Read urhobo Luk 23 Bible Online

Luk 23 - urhobo bible

Luk 23

¹Etiyin Otu rẹ ayen ejobi de vrẹn, ayen da reyọ vwo rhe Pailet.

²Ayen ke vwẹ urhi muo, tanẹ, Avwanre mrẹ ohwo nana ro kuẹ ẹgborho na rhẹriẹ, rọ djẹ avwanre nẹ a hwa osa rẹ uyovwi kẹ Siza-a, tanẹ ekpuyovwi rọye Kristi na ovie.

³Pailet da nọ, Wẹ hẹ Ovie ri Ju na? Ọ da kpahe kẹ, Wẹ re ta ọtiọye.

⁴Pailet da ta kẹ ilori rẹ irherẹn na kugbe urogho na, Me mrẹ oruchọ vwẹ obọ rẹ ohwo nana-a.

⁵Ẹkẹvuọvo kẹ ayen kpakpọ, tanẹ, Ọ kpare ophu rẹ ihwo na, o yono wan Judia ejobi, nẹ Galili rhe tobọ rhi te etinẹ na.

⁶Ọke ri Pailet vwo nyo ọnana, ọ da no sẹ ohwo na ọ rẹ Galili.

⁷Rọ vwọ riẹn nẹ otọ rhe isuesun ri Herọd o nurhe, ọ da reyọ vwo rhe Herọd, rẹ ekpuyovwi rọye hẹ Jerusalẹm vwẹ ọke yena.

⁸Ọke ri Herọd vwọ mrẹ Jesu, oma da vwerhọ gangan, kidie ọ guọnọ mrẹ krẹre, fikiridie o nyo usi rọye, ko rhẹro rọ vwọ mrẹ oka ro ruru.

⁹Ọtiọye na ọ da nọ enanọ krekri; ẹkẹvuọvo ọ kpahere.

¹⁰Ilori rẹ irherẹn na kugbe isiẹbe na de mudia etiyin, re chahe urhi muo gangan.

¹¹Herọd vẹ otuofovwi rọye da phọphọ ayen da vwọ jehwẹ; etiyin, ayen de ku ewun rẹ ododo phihọ, ọ da rhoma suo rhe Pailet.

¹²Herọd vẹ Pailet da ghwa rhuẹrẹ kugbe vwẹ ẹdẹ yena, kidie rhi te ọke na ayen ivẹ na gba-a.

¹³Pailet da rhoma se ilori rẹ irherẹn na kugbe isun rẹ ihwo na,

¹⁴ọ da ta kẹ ayen We mu ohwo nana rhe vwe kerẹ ohwo ro kuẹ ihwo rhẹriẹ; re me rha vwọ davwọ ni vwẹ irharo rẹ ovwan nu na, nighe, me rha mrẹ ohwo nana rọ reabe rẹ urhi ru we vwo muo naa;

¹⁵Herọd je mrẹ emuọvo kpahọ-ọ, kidie ọ rhoma vwo rhe avwanre, Nighe, a mrẹ obo ri fo ughwu vwẹ obọ rọye-e;

¹⁶vwẹ ọtiọye na ke me de fa rere mi siobọ nọ.

¹⁷Asakiephana uruemu rọye ro vwo siobọ nẹ ohwo ọvo kẹ ayen vwẹ orẹ na.

¹⁸Ẹkẹvuọvo ayen ejobi de koko kuvwie, A vwẹ ohwo nana yanran, re siobọ nẹ Barabas kẹ avwanre —

¹⁹ohwo ọvo re mu phihọ uwodi fiki rẹ ozighi egbe, kugbe ozighẹ.

²⁰Pailet da rhoma ta ota kẹ ayen obọ ọfa, rọ vwọ guọnọ obọ siẹnẹ Jesu.

²¹Ẹkẹvuọvo ayen de kuvwie, kanrọ mu agbagba, kanrọ mu agbagba!

²²Obọ rerha ọ da ta kẹ ayen, Die, didi umwemwu o ruru? Me mrẹ oruchọ ro ruru ro fo ughwu-u, vwẹ ọtiọye na ke me de fa rere mi siobọ no.

²³Ẹkẹvuọvo kẹ ayen kpakpọ, re guọnọ vẹ ekuvwie nẹ ọ kanrọ mu agbagba. Ekperẹ rayen da kparobọ.

²⁴Ọtiọye Pailet de bru kẹ ayen ọ da rhọvwe phihọ obo rẹ ayen guọnọre.

²⁵O de siobọ nẹ ohwo re mu họ uwodi fiki rẹ ozighi egbe kugbe ozighẹ, rẹ ayen nọre; ẹkẹvuọvo o de siobọ nẹ Jesu kẹ ayen nẹ ayen gbe ru obo ri je ayen.

²⁶Rẹ ayen vwo suo yanran, ayen de shabọ họ ọvo Saimọn ri Sairini, ro ghwe nẹ obo orho cha, ayen de mu agbagba na nyẹ, rọ ghwa nene Jesu.

²⁷Urogho rẹ ihwo na de tue nene, kugbe eya ri beroma kugbe e re viẹ.

²⁸Ẹkẹvuọvo ri Jesu vwọ rhẹriẹ oma ku ayen ọ da ta, Emetẹ ri Jerusalẹm, wa viẹ kẹ vwẹ-ẹ, ẹkẹvuọvo viẹ kẹ oma rẹ ovwan kugbe emọ rẹ ovwan.

²⁹Kidie nighe, ẹdẹ cha rẹ ayen da cha ta, Ebruba kẹ ẹga, kugbe evun rẹ ọmọ je ro dẹvo-o, kugbe evie re ji vie dẹvo-o!

³⁰Etiyin ayen ke cha ta kẹ igbenu na, Shenyẹ avwanre; igbenu itete na, rhurhu avwanre.

³¹Kidie ayen de ru ọnana ke urhe ọkpokpọ, kidie re cha phia kẹ urhe oghweghwu?

³²Ivẹ efa je herọ, izighẹ, e de sun ayen yanran ra vwọ ba re hwe ghwu.

³³Ọkẹ rẹ ayen rhi vwo te asan na re se Ekpehruyovwi kẹ etiyin a da kanrọ mu agbagba, kugbe izighẹ na, ọvo hẹ obọrhe ọvo hẹ obọhwẹre.

³⁴Jesu da ta, Ọsẹ, vwo ghovwo ayen; kidie ayen riẹn obo rẹ ayen ruẹ-ẹ. Ayen da vwẹ ewun rọye vwo duvwu itẹ.

³⁵Ihwo na de mudia, re rhẹrẹ; ẹkẹvuọvo isun na de mienu phihọ, tanẹ, O sivwi ihwo efa; gbe jẹn o sivwi oma rọye, ọ da dianẹ ọye hẹ Kristi rẹ Ọghẹnẹ, Ọvuọvo rọ Jẹreyọ na.

³⁶Isodje na da je vwọ jehwẹ rhe, i bruro rhe e da vwẹ origbo kẹ,

³⁷tanẹ, Ọ da dia owẹ hẹ Ovie ri Ju na, gbe sivwi oma wẹn!

³⁸E de si isiesi vwọ tamuo, Ọnana hẹ Ovie ri Ju na.

³⁹Ọvo vwẹ izighẹ na re churu si de do kuo, tanẹ, Ọ dia owẹ hẹ Kristi na? Sivwi oma wẹn kugbe avwanre !

⁴⁰Ẹkẹvuọvo ọrivẹ da ghwọ kuo, tanẹ, Wọ djẹ oshọ rẹ Ọghẹnẹ-ẹ, ọ dia orhiẹ rẹ ughwu ọvuọvo na e bru hwe vẹ avwanre-e?

⁴¹Orhie ọsoso e bru hwe avwanre na; kidie osa rẹ umwemwu avwanre reyọ na; ẹkẹvuọvo ohwo nana ru emuọvo chọ-ọ.

⁴²Ọ da ta, Jesu karohọ ovwẹ vwẹ ọke wo de te uvie rẹ ogangan wẹn na.

⁴³Ọ da ta kẹ, Uyota me ta kẹ owẹ, nonẹ na me vẹ owẹ dia vwi Paradais.

⁴⁴Asakiephana yọ jẹ oma te unọke esan re, ebri de rhi mu vwẹ otọ na ejobi rhiri rhi te unọke irhiri,

⁴⁵Rẹ ọnre vwo she re; amwa ra vwọ tan uwevwi rẹ ẹga na de mu bẹre ẹbẹre ivẹ.

⁴⁶Etiyin Jesu, rọ vwọ van kperi, ọ da ta, Ọsẹ, obọ wẹn mi phi erhi mẹ phihọ! Rọ vwọ ta ọnana nu o de phi ẹnwẹ họ.

⁴⁷Asakiephana rẹ isodje na vwọ mrẹ obo re phiare, o de jiri Ọghẹnẹ, ẹ da ta, Omuẹro, ohwo nana ọvwata ọ ruẹ!

⁴⁸Urogho na re ghwẹ koko rhi ni ughe, re vwọ mrẹ obo re phiare de rhivwi kpo re vwẹ abọ teye udu.

⁴⁹Eriẹnvwẹ rọye kugbe eya na ri nenire nẹ Galili rhe de mudia vwẹ ogboko e da mrẹ imu nana.

⁵⁰Asakiephana ọshare ọvo herọ re se Josẹf ro nẹ Arimatia rhe rhe orho rẹ ihwo ri Ju. Ọdiaguare, ohwo esiri kugbe ọvwata,

⁵¹ọ rhọvwe phihọ iroro kugbe uruemu raye-en, o ro phiẹrohọ uvie rẹ Ọghẹnẹ na.

⁵²Ohwo nana de bru Pailet ra ra nọ ekpẹn rẹ orivwi ri Jesu.

⁵³Etiyin o de muo te otọ ọ da vwẹ ukpoyibo vwọ pharọ, o de sho phihọ ushi ta tọn phihọ evun rẹ oragha, re ji shi ohwo phihọ dẹvo-o.

⁵⁴Ọ da dia ẹdẹ rẹ Omaẹcha, yẹ ẹdidjala ghwe ro te.

⁵⁵Eya na ri nenire nẹ Galili rhe da vwọ kpahọ, ayen da mrẹ ushi na, vẹ obo re shi orivwi rọye wan;

⁵⁶Etiyin ayen de rhivwi kpo, re chere ori kugbe ishani ri gbo ọnrhe ororo. Vwẹ ẹdidjala na ayen de rovwoma kirobo rẹ urhi epha.