Read urhobo Luk 6 Bible Online

Luk 6 - urhobo bible

Luk 6

¹Vwẹ ẹdidjala ọvo, rọ vwọ wan ugbọka vrẹn, idibo rọye ke kọrọ eka eboba na ria, ayen mia vwẹ ame rọye ghworo abo.

²Ẹkẹvuọvo ẹvo vwẹ usun ri Farisi na da ta, Die ovwan vwo ru obo ri je fo vwẹ ẹdidjala?

³Jesu da kpahe, Ovwan ji se ọnana dẹvo-o, obo ri Devid ruru vwẹ ọke rẹ owẹvwe vwo hwe, vẹ ikru rọye;

⁴obo rọ ro uwevwi rẹ Ọghẹnẹ, ọ da re ikara re vwo ze izobo, ro fo kẹ re ọ re-e jokpa re irherẹn ọvo, rọ da je vwọ kẹ otu re vẹ ọye gba herọ?

⁵Ọ da ta kẹ ayen, Ọmọ rẹ ohwo ọye ri vwo ẹdidjala.

⁶Vwẹ ẹdidjala ọfa, rọ vwọ ro evun ri Sinagọg de re yono, ohwo ọvo da hẹ etiyin rẹ obọrhe rọye ghwuru.

⁷Isiẹbe na kugbe Farisi na ke rhẹrẹ, so se sivwi vwẹ ẹdidjala na, rere ayen mrasan vwo muo.

⁸Ẹkẹvuọvo rọ vwọ riẹn iroro rayen, ọ da ta kẹ ohwo rẹ obọ rọye ghwuru na, Yanrhe rhi mudia etinẹ. O de vrẹn o de mudia vwẹ etiyin.

⁹Jesu da ta kẹ ayen, Me nọ ovwan tavwe, o fori re vwo ru obo ri yoma vwẹ ẹdidjala ghinẹ ọ ro mioma? re vwo sivwi rhọ gbenẹ ẹghwọrọ?

¹⁰O di ni ayen ejobi yariẹ, ọ da ta kẹ, Riẹn obọ wẹn na. O de ru ọtiọye, obọ na da ghwa rhọvwọ.

¹¹Ẹkẹvuọvo ivun de miovwo ayen gangan, ayen da ta kẹ ohwohwo nẹ komavo a tobọ rui Jesu na vwọ.

¹²Vwẹ ọke yena re, o de kpo enu rẹ ugbenu ra nẹ ẹrhovwo; vwẹ evun rẹ ason na ejobi ọ da nẹ ẹrhovwo kẹ Ọghẹnẹ.

¹³Rẹ ọke rhi vwo rhie, o de se idibo rọye, ọ da sanọ ihwivẹ nẹ ohri rẹ ayen o de se ayen iyinkọn;

¹⁴Saimọn, ro mu odẹ kẹ Pita, kugbe Andru rẹ oniọvo rọye, kugbe Jems kugbe Jọn, Filip kugbe Batalomiu,

¹⁵Matiu kugbe Tọmọs kugbe Jems ọmọ rẹ Aifiọs, Saimọn ọ rẹ oru ri Ziiotu,

¹⁶Judas ọmọ ri Jems kugbe Judas Iskariọt rọ shẹrẹ.

¹⁷Ọ vẹ ayen de wotọ rhe o de mudia asan riẹriẹ, vẹ otu rẹ idibo rọye buebu kugbe urogho rẹ ihwo ejobi ri nẹ Judia kugbe Jerusalẹm kugbe obo erhuru ri Taya kugbe Saidọn rhe, ri rhi nyo ota rọye rere o ji sivwi emiavwe rayen ejobi;

¹⁸ihwo rẹ erhi ri jẹfuọn kpokpo ejobi o de sivwi ayen.

¹⁹Otu na ejobi da guọnọ vwẹ obọ te, kidie ogangan nẹ oma rọye rhe o de sivwi ayen ejobi.

²⁰Ọ da kpare aro kpenu ni idibo rọye, ọ da ta: Ebruba kẹ ovwan ivwiogbere, kidie uvie rẹ Ọghẹnẹ kọ dia ọ rẹ ovwan.

²¹Ebruba kẹ ovwan rẹ owẹvwe hwe vwẹ asakiephana, kidie evun cha vọn ovwan. Ebruba kẹ ovwan re viẹ vwẹ asakiephana, kidie ovwan cha hwẹ.

²²Ebruba kẹ ovwan vwẹ ọke rẹ ihwo de tuoma rẹ ovwan, rẹ ayen da hẹriẹ ovwan nẹ oma re ayen da ghwọ ku ovwan, rẹ ayen de mu odẹ umwemwu kẹ ovwan, fiki rẹ Ọmọ rẹ ohwo!

²³Ghọghọ vwẹ ẹdẹ yena, mu pho vẹ aghọghọ, kidie nighe, osa rẹ ovwan pha rhuarho vwẹ obo odjuvwu; kidie ọtiọye esẹ rayen ru kẹ emraro na.

²⁴Ẹkẹvuọvo ekan kẹ ovwan edafe, kidie ovwan vwo ẹkẹn efe rẹ ovwan nure.

²⁵Ekan kẹ ovwan, rẹ evun vọnre vwẹ asakiephana, kidie owẹvwe che hwe ovwan. Ekan kẹ ovwan, re hwẹ vwẹ asakiephana, kidie ovwan cha viẹ muomahọ.

²⁶Ekan kẹ ovwan, vwẹ ọke rẹ ihwo de jiri ovwan, kidie ọtiọye esẹ rẹ ovwan ji jiri emraro rẹ efian na.

²⁷Ẹkẹvuọvo me ta kẹ ovwan ihwo ri nyo, Guọnọ ivwighrẹ wẹn, ru ọ rẹ esiri kẹ otu ri tuoma wẹn,

²⁸Nẹ ẹrhovwo kẹ ihwo ri duvwu iyori hwe we, ta ota esiti kẹ ihwo re harhe owẹ.

²⁹Ohwo da ghwiẹ wẹ ọhwa ọvo, je vwẹ ọrivẹ kẹ teye; ohwo de mie we adagba wẹn, wo siẹ ikotu wẹn nẹ kẹ-ẹ.

³⁰Ohwo da yare owẹ emu kẹ, ohwo de mie we obo wo vwori wọ gbe rhoma nọ ekpẹn rọye ọfa-a.

³¹kirobo wọ guọnọre ne ru kẹ wẹ, ji ru ọtiọye kẹ ihwo efa rhe.

³²Wọ da guọnọ ihwo rẹ ivun rẹ ayen vwerhe owẹ ọvo, ki didi osa wo vwo? Kidie iruimwemwn je guọnọ ihwo rẹ ivun rẹ ayen vwerhe ayen.

³³Wo de ru emu esiri kẹ ihwo ri ru emu esiri kẹ wẹ, ki didi osa ri te we vwọ? Kidie iruimwemwu ji ru ọtiọye rhe.

³⁴Wo de momo kẹ ihwo re sa hwa osa kẹ wẹ, didi ejiro a vwọ kẹ wẹ? Kidie iruimwemwu ji momo kẹ ihwo e mi suo kẹ ayen.

³⁵Ẹkẹvuọvo guọnọ ivwighrẹ wẹn, ru wo ru emu esiri, momo kẹ ayen wọ guọnọ isuo-o; osa wẹn kọ rho, ke se ovwan emọ rẹ ọ Ro Me Kpenu; kidie o nẹ aruẹdọn kẹ otu re riẹn ẹse te otu ri jẹ riẹn.

³⁶Gbe ni aruẹdọn kirobo rẹ Ọsẹ rẹ ovwan ji ni aruẹdọn.

³⁷Wo guẹ ohwo-o e gbi ji gu we-e; Wo bru ẹdjo hwe ohwo-o, e gbi ji bru hwe we-e; vwo ghovwo, ke ji vwo ghovwo uwe;

³⁸Kẹ, ka je kẹ wẹ; omamọ rẹ ovwanvwọn, ra nyẹre, re kpoghori, rọ mwavwi hwẹ, kọye e mu phihọ agada wẹn. Kidie ovwanvwọn wọ vwọ vwanvwe kẹ ihwo ọye a je vwọ vwanvwe kẹ wẹ.

³⁹O de rhe kpe itẹ ọvo kẹ ayen; Kẹ orhuẹro se sun orhuẹro? Ayen ivẹ na gbi she phihọ ọgọdọ-ọ.

⁴⁰Ọ re yono sa rhonọ oyono rọye-e, ẹkẹvuọvo ọ re yono ra nabọ yono kọ họhọ oyono rọye.

⁴¹Die wọ vwọ mrẹ umukueku ro tamu ẹro rẹ oniọvo wẹn, ẹkẹvuọvo, wọ rha mrẹ ubrurhe rọ hẹ ẹro robọ wẹ-ẹn?

⁴²Eyẹ komavọ wo sa vwọ ta kẹ oniọvo wẹn, Oniọvo, jẹn uvwe si umukueku rọ hẹ ẹro wẹn no, yẹ ekpuyovwi wẹn rha mrẹ ubrurhe rọ hẹ ẹro robọ wẹ-ẹn? Evwọrọn efian na, ke si ubrurhe rọ hẹ ẹro robọ wẹn na no, tavwe wọ ke mrẹ orẹ fiotọ vwo si umukueku rọ hẹ ẹro rẹ oniọvo wẹn no.

⁴³Kidie urhe esiri sa mọ omamọ umwemwu-u; eyẹ urhe umwemwu sa mọ omamo esiri-i;

⁴⁴Kidie omamo rẹ urhe e vwo vugbe urhẹ. Odjigbẹ sa mọ owẹ-ẹ, eyẹ akpia sa mọ otiẹ-ẹ.

⁴⁵Ohwo esiri vwenẹ emu esiri rọ hẹ udu rọye ọye o ruẹ kẹ ihwo, ohwo umwemwu ukori rẹ umwemwu rọ hẹ evun rọye oyẹ ọ da reyọ ruẹ kidie obo rọ hẹ evun rẹ udu ọye unu ta.

⁴⁶Die we vwo se vwe, Ọrovwohwo, Ọrovwohwo, yu we ruẹ obo re me tare-e?

⁴⁷Kohwo kohwo ro bru uvwe rhe ro de nyo eta mẹ ro de ru ayen, ki mi dje obo rọ họhọre kẹ ovwan.

⁴⁸Kọ họhọ ohwo rọ bọn uwevwi, rọ da nabọ tọn otọ na kokodo, ro ki mu uchivwo na phihọ enu rẹ oragha; ọke rẹ oghwe vwo ku rhe, rẹ ọkẹre vwọ fa uwevwi na, o gbi se kpogho-o, fikiridie a tọnrọ ro otọ kokodo.

⁴⁹Ẹkẹvuọvo ohwo ro nyori ro ruru-u ọ họhọ ohwo rọ bọn uwevwi rọye vwọ hẹ enu rẹ ubu ọ gbe tọn kodo te-e; rẹ ọkẹre vwọ fa, o de she; emu buebu da ghwọrọ vwọ.