Read urhobo Luk 7 Bible Online

Luk 7 - urhobo bible

Luk 7

¹Ọke rọ vwọ ta eta nana kẹ ihwo na ejobi nyo nu, ọ da vwẹriẹ Kepanọm.

²Asakiephana odibo rẹ onotu rẹ ofovwi ọvo rọ ghare vwẹ obọ rọye, rọ honvwa ko muegbe rẹ ughwu.

³Ro vwo nyo usi ri Jesu, o de ji ekpako ri Ju na bro ra, re o rhi sivwi odibo rọye na.

⁴Ọke rẹ ayen rhi vwo te asan ri Jesu epha, ayen da rẹ gangan, tanẹ, O fo ohwo re ru emu nana kẹ,

⁵Kidie ọ guọnọ ẹgborho rẹ avwanre, ekpuyovwi rọye da bọn sinagọg kẹ avwanre.

⁶Jesu de nene ayen ra. Ọke ro che vwo te uwevwi rẹ onotu na re, onotu na de ji igbeyan rọye bro, ra ta kẹ nẹ, Ọrovwohwo, wọ lagha oma wẹ-ẹn, kidie mi fo ohwo ru wọ ro uwevwi rọye-e;

⁷mi ji roro nẹ mi fo ohwo ro bru uwe rhe-e. Ẹkẹvuọvo ta ota rẹ unu wẹn, oma rẹ odibo mẹ na ko kpo.

⁸Kidie mẹvwẹ wọ mrẹ na ohwo rode vẹ ogangan, ro vwo isodje buebu ri mi suẹn. Me da ta kẹ ọvo nẹ, Yanran, ọ me ghene yanran; Yanrhe, ọ me ghene yanrhe; Ru ọna o mi ghini ruo.

⁹Ọke ri Jesu vwo nyo eta nana o de gbe unu, ọ da rhẹriẹ oma ọ da ta kẹ urogho na ri nene na nẹ, Me ta kẹ ovwan nẹ, Me je mrẹ esegbuyota rode tiọna dẹvo vwẹ Izrẹl na-a.

¹⁰Ihwo re jiri na vwo te obo uwevwi, oma rẹ odibo na kpo nure.

¹¹Ọmọke ọvo vwọ wan nu o de kpo orere re se Nen, idibo rọye vẹ otu buebu de nene.

¹²Ro rhi vwo te ughere rẹ orere na, nighe, a ra ghwa orivwi ọvo cha, ọmọ ọvuọvo rẹ oni vwiẹri, aye na kẹ ayeuku; ihwo rẹ orere na buebu ke viẹ nene.

¹³Rẹ Ọrovwohwo vwọ mrẹ, ẹro rọye da dọn ọ da ta kẹ, Wọ viẹẹ.

¹⁴O de rhi si kẹre okọ na, ihwo re ghwarọ de mudia. Ọ da ta, Emeghene na, Me ta kẹ wẹ, vrẹn,

¹⁵Ọ ro ghwuru na de vrẹn tidia, kọ ta ota. O da reyọ vwọ kẹ oni rọye.

¹⁶Oshọ de mu ayen ejobi; ayen de jiri Ọghẹnẹ, tanẹ, Ọmraro rode rhi mu vwẹ uherevie rẹ avwanre, Ọghẹnẹ bru ihwo rọye rhe re!

¹⁷Usi rọye de rhi mu nene Judia ejobi, kugbe orho re riarierẹ phihọ.

¹⁸Idibo ri Jọn de gbe ikun nana ejobi kẹ.

¹⁹Jọn de se idibo rọye ivẹ, o de ji ayen bru Ọrovwohwo, tanẹ, Wẹ hẹ ohwo rọ cha na gbinẹ avwanre ji phiẹrohọ ohwo ọfa?

²⁰Ọke rẹ ihwo na rhi vwo te asan rọ epha, ayen da ta nẹ, Jọn ri Baptist ri ji avwanre bru we rhe, tanẹ, Wẹ hẹ ohwo rọ cha na vwo, gbinẹ avwanre ji phiẹrohọ ohwo ọfa?

²¹Vwẹ unọke yena o de sivwi ihwo buebu re honvwa, ọ da dje irhi rẹ Idẹbono phia, o de rhie ẹro rẹ ihwo ri rhuru.

²²Ọ da kpahe kẹ ayen, Yanran wa ra vuẹ Jọn obo rẹ ovwan mrẹre kugbe obo rẹ ovwan nyori. irhuẹro mrẹ orẹ, ikpono yanre, ihunvwoti e sivwi ayen, idierhọn nyẹme, a rhọvwọ irivwi, e gbe ikun esiri na ke ivwiogbere.

²³Ebruba kẹ ohwo yena rọ mrẹ ogbeku ọvuọvo vwẹ obọ mẹ-ẹ.

²⁴Ọke rẹ ikọn ri Jọn vwọ yanran nu, o de mu ikun ri Jọn họ e gbe kẹ ihwo re hẹ etiyin ejobi. Die ovwan kpo aghwa re ni vwo? Eyareya rẹ odju kpogho?

²⁵Kidie ovwan tobọ yanran re ni vwọ? Ohwo rọ vwẹ emwa elọlọhọ rhuo? Nighe, otu re vwẹ emwa ride sẹ re ria avwerhe e hẹ obo ọguan rẹ ovie.

²⁶Kidie ovwan tobọ re ni vwọ? Ọmraro? E, Me ta kẹ ovwan, ọ rhonọ ọmraro.

²⁷Ọnana hẹ ohwo re siro kpahe, Nighe, Mi ji ikọn mẹ ka obaro kẹ wẹ, Ohwo rọ rhuẹrẹ idjerhe wẹn kẹ wẹ.

²⁸Me ta kẹ ovwan, Usun rẹ ihwo rẹ aye vwiẹri na, o ji vwo ohwo rọ rho te Jọn ri Baptisti-i; dede na ohwo rọ ma hanvwe vwẹ uvie rẹ Ọghẹnẹ na rhonọ.

²⁹Ihwo na ejobi kugbe imiarhọgho na vwo nyo ọna, ayen de jiri Ọghẹnẹ, kidie Jọn re vwẹ ame kẹ ayen;

³⁰ẹkẹvuọvo otu ri Farisi kugbe otu re riẹn urhi na da sen uyono rẹ Ọghẹnẹ, kidie ọ dia Jọn re vwẹ ame kẹ aye-en.

³¹Ki didi emu a vwẹ uvwiẹ na dje, eyẹ kidie re họherọ?

³²Ayen họhọ imitete ri tidia afieki ayen mie se ohwohwo, Avwanre hworo owanre kẹ ovwan, ovwan se gbe eha-a; avwanre viẹ kẹ ovwan, ovwan sa viẹ-ẹ.

³³Kidie Jọn ri Baptist rhere ọ re ikara-a ọ da udi-i; yẹ ovwan tare nẹ, O vwo erhi rẹ idẹbono.

³⁴Ọmọ rẹ ohwo rhere ọ da ọ ria; yẹ ovwan tanẹ, Nighe, ọgbọre ogbaudi, ugbeyan rẹ imiarhọghọ kugbe irnimwemwu!

³⁵Dede ọhọ vẹ aghwanre gbare vwẹ obọ rọye.

³⁶Ohwo ri Farisi ọvo de se ra re emu, o de kpo uwevwi ri Farisi na, o de tidia vwẹ udoemu.

³⁷Nighe aye ọvo vwẹ orere na, rọ dia oruimwemwu, ro vwo nyo nẹ Jesu ria emu vwẹ uwevwi ri Farisi na, ọ da reyọ ọgọ rẹ udẹ;

³⁸ro vwo mudia vwẹ obuko vwẹ asan awọ rọye, kọ viẹ ku awọ rọye ọ da vwẹ ẹto rẹ uyovwi rọye rhie, ọ da vwẹ udẹ na ghworo.

³⁹Ọke ri Farisi ro sere ra re emu na vwọ mrẹ, kọ vwẹ evuevun tanẹ, Ohwo nana, ọ dianẹ ọmraro o ruẹ, ke vugbe, oka rẹ ohwo rọ vwẹ obọ te na, kidie oruimwemwu o ruẹ.

⁴⁰Jesu da kpahe ta kẹ, Saimọn, Mi vwo ota re me ta kẹ wẹ. Ọ da kpahe, Oyono, gba ta.

⁴¹Omomigho ọvo de vwo ọreosa ivẹ; Ọvo re osa rẹ ikoba ujori iyori, ọrivẹ ujuvẹ gbẹ ihwe.

⁴²Ọke rẹ ayen gbe mrẹ igho hwa-a, o de vwo ghovwo ayen ivẹ. Ke ọvo usun rẹ ivẹ na re ma kpẹvwẹ?

⁴³Saimọn da kpahe, Mi rori nẹ ọ ra vwẹ igho obuebu ghovwo na. Ọ da ta kẹ nẹ, wọ riẹn kpahe.

⁴⁴Ro vwo rhẹriẹ oma ku aye na, Ọ da ta kẹ Saimọn, Wọ mrẹ aye nana? Me rhe uwevwi wẹn, wọ kẹ vwẹ ame vwọ hworhẹ awọ-ọ; jẹ aye nana vwẹ ovie hworhẹ ovwẹ awọ, ọ da vwẹ ẹto rọye rhie.

⁴⁵Wo gbane ovwẹ-ẹ; ẹkẹvuọvo rhawẹsiẹ Me vwọ rhe uwevwi na, aye nana vwọ gbane awọ mẹ.

⁴⁶Wo sa vwẹ ori ghworo uyovwi mẹ-ẹ; ẹkẹvuọvo aye nana tue udẹ ku vwe awọ.

⁴⁷Fiki rẹ ọtiọye na Me ta kẹ wẹ, Umwemwu rẹ aye nana, rọ epha buebu jovwo na, a vwẹ ayen ghovwo; kidie ẹguọnọ rọye buru; ẹkẹvuọvo ohwo ra vwẹ emu otete kẹ, jẹ emu otete ọ guọnọre.

⁴⁸Ọ da ta kẹ, Aye na a vwẹ imwemwu wẹn ghovwo uwe.

⁴⁹Etiyin ihwo re vẹ ọye gbe tidia udoemu na, ke vwẹ evuevun guẹ, Ọnana ono rọ sa vwẹ imwemwu ghovwo ohwo?

⁵⁰Ọ da ta kẹ aye na, Esegbuyota wẹn o sivwi uwe; kpo vwẹ ufuoma.