹ a reyọ rhe; ro vwo si kẹrẹ, ọ da nọ,

⁴¹Die wọ guọnọre ni mi ru kẹ wẹ? Ọ da ta, Ọrovwohwo, jẹn uvwe mrẹ orẹ.

⁴²Jesu da ta kẹ, Mrẹ orẹ; esegbuyota wẹn nẹrhẹ oma wẹ gan.

⁴³Siẹvuọvo na ọ da ghwa mrẹ orẹ o de nene, ko jiri Ọghẹnẹ; rẹ ihwo na ejobi, vwọ mrẹ, ayen de jiri Ọghẹnẹ.