Read urhobo Luk 20 Bible Online

Luk 20 - urhobo bible

Luk 20

¹Ẹdẹ ọvo re, ro vwo yono ihwo na vwẹ uwevwi rẹ ẹga na ro vwo ghwoghwo iyenrẹ esiri na, ilori rẹ irherẹn kugbe isiẹbe vẹ ekpako na de bro rhe

²ayen da ta kẹ, Ta ke avwanre ogangan rẹ ono wo vwo ruẹ imu na, eyẹ ono re kẹ wẹ ogangan nana.

³Ọ da kpahe kẹ ayen, Me je nọ ovwan enanọ tavwe, Asakiephana gba ta kẹ vwẹ,

⁴Ameẹreyọ ri Jọn odjuvwu o nurhe gbenẹ obọ rẹ ihwo?

⁵Ayen ke ta ota na vwẹ omoma rẹ ayen, tanẹ, Ọ da dianẹ avwanre tare nẹ, Odjuvwu, kọ ta, Kidie we gbi se gbuyota-a?

⁶Ẹkẹvuọvo avwanre da ta, Obo rẹ ihwo, ihwo na ejobi phi avwanre hwe; kidie o mu ayen ejobi ẹro nẹ Jọn ọmraro.

⁷Ọtiọye ayen da kpahe nẹ ayen riẹn asan ro nurhe-e.

⁸Jesu da ta kẹ ayen, Ye me je sa ta kẹ ovwan ogangan ri mi vwo ruẹ imu nana-a.

⁹Ọ de mu itẹ họ ekpe kẹ ihwo nana. Ohwo ọvo da kọn ogba ri vain, ihwo da yarọ mie, o da yanran kpo isiorho krekri.

¹⁰Ọke rẹ ọke vwo te, o de ji odibo rọye bru ihwo na, rere ayen kọrọ ibi ri vain na ẹvo rhe; ẹkẹvuọvo ihwo na de hwe, ayen da djẹ kpo vẹ abọ ofefe.

¹¹O de ji odibo ọfa; ayen de ji hwe ayen da phọphọ, ayen da dje kpo vẹ abọ ofefe.

¹²O de ji ọrerha; ayen da wan ọnana oma ayen de muo kufia.

¹³Etiyin ọ ro vwo ogba ri vain na da ta, Kidie mi ru? Mi ji ọmọ mẹ ro jevwe na; ọkeọvo ayen mi mu ọghọ kẹ.

¹⁴Ẹkẹvuọvo ọke rẹ ihwo na vwọ mrẹ, ayen da ta kẹ omoma rẹ ayen, Ọnana hẹ ọreuku na; e jẹn avwanre hwe ghwu, rere, uku na dia ọ rẹ avwanre.

¹⁵Ayen de phio kufia nẹ ogba ri vain na ayen de hwe ghwu. Kidie ọ ro vwo ogba ri vain na che ru kẹ ayen?

¹⁶Kọ rhe rhe ghwọrọ ihwo yena, kọ vwẹ ogba ri vain na kẹ ihwo efa. Ọke rẹ ayen vwo nyo ọnana, ayen da ta, Ọghẹnẹ gha!

¹⁷Ẹkẹvuọvo o ni ayen ọ da ta, Ọnana re siri na kidie. Oragha na dẹn rẹ edovwọn uwevwi senre na ọ rhoma rhe dia ọ ro vwo uyovwi vwẹ ubienyẹ?

¹⁸Kohwo kohwo ro she teye oragha yena ko vwirhi ibribro; ẹkẹvuọvo o de rhe she nyẹ ohwo kọ guọghọ vworo vworo.

¹⁹Isiẹbe na kugbe ilori rẹ irherẹn na da guọnọ shabọ phihọ vwẹ unọke yena ọvuọvo na, ẹkẹvuọvo oshọ rẹ ihwo na de mu ayen; kidie ayen vwẹ omoma riẹn nẹ o kpe itẹ nana kpahe ayen.

²⁰Ọtiọye na kẹ ayen rhẹrẹ, ayen de ji ọrhẹ, re vwẹ oma nẹ nẹ ayen ihwo rẹ uyota, rere ayen mrasan vwẹ obọ rọ tare yọnrọn, rere ayen vwo muo rhe otu ri vwo ogangan rẹ orhiebro vwẹ otọ rẹ osun na.

²¹Ayen da nọ, Oyono, avwanre riẹnre nẹ wọ ta wo ji yono yoyovwi, wọ ghwẹ oma hẹ abọvo-o, ẹkẹvuọvo wo yono idjerhe rẹ Ọghẹnẹ na vwẹ ọ rẹ uyota.

²²Ọ wan urhi kẹ avawnre re a vwọ hwa osa rẹ uyovwi kẹ Siza, gbenẹ ẹjo?

²³Ẹkẹvuọvo rọ vwọ riẹn ona rayen, ọ da ta kẹ ayen,

²⁴Vwẹ igho nẹ vwẹ. Ono vwo uhoho nana kugbe isiesi re herọ na? Ayen da ta, E rẹ Siza.

²⁵Ọ da ta kẹ ayen, Gba vwẹ ẹkẹn ri Siza kẹ Siza, vwẹ ẹkẹn rẹ Ọghẹnẹ kẹ Ọghẹnẹ.

²⁶Ayen gbe sa vwẹ obọ rọ tare vwẹ irharo rẹ ihwo na vwo muo-o; ẹkẹvuọvo rẹ ẹkpahọ rọye vwo gbe ayen unu ayen de rhurhu unu.

²⁷Etiyin ihwo ri Sadiusi de bro rhe, ayen otu re sian nẹ evrẹnushi herọ-ọ,

²⁸ayen da nọ enanọ, tanẹ, Oyono, Mosis siro kẹ avwanre nẹ oniọvo rẹ ohwo de ghwu, o vwo aye jẹ o vwiẹ emọ-ọ, Oniọvo rọye gba reyọ aye rọye ro vwiẹ emọ kẹ oniọvo rọye.

²⁹Asakiephana iniọvo ighwrẹ herọ; ọ rẹsosuọ da reyọ aye, o de ghwu o vwiẹ emọ-ọ;

³⁰ọrivẹ da rọvwọ;

³¹ọrerha da reyọ, ayen ighwrẹ na ejobi da reyọ ayen vwo emọ-ọ ayen de ghwu.

³²Ukuko rọye aye na de ji ghwu rhe.

³³Vwẹ evrẹnushi na, vwẹ ọtiọye na, kẹ aye rẹ ono aye na cha dia? Kidie ayen ighwrẹ na rọvwerọ gba?

³⁴Jesu da ta kẹ ayen, Emọ rẹ oge nana rọvwọ ayen ji vwo bregọ;

³⁵ẹkẹvuọvo otu re keri ri fori ri che te oge yena kugbe evrẹnushi rẹ ihwo ri ghwuru na e rọvwọ-ọ eyẹ e ji vwo bregọ-ọ,

³⁶Kidie ayen gbi che se ghwu ọfa-a, fikiridie ayen vẹ emakashe na kẹ abavo ayen kẹ emọ rẹ Ọghẹnẹ, ayen kẹ emọ rẹ evrẹnushi.

³⁷Ẹkẹvuọvo nẹ irivwi vrẹn, mrẹmrẹ Mosis vwe rọ phia, vwẹ asan re seri vwẹ oma rẹ aghwa na, asan ro de se Ọrovwohwo Ọghẹnẹ rẹ Ẹbraham Ọghẹnẹ rẹ Aizik Ọghẹnẹ ri Jekọp.

³⁸Asakiephana ọ dia Ọghẹnẹ rẹ ihwo ighweghwu-u, ẹkẹvuọvo ọ rẹ ihwo ekpokpọ; kidie ayen ejobi rhọ vwọ kẹ.

³⁹Ẹvo vwẹ isiẹbe na da kpahe, Oyono, wọ riẹn ta.

⁴⁰Kidie ayen gbi yivwi nọ enanọ ọfa-a.

⁴¹Ẹkẹvuọvo ọ da ta kẹ ayen, Mavọ ayen vwọ sa ta nẹ Kristi ọmọ ri Devid?

⁴²Kidie Devid vẹ ekpuyovwi rọye tare vwẹ Ọbe rẹ Une rẹ Ejiro, Ọrovwohwo ta kẹ Ọrovwovwe, Tidia vwẹ obọrhe mẹ,

⁴³bẹsiẹ me vwọ vwẹ ivwighrẹ wẹn hwaọto kẹ wẹn chiyi.

⁴⁴Devid vwẹ enẹ se Ọrovwohwo; komavọ o ru rha vwọ dia ọmọ rọye?

⁴⁵Vwẹ erhọn rẹ ihwo ejobi na ọ da ta kẹ idibo rọye,

⁴⁶Kẹnoma kẹ isiẹbe na, ri ku edagba igrogro vwọ yan, re guọnọ uyere rẹ afieki kugbe asan ro mẹ yovwi vwi sinagọg kugbe asan ro vwo ọghọ vwẹ asan orẹ,

⁴⁷re ghwọrọ iwevwi rẹ eyauku re vwẹ omeru nẹ ẹrhovwo ogrogro. E che bru hwe ayen rhuarho gangan.