Read urhobo Luk 2 Bible Online

Luk 2 - urhobo bible

Luk 2

¹Vwẹ ọke yena ovie Ọgọstọs Siza de ji urhi nẹ ihwo ejobi ra ghwẹ odẹ phihọ ọbe.

²Ọnana hẹ ihwo rẹsosuọ ra tu keri, vwẹ ọke ri Kuirinọs vwọ hẹ ovie ri Siria.

³Ihwo na ejobi de kpo dohwo dorere rọye ra ghwẹ odẹ phihọ ọbe.

⁴Josẹf de nẹ Nazaret ri Galili rhe, kpo Bẹtlẹhẹm, orere ri Devid, rọ hẹ obi Judia, fikiridie ekpuyovwi rọye ohwo rẹ uwevwi kugbe orua ri Devid,

⁵rere te ọye vẹ Meri rọ saotọ na, ra ghwẹ odẹ phihọ ọbe, yi Meri vẹ evun boroboro vwẹ ọke yena.

⁶Rẹ ayen vwọ hẹ oboyi re, ẹdẹ rẹ uvwiẹ rọye da rhe gba.

⁷O de vwiẹ ọmọshare rẹ ọtuvwie rọye a da vwẹ emwa efuanfon phopho, e de muo phihọ urhuẹ rẹ eranvwe, fikiridie ayen mrẹ uwevwi wo phihọ vwẹ orere na-a.

⁸Ihwo ẹvo herọ vwẹ ubrakpọ yena ri sun igodẹ vwẹ evun rẹ aghwa vwẹ ason yena.

⁹Amakashe rẹ Ọrovwohwo da vwẹ oma phia kẹ ayen, urinrin rẹ Ọrovwohwo de lo riariẹ ayen phihọ, oshọ da vọn ayen oma.

¹⁰Amakashe na da ta kẹ ayen, wa djẹ oshọ-ọ; kidie nighe, me ghwa ikun esiri rẹ aghọghọ rode rhe ovwan ro che bru ihwo ejobi rhe;

¹¹Nonẹ na e vwiẹ Osivwi vwẹ obo orere ri Devid, re se Kristi Ọrovwohwo.

¹²Ọnana kọ dia oka kẹ ovwan; ovwan cha mrẹ ọmọ na ra vwẹ emwa efuanfon phopho re mu shevwerhẹ urhuẹ rẹ eranvwe.

¹³Siẹvuọvo na usun rẹ ihwo rẹ obo odjuvwu kugbe emakashe na ki jiri Ọghẹnẹ tanẹ

¹⁴Urinrin kẹ Ọghẹnẹ ro kpenu, ufuoma kẹ akpọ evun esiri kẹ ihwo ri vwo udu esiri.

¹⁵Ọke re emakashe na vwo kpo obo odjuvwu nu, isuigodẹ na da ta kẹ ohwohwo, E jẹn avwanre kpo Bẹtlẹhẹm ra mrẹ emu nana rọ phiare na, rẹ Ọrovwohwo vwọ phia kẹ avwanre na.

¹⁶Ayen da yanrhe okpokpakpa, ayen da mrẹ Meri kugbe Josẹf, vẹ ọmọ na re mu sherhẹ urhuẹ na.

¹⁷Ọke rẹ ayen vwọ mrẹ nu ayen de ghwoghwo ota ra ta kẹ ayen kpahe ọmọ nana;

¹⁸ikun rẹ isnigodẹ na gberi de gbe ayen ejobi unu.

¹⁹Ẹkẹvuọvo Meri de phi eta nana ra ta kẹ na vwọ hẹ vun.

²⁰Isuigodẹ na de rhivwi kpo, ayen de jiri Ọghẹnẹ fiki rẹ emu rẹ ayen mrẹre kugbe obo rẹ ayen nyori, kirobo ra ta kẹ ayen na.

²¹Ọke rẹ ẹdẹ ẹrenre vwọ gba nu, rẹ ẹdẹ oyanvwe rọye, e de mu odẹ kẹ Jesu, kirobo rẹ emakashe na sere kẹ tavwe ra ke mrevun rọye.

²²Rẹ ọke rẹ ẹdẹ rẹ orufuọn rayen vwo re kirobo rẹ urhi ri Mosis epha, ayen de muo rhe Jerusalẹm re vwọ phia kẹ Ọrovwohwo,

²³(Kirobo re siro phihọ urhi rẹ Ọrovwohwo, kọmọshare kọmọshare rọ bẹrẹ urhoro rẹ oni rọye kọ dia fuanfon kẹ Ọrovwohwo)

²⁴ko ze izobo kirobo re siro phihọ urhi rẹ Ọrovwohwo, inekuku ivẹ eyẹ erurẹ ivẹ.

²⁵Asakiephana ọshare ọvo herọ vwẹ obi Jerusalẹm, re se odẹ rọye Simiọn, ọvwata vẹ ohwo rọ djẹ oshọ rẹ Ọrovwohwo, o ji phiẹrohọ evwiẹ rẹ Osivwi rẹ Izrẹl na, Erhi Ọfuanfon da hẹ oma rọye.

²⁶Erhi Ọfuanfon na da vwọ phia kẹ nẹ o rhie ẹro mrẹ ughwu-u bẹsiẹ rọ vwọ mrẹ Kristi rẹ Ọrovwohwo na.

²⁷Erhi na de muo rhe uwevwi rẹ ẹga vwẹ ọke yena, rẹ oni vẹ ọsẹ ri Jesu vwo mu ọmọ na rhe, re vwo ru kẹ kirobo rẹ urhi wanre,

²⁸o de muo phihọ obọ rọye o de bruba kẹ Ọghẹnẹ ọ da ta,

²⁹Ọrovwohwo, gbe jẹn odibo wẹn kpo vẹ ufuoma, kirobo rẹ ota wẹn epha;

³⁰kidie ẹro mẹ ghine mrẹ esivwo wẹn re

³¹ọ ru wọ rhuẹrẹ phihọ otọ vwẹ irharo rẹ ihwo ejobi,

³²urhukpẹ rọ la kẹ ihwo ri keferi kugbe urinrin rẹ ihwo wẹn Izrẹl.

³³O de gbe ọsẹ vẹ oni rọye unu vwẹ oghẹre rẹ eta ra ra kpahọ;

³⁴Simiọn da nẹ ẹrhovwo kẹ ayen ọ da ta kẹ Meri oni rọye Nighe, ọmọ na vwenẹ e vwiẹrẹ kẹ eshe vẹ evrẹn rẹ ihwo buebu vwẹ Izrẹl, kugbe oka rẹ buebu cha ta ota kpahe

³⁵(nẹ a cha vwẹ ọlọkọ duvwu ubiudu wẹn) rere iroro re djahere vwẹ udu buebu vwọ mrasan phia.

³⁶Aye ọvo herọ Anna ọmraro, ọmọ ri Fanuẹl, ọ rẹ uvwiẹ rẹ Asha; ọ ghworo gangan, ikpe ighwrẹ ọvo ọ vẹ ọshare rọvwọ ba nẹ ọke ro vwo chọghọ rhe,

³⁷kẹ ayeuku ikpe ujọne gbẹ ẹne. Owọ rọye nẹ uwevwi rẹ ẹga na-a, owẹvwe echiro vẹ ẹrhovwo ẹnẹ ọ vwọ ga te ason te uvo.

³⁸Rọ vwọ yanrhe vwẹ ọke yena ọ da kpẹvwẹ Ọghẹnẹ o de gbe ikun rọye kẹ ihwo ejobi ri phiẹrohọ etanhirhe ri Jerusalẹm.

³⁹Rẹ ayen vwo ru emu ejobi gba nu kirobo rẹ urhi rẹ Ọrovwohwo epha, ayen de rhivwi kpo Galili, kpo Nazarẹt, orere robọ rayen.

⁴⁰Ọmọ na da rho vẹ omaẹga, vẹ aghwanre; ẹroesiri rẹ Ọghẹnẹ vẹ ọye da herọ.

⁴¹Asakiephana kukpe kukpe kọye ọsẹ vẹ oni rọye vwo kpo Jerusalẹm vwẹ ọke orẹ rẹ Ewanvrẹn na.

⁴²Ro vwo te ikpe ihwivẹ re, ayen da yanran kirobo rẹ urnemu na epha;

⁴³rẹ orẹ na vwọ ghwiẹ nu, rẹ ayen vwo rhivwi kpo, ayen da yan jẹ Jesu vwo vwi Jerusalẹm. Ọsẹ vẹ oni rọye riẹnre-e,

⁴⁴Ẹkẹvuọvo rẹ ayen vwo roro nẹ ọ hẹ usun, ayen da yan kẹ ọke rhie, ayen ke guọnọ vwẹ obọ rẹ imoni rayen kugbe igbeyan rayen;

⁴⁵Rẹ ayen gbe mrẹ-ẹ, ayen de rhivwi kpo Jerusalẹm, ra guọnọ.

⁴⁶Ẹdẹ erha vwọ wan nu ayen da mrẹ vwẹ uwevwi rẹ ẹga na, ro tidia vwẹ ohri rẹ iyono na, ọ kerhọn rẹ ayen ọ je nọ ayen enanọ;

⁴⁷ihwo ri nyoro ejobi o de gbe ayen unu obo ro vwo ẹruọ te kugbe ekpahọ rọye.

⁴⁸Rẹ ayen vwọ mrẹ o de gbe ayen unu; oni rọye da ta kẹ, Mọmẹ, Die wo vwo ru avwanre ọtiọna? Nighe, me vẹ ọsẹ wẹn guọnọ owẹ bẹn avwanre ra ro ẹnwan fiki wẹn.

⁴⁹Ọ da ta kẹ ayen, Mavọ ovwan vwọ guọnọ ovwẹ? Wa gbe riẹn nẹ me dia uwevwi rẹ ọsẹ mẹ?

⁵⁰Ayen gbe riẹn otọ rẹ eta ra ta kẹ ayen na-a.

⁵¹Ọ vẹ ayen da yanran kpo Nazarẹt, ọ da vwẹ oma kpotọ kẹ ayen; oni rọye de phi eta nana vwọ hẹ evun.

⁵²Jesu da rhe vọn vẹ aghwanre, ọ da rho ugboma, o de vwo ẹroesiri vwẹ obọ rẹ Ọghẹnẹ vẹ obọ rẹ ihwo.