Read urhobo Luk 24 Bible Online

Luk 24 - urhobo bible

Luk 24

¹Ẹkẹvuọvo vwẹ ẹdẹ rẹsosuọ rẹ ẹdidjala na, vwẹ irhiọke ride ayen da yanran kpo obo ushi na, vẹ ishani rẹ ayen cheri na.

²Ayen da mrẹ oragha na re ghorie nẹ ushi na,

³ẹkẹvuọvo ọke rẹ ayen vwọ ro evun rọye ayen mrẹ orivwi rọye-e.

⁴Rẹ ofu vwo dje ayen fiki rẹ Ọnana, nighe, eshare ivẹ vẹ emwa wrowro de mudia kẹrẹ ayen;

⁵rẹ uguegue vwo mu ayen rẹ ayen vwo gbe opharo phihọ otọ, eshare na da ta kẹ ayen, Die wa vwọ guọnọ ihwo ekpokpọ vwẹ evun rẹ ushi?

⁶Ọ gbe hẹ etinẹ-ẹ, ẹkẹvuọvo o vrẹnre. karohọ obo rọ ta kẹ ovwan rọ je vwọ hẹ obi Galili,

⁷nẹ e che mu Ọmọ rẹ ohwo vwọ hẹ obọ rẹ iruimwemwu, ra da kanrọ mu agbagba, vwẹ ẹdẹ rerha ko vrẹn.

⁸Ayen da karohọ eta rọye,

⁹rẹ ayen vwo rhivwi nẹ obo ushi na rhire ayen de gbe ọnana ejobi kẹ uhwọvo na kugbe otu ri chekọ.

¹⁰Asakiephana Meri ri Magdala kugbe Joana kugbe Meri rẹ oni ri Jems kugbe eya efa re vẹ ayen gba herọ ri gbe ikun nana kẹ iyinkọn na;

¹¹ẹkẹvuọvo enana ke họhọ esia vwọ kẹ ayen, ayen gbi se ayen gbuyota-a.

¹²Ẹkẹvuọvo Pita de vrẹn ọ da djẹ kpo obo ushi na; ro vwo rhuẹn ni evun rọye, ọ da mrẹ ukpoyibo na ra phare phihọ asan obọ rọye sa, o de rhivwi kpo vẹ igbevwunu rẹ obo re phiare na.

¹³Vwẹ ẹdẹ yena ọvuọvo na ivẹ vwẹ usun rẹ ayen ki kpo ọko ọvo re se Emaọs, kerẹ emu rẹ uroko ighwrẹ nẹ Jerusalẹm yanran,

¹⁴ri gbe ikun kẹ ohwohwo vwẹ oma rẹ imu nana re phiare na.

¹⁵Rẹ ayen vwo gbe ikun ta ota kuẹgbe na, Jesu vẹ ekpuyovwi rọye de si kẹrẹ ayen ọ vẹ ayen ke yan usun yanran.

¹⁶Ẹkẹvuọvo e de rhurhu ẹro rayen o gbi jẹ ayen vugbe-e.

¹⁷Ọ da ta kẹ ayen, Didi ikun ovwan gbe yanran na? Ayen de mudia gbiẹi, ri ni ohwohwo vẹ uvweri.

¹⁸Etiyin ọvo vwẹ usun rẹ ayen, re se Kliopas, da kpahe kẹ, Wọwẹ ọvo ọrhorha rọ hẹ Jerusalẹm ro jẹ obo re phiare vwẹ ẹdẹ nana ẹriẹn?

¹⁹Ọ da ta kẹ ayen, Didi imu? Ayen da ta kẹ, Kpahe Jesu ri Nazarẹt ro dia ọmraro vẹ ẹgba vwẹ uruemu vẹ ota vwẹ obaro rẹ Ọghẹnẹ vẹ ihwo ejobi,

²⁰obo rẹ ilori rẹ irherẹn kugbe isun na muro re de brorhiẹ rẹ ughwu hwe, a da kanrọ mu agbagba.

²¹Ẹkẹvuọvo avwanre phiẹrohọ nẹ ọye cha tan Izrẹl hirhe. E, rha vwọ ba Ọnana, etiyin ẹdẹ erha rẹ imu nana phiare.

²²Ọ rọ marho, eya ẹvo vwẹ otu rẹ avwanre da rhe vwẹ anegbe ghwiẹ avwanre. Ayen kpo obo ushi na vwẹ irhiọke ride,

²³ayen gbe mrẹ orivwi rọye-e; ayen de rhivwi rhe tanẹ ayen mrẹ emramrẹ rẹ emakashe, rọ tare nẹ ọ je hẹ ọkpokpọ.

²⁴Ẹvo ri nene avwanre kpo obo ushi na, a da mrẹ kirobo rẹ eya na tare; ẹkẹvuọvo ekpuyovwi rọye a mrẹrẹ-ẹ.

²⁵Ọ da ta kẹ ayen, Ẹkpa rẹ ihwo na, rẹ udu rẹ ayen fobọ se eta rẹ emraro na gbuyota-a na!

²⁶O rhe fo rere Kristi re oja rẹ imu nana tavwe ro ki kpo urinrin rọye-e?

²⁷O de mu phihọ nẹ Mosis rhe kugbe emraro na ejobi, ọ da fan otọ rẹ ẹbe efuanfon na ejobi kpahe oma rọye kẹ ayen.

²⁸Ọtiọye na ayen de rhi si kẹre ọko na rẹ ayen ra na. O de ru kerẹ ọ wan vrẹn,

²⁹ẹkẹvuọvo ayen da gba phihọ, tanẹ, Nene avwanre dia etinẹ, kidie ọke na kpo ovwọnvwọn re yẹ ọke na ji kodo re. Ọtiọye ọ da ro uwevwi o de nene ayen dia.

³⁰Ọke rọ vẹ ayen vwo tidia udoemu re, ọ da reyọ ikara ọ da nẹ ẹrhovwo phihọ, o de bro, ọ da vwọ kẹ ayen.

³¹Ẹro rayen de rhie ayen de vughe; ọ da ghwa ranvwiẹ nẹ ohri rayen.

³²Ayen da ta kẹ ohwohwo, udu rhe kpokpo avwanre nanaye rọ vwọ ta ota kẹ avwanre vwẹ obo idjerhe-e, ro vwo rhie ẹbe efuanfon na kẹ avwanre?

³³Ayen de ghwe vrẹn vwẹ unọke yena ayen de rhivwi rhe Jerusalẹm; ayen da mrẹ uhwọvo na ri kokori kugbe otu re vẹ ayen gba herọ,

³⁴re tare, Ọrovwohwo ghine vrẹn vwẹ ọ rẹ uyota, ọ da vwẹ oma phia kẹ Saimọn!

³⁵Etiyin ayen de gbe ikun rẹ obo re phia vwẹ idjerhe na, vẹ obo rẹ ayen mrẹrẹ vughe vwẹ oma rẹ ikara ro bruru.

³⁶Rẹ ayen vwọ ta ọnana, Jesu vẹ ekpuyovwi rọye de mudia vwẹ ohri rẹ ayen.

³⁷Ẹkẹvuọvo ayen de guegue oshọ de mu ayen, ayen de roro nẹ ayen mrẹ erhi.

³⁸Ọ da ta kẹ ayen, Die ovwan vwọ phariẹ, kidie ovwan vwọ nọ enanọ vwẹ udu rẹ ovwan?

³⁹Ni abọ mẹ vẹ awọ mẹ, mẹvwẹ wa mrẹ na; yọnrọn ovwẹ, re wọ mrẹ; kidie erhi vwo uvwo vẹ ibeku kirobo wa mrẹ vwẹ ri mi vwori na.

⁴⁰Rọ vwọ ta ọnana nu, ọ da vwẹ abọ vẹ awọ rọye vwọ nẹ ayen.

⁴¹Ọke rẹ ayen ji segbuyota-a fiki rẹ aghọghọ, vẹ igbunu, ọ da ta ke ayen, We vwo ememu vwẹ etinẹ ra re?

⁴²Ayen da vwẹ ubro rẹ eri re cheri vwọ kẹ,

⁴³Ọ da reyọ ọ da riọ vwẹ irharo rẹ ayen.

⁴⁴Etiyin ọ da ta kẹ ayen, Enana eta mẹ re me ta kẹ ovwan, re me vẹ ovwan vwọ herọ, nẹ kemu kemu re siri kpahe ovwẹ vwẹ evun re urhi ri Mosis kugbe emraro na vẹ ine rẹ ejiro na cha gba.

⁴⁵Etiyin o de rhie udu rayen vwo vwo ẹruọ rẹ ẹbe efuanfon na,

⁴⁶ọ da ra kẹ ayen, Enẹ e siro, nẹ Kristi na cha reoja vwẹ ẹdẹ rerha ko vrẹn nẹ ughwu,

⁴⁷nẹ ekuorhẹriẹ vẹ evwoghovwo rẹ imwemwu keye e ghwoghwo vwẹ odẹ rọye kẹ ẹgborho na ejobi, ki Jerusalẹm a da tuọphihọ.

⁴⁸Ovwan iseri rẹ imu nana.

⁴⁹Nighe, mi che ji ive rẹ Ọsẹ mẹ na bru ovwan rhe; ẹkẹvuọvo wa dia evun rẹ orere na, bẹsiẹ ra vwọ reyọ ogangan nẹ obenu rhe rhi vwo rhuo ovwan.

⁵⁰Etiyin ọ de sun ayen ro otafe rhiri re te Bẹtani, rọ vwọ kpare abọ kpenu ọ da nẹ ẹrhovwo kẹ ayen.

⁵¹Rọ vwọ nẹ ẹrhovwo kẹ ayen, a da hẹriẹ nẹ ayen oma.

⁵²Ayen de rhivwi rhe Jerusalẹm vẹ aghọghọ rode,

⁵³ayen ejobi kẹ uwevwi rẹ ẹga na ayen dia de jiri Ọghẹnẹ.