Read urhobo Luk 19 Bible Online

Luk 19 - urhobo bible

Luk 19

²Ọshare ọvo hẹ etiyin re se Zakiọs; onotu rẹ imiarhọghọ, kẹ ọdafe.

³Ọ da guọnọ Jesu mrẹ rọ riẹn ohwo rọ epha, ẹkẹvuọvo ọ gbe sa mrẹ-ẹ vwi fiki rẹ otu na, fikiridie ọ pha kuankọ.

⁴Ọtiọye na ọ da djẹ ka obaro re yeri urhe ri sikamọ re ọ vwọ sa mrẹ, kidie ọ cha wan idjerhe yena vrẹn.

⁵Ọke ri Jesu rhi vwo te asan na, o de ni enu ọ da ta kẹ, Zakiọs, jọphẹre wo woto rhe; kidie nonẹ na mi che wo uwevwi wẹn.

⁶Ọtiọye o de wotọ rhe okpokpakpa, ọ da reyọ vẹ aghọghọ.

⁷Ọke rẹ ayen vwọ mrẹ ayen ejobi ki guẹ nẹ, Ọ yanran re wo oruimwemwu.

⁸Zakiọs mudia ọ da ta kẹ Ọrovwohwo, Nighe, Ọrovwohwo, abọvo rẹ ekuakua mẹ me vwẹ ayen kẹ ivwiogbere; ọ da dianẹ me rha ghwa ohwo ọvo re, ke me rhan rhivwi ọhwọhwọ ẹne.

⁹Jesu da ta kẹ, Nonẹ na esivwo ro uwevwi nana, kidie ọmọ rẹ Ebraham o ruẹ.

¹⁰Kidie Ọmọ rẹ ohwo rhere rhe guọnọ re o sivwi i ri ghwruru.

¹¹Rẹ ayen vwo nyo imu nana, o de rhe kpe itẹ ọfa, fikiridie o si kẹrẹ Jerusalẹm re, fikiridie ayen roro nẹ uvie rẹ Ọghẹnẹ na cha rhe nanana.

¹²Eriyin na ọ da ta, Okpohwo ọvo de kpo isiorho shesheri ra reyọ ogangan rẹ ovie rere ọ rhivwi rhe.

¹³O se idibo rọye ihwe, ọ da vwẹ ikpaho ihwe vwọ kẹ ayen, ọ da ta kẹ ayen, Wa vwẹ ena cho eki bẹsiẹ me vwọ rhe.

¹⁴Ẹkẹvuọvo ivun rọye gbe vwerhe emotọ na-a ayen de ji ikọn nene, tanẹ, Avwanre gbe guọnọ nẹ ohwo nana re vwẹ enu rẹ avwanre-e.

¹⁵Rọ vwọ dẹ ogangan rẹ ovie na nu, o de rhivwi rhe, o de se idibo rọye, ro kere igho kẹ na, rere ọ riẹn uche erere rẹ ayen mrẹre vwẹ eki ẹchuọ na.

¹⁶Ọ rẹsosuọ de bro rhe tanẹ, Ọrovwohwo, ikpahọ wẹn rhoma mrẹ erere rẹ ikpahọ ihwe ọfa.

¹⁷Ọ da ta kẹ, Wo runọ, odibo rẹ esiri! Fikiridie wọ dia ọvwata vwẹ ememu otete, ku wo che vwo ogangan vwẹ enu rẹ irere ihwe.

¹⁸Ọrivẹ da rhe, tanẹ, Ọrovwohwo, ikpahọ, wẹn rhoma mrẹ ikpahọ iyori ọfa.

¹⁹Ọ da ta kẹ, ku wọ cha re vwẹ enu rẹ irere iyori.

²⁰Etiyin ọfa da rhe, tanẹ, Ọrovwohwo, ikpahọ wẹn na, me vwẹ amwa pharọ mi de sionu;

²¹kidie oshọ wẹ mu vwe, fikiridie wẹ ohwo ro siaro; obo wo phihọ otọ-ọ ọye wọ tọrọ, obo wọ kọnre-e ọye wo vuẹ.

²²Ọ da ta kẹ, obo ri nẹ unu wẹn rhe ọye mi vwo brorhiẹ hwe we wẹ odibo umwemwu na! Wọ riẹnre nẹ mẹvwẹ ohwo ro siaro, rọ tọrọ obo mi phihọ otọ-ọ, ro vuẹ obo Me kọnre-e?

²³Kidie wo gbi phi igho mẹ phihọ ekpo-o, rere ọke me da rhe me reyọ kugbe isuo-o?

²⁴Ọ da ta kẹ otu ri mudia vwẹ etiyin, Reyọ ikpahọ na mie, re wọ vwọ kẹ ọ ro vwo ikpahọ ihwe na.

²⁵(Ayen da ta kẹ, Ọrovwohwo, o vwo ikpahọ ihwe!)

²⁶Me ta kẹ wẹ nẹ, kohwo kohwo ro vwori ọye a vwọ ba kẹ; ẹkẹvuọvo ọ ro vwori-i, emerha ro vwori na ka reyọ mie.

²⁷Ẹkẹvuọvo vwọ kẹ ivwighrẹ mẹ nana, re guọnọre nẹ me ria vwẹ enu rẹ aye-en na, vwẹ ayen rhe etinẹ ra teyọ ayen hwe vwẹ irharo mẹ.

²⁸Ọke ro vwọ ta ọnana nu, ọ da yan hẹ obaro, ro kpo Jerusalẹm.

²⁹Ọke ro rhi vwo si kẹre Bẹtfagi kugbe Bẹtani, vwẹ ugbenu re se Ọlivẹt, o de ji idibo rọye ivẹ,

³⁰tanẹ Yanran kpo ọko ro hirhe aro ku ovwan na, asan wa da ghwa ruọ na wa cha mrẹ upene rẹ ekẹtẹkẹtẹ re churu, rẹ ohwo ji tidia dẹvo-o; rhan re vwo rhe vwe.

³¹Ọ da dianẹ ohwo nọ ovwan nẹ, Die ovwan vwọ rhan? ku wọ ta ọnana, Ọrovwohwo re guọnerọ.

³²Ọtiọye na otu re jiri na yanran ayen da mrẹ kirobo rọ ta kẹ ayen na.

³³Ọke rẹ ayen ghwa vwọ rhan upene rẹ ekẹtẹkẹtẹ na, ihwo ri vworo da ta kẹ ayen, Die wa vwọ rhan upene na?

³⁴Ayen da ta, Ọrovwohwo re guọnerọ.

³⁵Ayen da reyọ vwo rhe Jesu, rẹ ayen vwọ vwẹ iwun rayen vwọ hwa enu rẹ upene na nu ayen de mu Jesu vwo tidia.

³⁶Rọ vwọ gua yanran re, ayen da riẹn iwun rayen vwọ hwa idjerhe.

³⁷Asakiephana ro vwo siẹ kẹrẹ, ọghwrọrọ rẹ Ugbenn rẹ Oliv urogho rẹ idibo na de kuvwie, ke ghọghọ ki jiri Ọghẹnẹ fiki rẹ iruo rẹ ẹgba rọye rẹ ayen mrẹre,

³⁸tanẹ, Ebruba kẹ Ovie rọ cha vwẹ odẹ rẹ Ọrovwohwo! Ufuoma vwẹ odjuvwu urinrin vwẹ asan ro kpenu!

³⁹Ẹvo vwi Farisi na re hẹ usun rẹ urogho na da ta kẹ, Oyono, ghwọ ku idibo wẹn na.

⁴⁰Ọ da kpahe, Me ta kẹ wẹ, enana de rhurhu unu, ibiekpẹn na dẹn che jiri uvwe.

⁴¹Ọke ro rhi vwo si kẹrẹ rọ vwọ mrẹ orere na ọ da viẹ kẹ,

⁴²tanẹ, Mane ku wọ sa riẹn imu re kẹ ufuoma vwenẹ! Ẹkẹvuọvo Asakiephana e si ayen nu kẹ ẹro wẹn.

⁴³Kidie ẹdẹ cha kẹ wẹ, ọke rẹ ivwighrẹ wẹn cha vwọ hwa hẹrhẹ owẹ re da gba riariẹ owẹ, rẹ ayen de ke we họ vwi kabọ kabọ,

⁴⁴ra da vwẹ owẹ ghwiotọ, wẹ kugbe emọ wẹn vwẹ evun wẹn, ayen che ji oragha re mu kpahe ohwohwo vwo vwẹ enu rẹ ọfa-a; fikiridie wọ riẹn ọke ro che vwo te we oma-a.

⁴⁵Ọ ro uwevwi rẹ ẹga na kọ djẹ ayen otu re shẹ,

⁴⁶tanẹ, E siro, Uwevwi mẹ hẹ uwevwi rẹ ẹrhovwo; ẹkẹvuọvo we vwiro ru unu rẹ iji.

⁴⁷Ko yono kẹdẹ kẹdẹ vwẹ uwevwi rẹ ẹga na. Ilori rẹ irherẹn kugbe isiẹbe kugbe ikpihwo rẹ ihwo na da guọnọ obo rẹ ayen vwọ ghwọrọ;

⁴⁸ẹkẹvuọvo ayen mrẹ obo rẹ ayen se ru-u, kidie ihwo na ejobi churu obọ mu ota rọye.