Read urhobo Luk 22 Bible Online

Luk 22 - urhobo bible

Luk 22

¹Asakiephana orẹ rẹ ikara ro jephuo si kẹre re, re se Ewanvrẹn na.

²Ilori rẹ irherẹn kugbe isiẹbe na ke guọnọ obo rẹ ayen ru hwe ghwu; kidie oshọ rẹ ihwo na mu ayen.

³Etiyin Idẹbono da ro evun ri Judas re se Iskariọt, ọvo vwẹ usun rẹ ihwivẹ na;

⁴ọ yanran ọ vẹ ilori rẹ irherẹn kugbe inotu na da ra jẹ iroro obo ro ru sa she vwọ kẹ ayen.

⁵Oma da vwerhe ayen, ayen de ve nẹ ayen kẹ igho.

⁶Ọtiọye ayen da rhọvwe, ọ da guọnọ ọke ro fori rẹ urogho na de jẹ etiyin ẹdia.

⁷Etiyin ẹdẹ rẹ ikara ro jephuo na de rhi te, ẹdẹ rẹ ẹwanvrẹn na re vwo hwe omogodẹ rẹ izobo na.

⁸Ọtiọye na Jesu de ji Pita kugbe Jọn, tanẹ, Yanran ra rhuẹrẹ ẹwanvrẹn kpahe otọ kẹ avwanre, rere avwanre riọ.

⁹Ayen da ta kẹ, Tivọ wọ guọnọre nẹ avwanre da rhuẹrẹ kpahe?

¹⁰Ọ da ta kẹ ayen, Nighe, ọke rẹ ovwan da ro orere na, ọshare ro mu ochẹ rẹ ame cha vwa ovwan; nene kpo uwevwi rọ cha ro,

¹¹gba ta kẹ ohwo ro vwo uwevwi na, Oyono na ta kẹ owẹ, Uvun rẹ ọrhorha rhọ, re me vẹ idibo mẹ da re ẹwanvrẹn na?

¹²Ko che dje uvun rọ hẹ obenu rhuarho kẹ ovwan; kọna wa rhuẹrẹ kpahe.

¹³Ayen da yanran, ayen da mrẹ kirobo rọ ta kẹ ayen na; ayen da rhuẹrẹ ẹwanvrẹn na kpahe.

¹⁴Ọke rẹ unọke na vwo te, o de tidia imẹjẹ, ọ vẹ iyinkọn na.

¹⁵Ọ da ta kẹ ayen, Me guọnọre gangan re me vẹ ovwan re ẹwanvrẹn na re me ke re oja;

¹⁶Kidie me ta kẹ ovwan nẹ me gbe cha riọ ọfa-a bẹsiẹ rọ vwọ gba vwẹ obo uvie rẹ Ọghẹnẹ.

¹⁷Ọ da reyọ uko ọvo, ọke rọ vwọ kpẹvwẹ nu ọ da ta, Reyọ ọnana, re wa gharọ kẹ oma rẹ ovwan;

¹⁸kidie me ta kẹ ovwan nẹ nẹ ọke nana yanran me gbe cha da emamọ ri vain bẹsiẹ rẹ uvie rẹ Ọghẹnẹ vwọ rhe-e.

¹⁹Ọ da reyọ ikara, ọke rọ vwọ kpẹvwẹ nu o de bro ọ da vwọ kẹ ayen, tanẹ, Ọnana oma mẹ.

²⁰Rẹ ayen vwọ re emu rẹ ovwọnvwọn nu, ọ da reyọ uko tanẹ, Uko nana ro hwẹ kẹ ovwan na ọye ọbara rẹ ọphọ ọkpokpọ.

²¹Ẹkẹvuọvo nighe obọ rẹ ohwo rọ cha shẹ vwẹ na vẹ ovwẹ gba ria vwẹ imẹjẹ na.

²²Kidie Ọmọ rẹ ohwo yanran kirobo ra tarọ phihọ otọ; ẹkẹvuọvo ekan kẹ ohwo yena ra wan obọ rọye shẹ!

²³Ayen ohwohwo ke nọ ohwo nẹ, kẹ ọvo vwẹ usun rẹ avwanre ri che ru ọnana.

²⁴Aphro ọvo da rhe dia vwẹ ohri rẹ ayen nẹ, kono vwẹ usun rẹ ayen re ma rho.

²⁵Ọ da ta kẹ ayen, Ovie ri Keferi vwẹ ọrho nyẹ ayen; otu ri vwo ogangan vwẹ enu rẹ ayen ke se ayen iruẹse.

²⁶Ẹkẹvuọvo ọ dia ọtiọye kẹ ovwa-an; kpe rẹ ọtiọye jẹn ohwo rọ ma rho ejobi rhe dia kerẹ omotete ejobi, osun kerẹ ohwo ro gbe odibo.

²⁷Kidie ọrhọ re ma rho, ohwo ro tidia imẹjẹ, eyẹ ọ ro gbe odibo? Ọ dia ọ ro tidia imẹjẹ-ẹ? Ẹkẹvuọvo me hẹ ohri rẹ ovwan kerẹ ohwo ro odibo.

²⁸Ovwan hẹ otu re vẹ ovwẹ gba herọ vwẹ evun rẹ odavwini mẹ;

²⁹kirobo rẹ Ọsẹ mẹ vwẹ uvie mu kẹ vwẹ na, ọtiọye mi ji vwo mu kẹ ovwan.

³⁰rere ovwan re re ovwan ria vwẹ enu rẹ imẹjẹ mẹ vwẹ uvie mẹ, re we tidia ekete mẹ de guẹdjọ rẹ orua ihwivẹ rẹ Izrẹl.

³¹Saimọn, Saimọn, nighe, Idẹbono guọnọ owẹ reyọ, rere o wuye uwe kerẹ ọka,

³²ẹkẹvuọvo me da nẹ ẹrhovwo kẹwẹ rere esegbuyota wẹn vwo je she; ẹkẹvuọvo wo de kurhẹriẹ nu, gbe phi udu vwọ hẹ imoni wẹn awọ.

³³Ọ da ta kẹ, Ọrovwohwo, me choma me vẹ owẹ che vwo kpo uwodi ji kugbe ughwu.

³⁴Ọ da ta, me ta kẹ owẹ, Pita, ọhọ che bo nonẹ na-a, bẹsiẹ wọ ke sen vwẹ asiarha-a.

³⁵Ọ da ta kẹ ayen, Ọke mi vwo ji ovwan yanran dẹvọ rẹ ovwan ghwa ekpo-o eyẹ isabato-o ye emuọvo kanre ovwan? Ayen da ta, Emuọvo-o.

³⁶Ọ da ta kẹ ayen, Ẹkẹvuọvo Asakiephana, jẹn ohwo ro vwo igho reyọ, ọtiọye je hẹ ekpo. Jẹn ohwo ro vwo ọlọkọ-ọ shẹ okpa rọye re ọ dẹ ọvo.

³⁷Kidie me ta kẹ, owẹ nẹ ọbe ọfuanfon nana cha gba vwẹ oma mẹ, E de kere kugbe igburhi; kidie obo re siri kpahe ovwẹ na rhe gbare.

³⁸Ayen da ta, Ọrovwohwo, Ọrovwohwo, ọlọkọ ivẹ na. Ọ da ta kẹ ayen nẹ, O teri.

³⁹Ọ da ro otafe, ọ da yanran, kirobo ro ruẹ jovwo, kpo ugbenu rẹ Oliv; idibo na de nene.

⁴⁰Ọke ro rhi vwo te asan na ọ da ta kẹ ayen, Nẹ ẹrhovwo rere we vwo jẹ odavwini ẹruọ.

⁴¹O de tephe kẹ ayen emerha, o de shiguẹ ọ da nẹ ẹrhovwo,

⁴²Ọsẹ, ọ da dia ẹguọnọ wẹ, gbe jẹ uko nana chọ vwẹ ra; ẹkẹvuọvo ọ dia ẹguọnọ mẹ-ẹ, ẹkẹvuọvo ọwẹn, ọye wo ru.

⁴³Amakashe da vwẹ oma phia kẹ nẹ odjuvwu rhe, rhe vwẹ ogangan kẹ.

⁴⁴Rọ vwọ hẹ evun rẹ uvwerhe na ọ da nẹ ẹrhovwo gangan; ọdja de rhi fio oma ku kporo kporo kerẹ ọbara ro suẹn te otọ prapra.

⁴⁵Ro vwo vrẹn nẹ ẹrhovwo rhe, o de bru idibo na rhe ọ da mrẹ ayen re vwerhẹ fiki rẹ oja,

⁴⁶ọ da ta kẹ ayen, Die wa vwọ vwerhẹ? Vrẹn wa nẹ ẹrhovwo rere we vwo jẹ odavwini ẹruọ.

⁴⁷Rọ je ghwa vwọ ta ota na, otu de bro rhe, ohwo re se Judas na, ọvo vwẹ ihwivẹ na, o ro suẹn ayen cha. O de si kerẹ Jesu re ọ ọfiọnfiọn unu;

⁴⁸Ẹkẹvuọvo Jesu da ta kẹ, Judas, wọ vwẹ unu ẹ fiọnfiọn shẹ Ọmọ rẹ ohwo?

⁴⁹Ọke rẹ otu re vẹ ọye gba herọ na vwọ mrẹ obo re cha phia kẹ, ayen da ta, Ọrovwohwo, ma vwẹ ọlọkọ nyavwe ayen?

⁵⁰Ọvo vwẹ usun rẹ ayen da nyavwe orhọn rẹ ọviẹn rẹ orherẹn rode na bru kufia.

⁵¹Ẹkẹvuọvo Jesu da ta, me guọnọ ọnana-a! Ọ vwẹ obọ te orhọn rọye ọ da vwọ tamu.

⁵²Etiyin Jesu da ta kẹ ilori rẹ irherẹn na kugbe inotu rẹ uwevwi rẹ ẹga na kugbe ekpako na, re rhere rhe vwọ suọ na, Wa rhere kerẹ ohwo rọ vwọ so igbunegbu vẹ elọko, vẹ egbẹn?

⁵³Ọke re me vẹ ovwan vwọ herọ kẹdẹ kẹdẹ vwẹ uwevwi rẹ ẹga na, we shabọ họ ovwẹ-ẹ. Ẹkẹvuọvo ọnana hẹ unọke rẹ ovwan, kugbe ogangan rẹ ebri.

⁵⁴Etiyin ayen de shabọ họ ayen de suo yanran, ayen da reyọ vwọ rhe uwevwi rẹ orherẹn rode. Pita de nene vwẹ obuko shesheri;

⁵⁵rẹ ayen vwo koko erhanre phihọ uherevie rẹ ọguan na ayen de tidia kugbe, Pita de tidia ohri rẹ ayen.

⁵⁶Etiyin ọmọtẹ ọvo, rọ mrẹrẹ ro vwo tidia rẹ erhanre vwo la muo na kọ tọn ẹro vio, ọ da ta, Ohwo nana vẹ ọye je hẹ usun rhe.

⁵⁷Ẹkẹvuọvo ọ da phrọ, tanẹ, Aye, me riẹnrẹ-ẹ.

⁵⁸Ọmọke ọfa ohwo ọfa da je mrẹ ọ da ta, Wẹ je hẹ ọvo vwẹ usun rẹ ayen. Ẹkẹvuọvo Pita da ta, Ọshare na, me dia ọye-e.

⁵⁹Kerẹ emu rẹ unọke ọvo vwọ wan nure ohwo ọfa ki je vwra, nẹ, Omuẹro ohwo nana vẹ ọye je herọ rhe; kidie ohwo ri Galili o ruẹ

⁶⁰Ẹkẹvuọvo Pita da ta, Ọshare na, mẹ riẹn obo wọ ta na-a. Siẹvuọvo na, ro je ghwa vwọ ta ota na, ọhọ de ghwe bo.

⁶¹Ọrovwohwo da rhẹriẹ oma o de ni Pita. Pita da karohọ ota rẹ Ọrovwohwo, obo rọ ta kẹ, Tavwe rẹ ọhọ ki bo nonẹ na, wọ sen vwẹ asiarha.

⁶²Ọ da ro otafe ọ da viẹ gangan.

⁶³Asakiephana ihwo ri mu Jesu na da vwọ jehwẹ ayen de hwe;

⁶⁴ayen da gba opharo ayen da nọ, Mraro, ono re fa wẹ na?

⁶⁵Ayen da ta eta efa buebu kpahọ, je ghwọ kuo.

⁶⁶Okẹ rẹ ayen vwọ rhe, ọghwẹgbe rẹ ekpako rẹ ihwo na de koko kẹ, te ilori rẹ irherẹn vẹ isiẹbe; ayen de suo kpo ẹguare rayen, ayen da ta,

⁶⁷Wọ da dia Kristi na, ta kẹ avwanre. Ẹkẹvuọvo ọ da ta kẹ ayen, Me da ta kẹ ovwan, we segbuyota-a;

⁶⁸ọ da dianẹ me nọ ovwan, ovwan cha kpahe-e.

⁶⁹Ẹkẹvuọvo kẹ ọke na yanran Ọmọ rẹ ohwo che tidia vwẹ obọrhe rẹ ogangan rẹ Ọghẹnẹ.

⁷⁰Ayen ejobi da ta, Wẹ kẹ Ọmọ rẹ Ọghẹnẹ heyọ? Ọ da ta kẹ ayen, Wẹ re tare nẹ Mẹvwẹ ọye.

⁷¹Ayen da ta, Didi iseri ọfa avwanre rha guọnọ? Avwanre ọvo ri nyoro nẹ unu robọ rọye rhe.