Read urhobo Luk 3 Bible Online

Luk 3 - urhobo bible

Luk 3

¹Vwẹ ikpe ihwiori rẹ ẹriọ ri Tabirias Siza, Pọntiọs Pailet da hẹ osun ri Judia, Herọd kọye suẹn Galili, oniọvo rọye Filip kọye rhe suẹn ubrakpọ rẹ Ituria kugbe Trakonait, Lasanaya kọye suẹn ubrakpọ rẹ Abilini,

²vwẹ ọke rẹ Annas kugbe Kifas vwọ hẹ irherẹn rode, ota rẹ Ọghẹnẹ de bru Jọn ọmọ ri Zakaraya rhe vwẹ evun rẹ aghwa;

³ọ da yan ro ubrakpọ ri Jọdan ejobi, ro ghwoghwo ameẹreyọ rẹ ekuorhẹriẹ fiki rẹ evwoghovwo rẹ imwemwu.

⁴kirobo re siro phihọ ọbe rẹ eta rẹ Aizaya rẹ ọmraro, Urhuru rẹ ohwo ọvo ro kperẹ vwẹ evun rẹ aghwa. Rhuẹrẹ idjerhe rẹ Ọrovwohwo, ru ada rọye kpọvi.

⁵Iyara na ejobi ke ru ayen vọn, Igbenu ride te itete ejobi ke kporo ayen te otọ, idjerhe ri gunuru ke ru ayen phiọn, idjerhe chohri chohri ke ruo riẹriẹriẹ;

⁶ihwo ejobi ke cha mrẹ esivwo rẹ Ọghẹnẹ.

⁷Ọ ta kẹ urogho na ri bruro rhe ameẹreyọ na, Ovwan uvwiẹ rẹ eredekọ na! Ono re ta kẹ ovwan nẹ wa djẹ nẹ ophu rọ cha na?

⁸Wa vwẹ emamọ rẹ ekuorhẹriẹ ro fori phia, wa rha ta kẹ oma rẹ ovwan nẹ, Ebraham hẹ ọsẹ rẹ avwanreọ; kidie me ta kẹ ovwan, Ọghẹnẹ sa vwẹ ibiekpẹn rẹ otọ na ru emọ kẹ Ebraham.

⁹Asakiephana ushurhe ọ hẹ otọ rẹ irhe na re; urhe kurhe rọ gbe mọ emamọ esiri-i ke she teye otọ ke muo phihọ erhanre.

¹⁰Urogho na da nọ, Kidie avwanre ru?

¹¹Ọ da kpahe kẹ ayen, Ohwo ro vwo ewun ivẹ, e jẹn ọ vwọ ọvo kẹ ọ ro vwori-i; ọ ro vwo emuọre, e jẹn o ru ọtiọye rhe.

¹²Imiarhọghọ de bro rhe re reyọ ame, e da ta kẹ, Oyono, die avwanre ru?

¹³Ọ da ta kẹ ayen, uche igho re bruru nẹ e roro ọye ọvo we roro.

¹⁴Isodje da je nọ rhe, Kerhọ avwanre ji ru vwọ? ọ da ta kẹ ayen, Wa vwẹ ogangan eyẹ oshenyẹ gborho ohwo-o, jẹ osa rẹ ovwan te kẹ ovwan.

¹⁵Rẹ ihwo na ejobi vwo phiẹrohọ Jọn, rẹ ayen vwo roro iroro ivivẹ kpahọ sẹ ọye ghine Kristi na,

¹⁶Jọn da kpahe kẹ ayen ejobi Ame me vwọ kẹ ovwan; ẹkẹvuọvo ọ rọ rhonọ vwẹ cha, ifi rẹ isabato rọye mi fo ohwo rọ rha-an; ọye cha vwẹ ame vẹ Erhi Ọfuanfon kugbe erhanre họ ovwan.

¹⁷Adjudju hẹ obọ rọye, kọ nabọ hwerhe utuwevwi rọye kakare, ka ghwa eka rọye kpo erhu, ẹkẹvuọvo iphopho ri chekọ ka torhẹ ayen vwẹ erhanre ri bẹdẹ.

¹⁸Ọtiọye, eta rẹ uchehro buebu o vwo ghwoghwo ikun esiri na kẹ ihwo na.

¹⁹Ẹkẹvuọvo ri Jọn vwọ ghwọ ku Herọd osun, fiki ri Hẹrodias aye rẹ oniọvo rọye, kugbe orukuruku buebu ri Herọd ruru,

²⁰ọ rhe vwẹ ọna ba ayen ejobi, o de mu Jọn phihọ uwodi.

²¹Asakiephana rẹ ihwo na ejobi vwọ reyọ ame nu, ri Jesu vwọ reyọ ame nu rọ vwọ nẹ ẹrhovwo, odjuvwu de rhie phihọ,

²²Erhi Ọfuanfon de wo rhe vẹ ugboma kerẹ inekuku, o de she muo, urhuru ọvo de nẹ odjuvwu rhe, Wẹ ọmọ mẹ ro je vwe; rẹ ivun rọye vwerha ovwẹ.

²³Ri Jesu vwo mu uyono phihọ, ọ da dia ohwo rẹ ẹgbukpe ọgban, ọ dia ọmọ (kirobo re roro kpahọ) ri Josẹf, ọmọ ri Hẹli,

²⁴rẹ ọmọ ri Matat, ọmọ ri Livae, ọmọ ri Mẹlki, rẹ ọmọ ri Jannai, rẹ ọmọ ri Josẹf,

²⁵rẹ ọmọ ri Mateas, ọmọ re Emọs, rẹ ọmọ ri Nahọm, rẹ ọmọ rẹ Esli, rẹ ọmọ ri Negae,

²⁶rẹ ọmọ ri Maat, rẹ ọmọ ri Matias, rẹ ọmọ ri Simeni, rẹ ọmọ ri Josẹk, rẹ ọmọ ri Joda,

²⁷ọmọ ri Joanan, ọmọ rẹ Rhesa, rẹ ọmọ ri Zerubabẹl, rẹ ọmọ ri Shitiẹl, rẹ ọmọ ri Neri,

²⁸rẹ ọmọ ri Mẹlki, rẹ ọmọ rẹ Adi, rẹ ọmọ ri Kosam, rẹ ọmọ rẹ Elmadam, rẹ ọmọ ri Er,

²⁹rẹ ọmọ ri Jisọs, rẹ ọmọ rẹ Ẹliẹza, rẹ ọmọ ri Jorim, rẹ ọmọ ri Matat, rẹ ọmọ ri Livae,

³⁰rẹ ọmọ ri Simiọn, rẹ ọmọ ri Judas, rẹ ọmọ ri Josẹf, rẹ ọmọ ri Jonam, rẹ ọmọ rẹ Eliakim,

³¹rẹ ọmọ ri Milia, rẹ ọmọ ri Menna, rẹ ọmọ ri Matata, rẹ ọmọ ri Natan rẹ ọmọ ri Devid,

³²rẹ ọmọ ri Jẹse, rẹ ọmọ rẹ Ọbẹd, rẹ ọmọ ri Boaz, rẹ ọmọ ri Saimọn, rẹ ọmọ ri Nashọn,

³³rẹ ọmọ rẹ Aminadab, rẹ ọmọ rẹ Ani, rẹ ọmọ ri Hẹzrọn, rẹ ọmọ ri Pẹrẹz, rẹ ọmọ ri Juda,

³⁴rẹ ọmọ ri Jekọp, rẹ ọmọ rẹ Aizik, rẹ ọmọ rẹ Ebraham, rẹ ọmọ ri Tira, rẹ ọmọ ri Nahọ,

³⁵rẹ ọmọ ri Serọg, rẹ ọmọ ri Ro, rẹ ọmọ ri Pẹlẹg, rẹ ọmọ rẹ Eha, rẹ ọmọ ri Shlia,

³⁶re ọmọ ri Kenan, rẹ ọmọ rẹ Afasad, rẹ ọmọ ri Shẹm, rẹ ọmọ ri Noa, rẹ ọmọ ri Lamẹk,

³⁷rẹ ọmọ ri Metiusela, rẹ ọmọ rẹ Enọk, rẹ ọmọ ri Jarẹd, rẹ ọmọ ri Mahalalẹl, rẹ ọmọ ri Kenan,

³⁸rẹ ọmọ rẹ Enọs, rẹ ọmọ ri Sẹt, rẹ ọmọ rẹ Adam, rẹ ọmọ rẹ Ọghẹnẹ.