Read urhobo Luk 5 Bible Online

Luk 5 - urhobo bible

Luk 5

¹Vwẹ ọke yena rẹ ihwo na vwo keke re ayen nyo ota rẹ Ọghẹnẹ na, o de mudia vwẹ orhoma rẹ avware ri Gẹnẹsarẹt.

²Ọ da mrẹ eko ivẹ re churu si erhuru na, ẹkẹvuọvo ihwiyeri na wotọ no ayen ke hworhẹ iriri rayen.

³Rọ vwọ ro okọ na ọvo, okọ, ri Saimọn, ọ da ta kẹ nẹ o bio ro odo emerha. O de tidia okọ na kẹ etiyin o de yono ihwo re hẹ orhotọ na.

⁴Ọke ro vwo yono ihwo na nu, ọ da ta kẹ Saimọn, Bi okọ wẹn na phihọ odo re wọ fa ariri wẹn họ ro mu eri.

⁵Saimọn da kpahe, Onini, avwanre lagha oma vwẹ ason na ejobi yi me hwe emuọvo-o! Ẹkẹvuọvo vwẹ ota wẹn na me fa phihọ.

⁶Rẹ ayen vwọ fa phihọ nu, iyeri buebu de muo; rẹ ariri rayen vwọ bẹrẹ,

⁷ayen da vwẹ obọ se irivẹ rayen re hẹ okọ ọfa, re a rhe cha ayen uko. Ayen de rhi kpono ariri na vẹ iyeri na phihọ eko, eko na ki shuẹ.

⁸Ẹkẹvuọvo ri Saimọn Pita vwọ mrẹ, o de she diguẹ vwẹ obaro ri Jesu, tanẹ, Bi nẹ uvwe oma, kidie mẹvwẹ oruimwemwu, E, Ọrovwohwo.

⁹Kidie o gbere unu, kugbe otu rọye ejobi, fiki rẹ iyeri buebu rẹ ayen hweri;

¹⁰ọtiọye ji te Jems vẹ Jọn, emọ ri Zẹbidi, rẹ irivẹ ri Saimọn. Jesu da ta kẹ Saimọn, Wọ djẹ oshọ-ọ; kẹ etinẹ yanran ku wo hwe iyeri rẹ ihwo.

¹¹Ọke rẹ ayen rhi vwo bi te otọ, ayen da yan jẹ emu na ejobi vwo, ayen de nene.

¹²Ọke ro rhi vwo te orere ọvo, ọhonvwoti ọvo da rhe vwa; ọke rọ vwọ mrẹ Jesu, o de shiguẹ kẹ ọ da rẹ, Ọrovwohwo, wọ da rhọvwe gbe ru vwe fon.

¹³Ọ da riẹn obọ vwo te, tanẹ, Me rhọvwere; gba fon. Siẹvuọvo na oti na de ghwe no oma.

¹⁴O de ji urhi kẹ nẹ ọ ta kẹ ohwo-o; ẹkẹvuọvo yanran, wọ ra vwẹ oma wẹn nẹ orherẹn, rẹ wo ze izobo kirobo rẹ urhi ri Mosis tare, rọ dia iseri kẹ ihwo na.

¹⁵Ẹkẹvuọvo usi rọye da rhoma kperi ro asan ejobi phihọ; urogho de rhi bi gba re ayen nyo ota rọye ro sivwi emiavwe rayen.

¹⁶Ẹkẹvuọvo o de sioma reyọ kpo evun rẹ aghwa ra nẹ ẹrhovwo.

¹⁷Ẹdẹvo, ro vwo yono, otu ri Farisi kugbe otu re riẹn urhi de tidia kẹrẹ, ri nẹ ẹko ri Galili vẹ Judia kugbe Jerusalẹm rhe; ogangan rẹ Ọrovwohwo vẹ ọye da herọ, o de sivwi.

¹⁸E vwo ni, a ghwa ohwo ọvo vwẹ ahwa vwo rhe, ohwo na ghwoma, ayen da guọnọ obo rẹ ayen vwọ reyọ rhe Jesu;

¹⁹ayen rha mrẹ idjerhe muo ro uwevwi-i, fiki rẹ ihwo buebu na ayen de yeri kpo obo okpo ayen da lọrọ vẹ eruẹ na wan ebọn ra uherevie vwẹ asan ri Jesu epha.

²⁰Rọ vwọ mrẹ esegbuyota rayen ọ da ta, Ọshare; a vwẹ imwemwu wẹn ghovwo uwe.

²¹Isiẹbe kugbe Farisi na ke nọ, tanẹ, Ọna ono rọ ta ogbeta na? Ono sa vwẹ imwemwu ghovwo jokpa rẹ Ọghẹnẹ ọvo?

²²Jesu vwọ riẹn iroro rayen, o da kpahe kẹ ayen, Die ovwan nọ vwẹ udu rẹ ovwan?

²³Ọ rhọ lọhọre ra ta, A vwẹ imwemwu wẹn ghovwo uwe, eyẹ ra vwọ ta nẹ, Vrẹn wọ yan?

²⁴Ẹkẹvuọvo re ovwan vwọ riẹn nẹ Ọmọ rẹ ohwo vwo ogangan vwẹ akpọ rọ vwọ vwẹ imwemwu ghovwo — o da ta kẹ ohwo ro ghwoma na — Me ta kẹ wẹ, vrẹn, tọrọ eruẹ wẹn re wo kpo.

²⁵Siẹvuọvo na o de ghwe vrẹn vwẹ irharo rẹ ayen, ọ da tọrọ ernẹ rọye ro sherhẹ jovwo na, o da yanran kpo, jo jiri Ọghẹnẹ.

²⁶Ọ de gbe ayen ejobi unu, ayen de jiri Ọghẹnẹ ayen da vọn vẹ udidi, tanẹ, Avwanre mrẹ emu ri gbunu nonẹ.

²⁷Rẹ enana ejobi vwọ wan nu, ọ da ro otafe, ọ da mrẹ omiarhọghọ, re se Livae, ro tidia ọguan re de mie arhọghọ, ọ da ta kẹ Nene uvwe.

²⁸Ọ da yan jẹ emu ejobi vwo, o de vrẹn, o de nene.

²⁹Livae de ehere emu buebu kẹ vwẹ uwevwi rọye; imiarhọghọ, buebu kugbe ihwo efa vẹ ọye de tidia vwẹ udoemu na.

³⁰Farisi na kugbe isiebe rayen na ki guẹ idibo rọye, tanẹ, Die ovwan vẹ otu rẹ imiarhọghọ kugbe iruimwemwu vwọ da vwọ ria kuẹgbe?

³¹Jesu da kpahe kẹ ayen, Ihwo vẹ oma ọkpokpọ sa guọnọ ọbo-o, ẹkẹvuọvo jokpa rẹ otu rẹ oma da.

³²Mi rhi se evwata-a, ẹkẹvuọvo iruimwemwu ri kurhẹriẹ.

³³Ayen da ta kẹ, Idibo ri Jọn ehirẹ owẹvwe kẹdẹ kẹdẹ ayen mia nẹ ẹrhovwo, ọtiọye ji te idibo ri Farisi na, ẹkẹvuọvo ewẹn ria je da.

³⁴Jesu da ta kẹ ayen, Kẹ ikọpha se chiri owẹvwe rẹ ọpha na vẹ ayen da herọ?

³⁵Ẹkẹvuọvo ẹdẹ cha, ra cha vwọ reyọ ọpha na mie ayen, kẹsiẹye ayen ki chiri owẹvwẹ.

³⁶Ọ da rhoma kpe itẹ kẹ ayen, Ohwo sa bẹrẹ ẹbẹre rẹ amwa ọkpokpọ ko phihọ ọ rẹ awanre-e, o de ruo, kọ bẹre ọkpokpọ na, yẹ ẹbẹre ọkpokpọ na kọ nẹrhẹ ẹbẹre amwa rẹ awanre na miovwi phihọ.

³⁷Ohwo se ku udi ọkpokpọ phihọ ephiẹ rẹ awanre-e; o de ruo, udi ọkpokpọ na ko bẹre ephiẹ na, udi na ko hwẹ fia, ephiẹ na ki miovwi.

³⁸Ẹkẹvuọvo udi ọkpokpọ e kuo phihọ ephiẹ ọkpokpọ.

³⁹O vwo ohwo rọ da udi rẹ awanre nu, ọ da guọnọ ọkpokpọ-ọ; kidie ọ tare nẹ, ọ rẹ awanre na ri me yoma.