Read urhobo Luk 4 Bible Online

Luk 4 - urhobo bible

Luk 4

¹Jesu da rhe vọn vẹ Erhi Ọfuanfon, o de rhivwi nẹ Urhie ri Jọdan rhe, Erhi na de suon,

²kpo evun rẹ aghwa ẹdẹ ujuvẹ, idẹbono da davwọ ni. O re emuọvo vwẹ ẹdẹ yena-a; ẹdẹ na rhe vwọ gba nu, owẹvwe de rhi hwe.

³Idẹbono da ta kẹ, Wọ da ghene dia Ọmọ rẹ Ọghẹnẹ, gba ta kẹ ubieragha na ro hirhe phihọ emu re wọ re.

⁴Jesu da kpahe kẹ, E siro, Ohwo sa vwi fiki rẹ emu ọvo rhọ-ọ.

⁵Idẹbono de muo kpenu, ọ da vwẹ uvie kugbe urinrin rẹ akpọ na ejobi vwọ nẹ,

⁶ọ da ta kẹ, Nighe, ogangan na ejobi te uvie na kugbe urinrin rẹ akpọ na ejobi; mẹvwẹ ri vwo ayen, ohwo ro je vwẹ me vwe ayen kẹ.

⁷Ọ da dianẹ wọ ga vwẹ, diguẹ kẹ vwẹ, ke me vwẹ ayen kẹ wẹ.

⁸Jesu da kpahe kẹ, E siro, Ọrovwohwo Ọghẹnẹ wẹn ọvo ọye wọ ga, ọye ọvo wo shiguẹ kẹ.

⁹Ọ da reyọ kpo Jerusalẹm, o de muo kpo okpo rẹ uwevwi rẹ ega na, ọ da ta kẹ, Wọ da ghene dia Ọmọ rẹ Ọghẹnẹ, gbe pho nẹ oboyi rhe;

¹⁰kidie e siro, Ọ vwẹ ogangan kẹ emakashe rọye nẹ e rhẹrẹ owẹ,

¹¹Re ayen ya wẹ vwẹ obenu, rere awọ wẹn vwo jẹ ubioragha edje.

¹²Jesu da kpahe kẹ, A tarọ, Wọ davwe Ọrovwohwo Ọghẹnẹ wẹn nẹ-ẹ.

¹³Ọke rẹ idẹbono vwọ davwọ ejobi nu, ọ da yan jovwo emerha.

¹⁴Jesu de rhivwi vwẹ ogangan rẹ Erhi kpo Galili, usi rọye de kperi riariẹ orho na ejobi.

¹⁵O de yono vwẹ sinagọg rayen, ihwo ri nyoro ejobi de jiro.

¹⁶O de kpo Nazarẹt, asan rọ dia ghwanre na; o de kpo sinagọg, kirobo rẹ urnemu rọye epba, vwẹ ẹdidjala. O de mudia ro se ọbe;

¹⁷ọbe rẹ ọmraro Aizaya kọye a vwọ kẹ. O de rhie ọbe na ọ da mrẹ asan re si phihọ nẹ,

¹⁸Erhi rẹ Ọrovwohwo ọ hẹ oma mẹ, fikiridie ọ vwẹ evwri ghworo uvwe mi vwo gbe ikun esiri na kẹ ivwiogbere. O ji vwe rhi ghwoghwo obọesiono kẹ ighuvwu Orẹmrẹ kẹ otu ri rhuẹro, ufuoma ke otu re shenyẹ,

¹⁹vwo ghwoghwo ukpe rẹ ẹreyọ rẹ Ọrovwohwo.

²⁰O de rhurhu ọbe na, ọ da vwọ kẹ ọyinkọn na, o de tidia; ihwo re hẹ evun ri Sinagọg na ejobi da tọn ẹro vio.

²¹Ọ de muhọ eta kẹ ayen, Nonẹ na ọbe ọfuanfon na ke gba vwẹ erhọn rẹ ovwan.

²²Ihwo na ejobi da ta ota rọye yoyovwi, ota esiri ro nẹ unu rọye rhe de gbe ayen unu; ayen da ta, Ọnana dia ọmọ ri Josẹf na?

²³Ọ da ta kẹ ayen, Wa fọ re mi kpe itẹ ọvo kẹ ovwan, Ọbo sivwi oma wẹn; obo rẹ avwanre nyori ni wo ruru vwẹ obi Kepanọm, gbe ji ru ọtiọye vwẹ orho robọ wẹn na.

²⁴Ọ da ta kẹ ayen, Uyota, Me ta kẹ ovwan, Ọbo rẹ uwevwi daro-o.

²⁵Ẹkẹvuọvo, uyota Me ta kẹ ovwan, Eyauku buebu re hẹ Izrẹl vwẹ ọke rẹ Ilaija, ọke rẹ owẹvwe vwo fi ikpe erha gbẹ ubro, rẹ osio rhọre-e;

²⁶ọ dia eya na ejobi e ji Ilaija bru ra-a, jokpa rẹ ayeuku ọvo vwi Zarafẹt, orere ri Saidọn.

²⁷Ẹhonvwoti buebu rẹ hẹ Izrẹl vwẹ ọke rẹ Ilaisha ọmraro na; ọ dia ayen ejobi esivwiri-i, jokpa ri Niaman rẹ ohwo ri Siria.

²⁸Rẹ ayen rhi vwo nyo eta nana, ivun de miovwo ihwo ejobi re hẹ evun ri sinagọg na.

²⁹Ayen de vrẹn ra djẹ nẹ orere na, ayen da reyọ vwo kpo ọghwrọrọ ra bọn orere na phihọ, re ayen gere she teye oghwrọrọ na.

³⁰Ẹkẹvuọvo ọ da wan uherevie rẹ ayen ro otafe.

³¹O de kpo Kepanọm, orere ri Galili. Ko yono ihwo vwẹ ẹdidjala na;

³²uyono rọye de gbe ayen unu, kidie ota rọye vọnre vẹ ogangan.

³³Vwẹ evun ri sinagọg na ọshare ọvo herọ, ro vwo erhi ro jẹfuọn; o de bunu Wuwu,

³⁴Die avwanre vẹ owẹ gbe ru wẹ Jesu ri Nazarẹt? Wọ rhere rhe ghwọrọ avwanre? Me riẹn ohwo ru wọ epha, Ọfuaufon Ọvuọvo rẹ Ọghẹnẹ.

³⁵Jesu da ghwọ kuo, tanẹ, Rhurhu unu wẹn, re wọ wan no! Rẹ idẹbono vwo muo phiotọ vwẹ uherevie rayen nu, o de vrẹn no oma, o ruro emuọvo-o.

³⁶O de gbe ayen ejobi unu ayen da ta kẹ ohwohwo, Ọna didi ota? Kidie ọ vwẹ ẹgba vẹ ogangan vwo ji urhi kẹ erhi ro jẹfuọn, ayen da wan no.

³⁷Usi rọye de kperi ro asan ejobi yariẹ.

³⁸O de vrẹn nẹ sinagọg na, ọ da vwẹriẹ uwevwi ri Saimọn. Asakiephana ekpahe ọgangan ko muẹ oni-aye ri Saimọn, ayen da rhe vuẹ.

³⁹O de mudia kẹrẹ ọ da ghwọ ku ekpahe na, oma rọye da ghwa sasa. Siẹvuọvo o de ghwe vrẹn o de gbe odibo kẹ ayen.

⁴⁰Asakiephana rẹ ọnre vwo she kpotọ re, ayen ejobi de mu ihwo re mwa emiavwe dohwo doghẹre rọye vwo rhe, ọ da ghwẹ obọ kpahe ayen ọvuọvo o de sivwi ayen.

⁴¹Idẹbono ri nẹ oma rẹ ihwo buebu rhe, ki kperẹ, Wẹ hẹ Ọmọ rẹ Ọghẹnẹ na! Ọ da ghwọ ku ayen nẹ ayen rhurhu unu, fikiridie ayen riẹnre nẹ ọye hẹ Krisri na.

⁴²Rẹ ọke vwo rhie o de nẹ etiyin kpo asan ofuefu. Ihwo na ke guọnọ, ayen vwọ mrẹ nu, ayen da rẹ nẹ ọ yan jẹ ayen vwo-o;

⁴³Ẹkẹvuọvo o da ta kẹ ayen, Mi ji re gbe ikun esiri rẹ uvie rẹ Ọghẹnẹ kẹ irere efa rhe; fiki rẹ ọnana e vwo ji vwe rhe.

⁴⁴Yo ghwoghwo ota na vwi Sinagọg ri Judia.